ଲକ୍ଷ୍ନୌ : ପ୍ରଗତୀଶୀଳ ସମାଜବାଦୀ ପାର୍ଟିର ଆବାହକ ଶିବପାଲ ଯାଦବ ମଙ୍ଗଳବାର କେତେକ ଛୋଟ ଦଳଙ୍କ ସହ ମିଶି ‘ପ୍ରୋଗ୍ରେସିଭ ଡେମୋକ୍ରାଟିକ ଆଲାଏନ୍ସ’ (ପ୍ରଗତୀଶୀଳ ଗଣତାନ୍ତ୍ରିକ ମେଣ୍ଟ) ଗଠନ କରିଛନ୍ତି। ଏହି ଅବସରରେ ସେ କହିଥିଲେ ଯେ ବିଜେପିକୁ ହରାଇବା ପାଇଁ ସବୁ ଧର୍ମନିରପେକ୍ଷ ଦଳ ମେଣ୍ଟ କରିବାକୁ ପ୍ରସ୍ତୁତ ଅଛନ୍ତି। ଏବେ ବିଜେପି ଗଣତନ୍ତ୍ର ପାଇଁ ସବୁଠୁ ବଡ଼ ବିପଦ ହୋଇଛି। କିନ୍ତୁ ଦୁର୍ଭାଗ୍ୟ ଯେ ଏସ୍ପି, ବିଏସ୍ପି ଏବଂ କଂଗ୍ରେସ ଭଳି ଦଳଙ୍କ ନିଜସ୍ୱ ସ୍ୱାର୍ଥ ପାଇଁ ବିଜେପି ବିରୋଧରେ ନିର୍ଣ୍ଣାୟକ ମେଣ୍ଟ ଗଠନ ହୋଇପାରିଲା ନାହିଁ। ବିଜେପିକୁ କେନ୍ଦ୍ର ଶାସନରୁ ହଟାଇବା ପାଇଁ ସମସ୍ତ ବିକଳ୍ପ ଖୋଲା ରହିଛି। ଏହାସହ ସେ ନିଜ ବଡ଼ଭାଇ ମୁଲାୟମ ସିଂହ ଯାଦବଙ୍କ ପଥରେ ଚାଲିଛନ୍ତି ଓ ତାଙ୍କ ଆଦେଶ ଅନୁସାରେ କାର୍ଯ୍ୟ କରିବେ ବୋଲି କହିଥିଲେ।
