ମୋହାଲି : ଭ୍ରମଣକାରୀ ଆଫଗାନିସ୍ତାନକୁ ୧ମ ଟି୨୦ ମ୍ୟାଚ୍ରେ ଭାରତୀୟ କ୍ରିକେଟ୍ ଦଳ ପରାସ୍ତ କରିଥିଲା। ଏହି ମ୍ୟାଚ୍ରେ ଭାରତ ତରଫରୁ ଶିଭମ୍ ୪୦ଟି ବଲ୍ରୁ ୬୦ ରନ୍ କରି ଅପରାଜିତ ଥିଲେ। ଶିଭମ୍ଙ୍କ ବ୍ୟାଟିଂ ବଳରେ ଭାରତ ସହଜ ବିଜୟ ହାସଲ କରିଥିଲା।
ମ୍ୟାଚ୍ ଶେଷ ହେବା ପରେ ସାମ୍ବାଦିକଙ୍କ ସହ ଆଲୋଚନା କାଳରେ ଶିଭମ୍ କହିଥିଲେ ବ୍ୟାଟିଂରେ ସେ ଯେଉଁ ସଫଳତା ପାଇଛନ୍ତି ତାହା ପଛରେ ଭାରତୀୟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କ ବଡ଼ ଭୂମିକା ରହିଛି। ପ୍ରଥମ ମ୍ୟାଚ୍ରେ ବ୍ୟାଟିଂ କରିବାକୁ ପଡ଼ିଆକୁ ଓହ୍ଲାଇବା ସମୟରେ ଧୋନିଙ୍କ ଠାରୁ ଯାହା ଶିକ୍ଷା ଲାଭ କରିଥିଲେ ତାହାକୁ ଉପଯୋଗ କରି ମ୍ୟାଚ୍ ବିଜୟୀ ଇନିଂସ ଖେଳିବାକୁ ନିଷ୍ପତ୍ତି ନେଇଥିଲେ। ଏହା କରି ପାରିଥିବାରୁ ବେଶ୍ ଖୁସି ଅଛନ୍ତି। ଅନେକ ସମୟରେ ଧୋନିଙ୍କ ସହ ଆଲୋଚନା କରିଥାନ୍ତି ବୋଲି ଶିଭମ୍ ସୂଚନା ଦେଇଥିଲେ। ପରିସ୍ଥିତି ଅନୁଯାୟୀ ବ୍ୟାଟିଂ କରି ଦଳକୁ କିପରି ବିଜୟୀ କରାଯାଇ ପାରିବ ସେ ନେଇ ଧୋନି ତାଙ୍କୁ ଉପଯୋଗୀ ପରାମର୍ଶ ଦେଇଥିବା ଶିଭମ୍ କହିଥିଲେ। ଧୋନିଙ୍କ ଠାରୁ ପରାମର୍ଶ ଗ୍ରହଣ କରିବା ପରେ ତାଙ୍କର ମନୋବଳ ବେଶ୍ ବଢ଼ି ଯାଇଥିବା ସେ ସ୍ବୀକାର କରିଥିଲେ। ଭାରତୀୟ ଦଳର ଅଧିନାୟକ ରୋହିତ ଶର୍ମା ତାଙ୍କୁ ଆତ୍ମବିଶ୍ବାସର ସହ ବ୍ୟାଟିଂ କରିବାକୁ କହିଥିଲେ ବୋଲି ଶିଭମ୍ କହିଥିଲେ। ଆଗାମୀଦିନରେ ଉଭୟ ବ୍ୟାଟିଂ ଓ ବୋଲିଂରେ ଦଳ ପାଇଁ ଉପଯୋଗୀ ପ୍ରଦର୍ଶନ କରିପାରିବେ ବୋଲି ଶିଭମ୍ ଆଶାବ୍ୟକ୍ତ କରିଥିଲେ। ଆଫଗାନିସ୍ତାନ ବିପକ୍ଷ ପ୍ରଥମ ମ୍ୟାଚ୍ରେ ଶିଭମ୍ ଗୋଟିଏ ୱିକେଟ୍ ହାସଲ କରିଥିଲେ। ନିଜ ବୋଲିଂ ସମ୍ପର୍କରେ ସେ କହିଥିଲେ ଫିଟନେସ୍ ସୁଧାରିବାକୁ ବହୁତ ପରିଶ୍ରମ କରିଥିଲେ। ଏଥିସହ ଘରୋଇ କ୍ରିକେଟ୍ରେ ସେ ନିଜ ବୋଲିଂ ଉପରେ ଅଧିକ ଧ୍ୟାନ ଦେଇଥିଲେ। ଆଗାମୀଦିନରେ ଏହା ଲାଭଦାୟକ ହେବ ବୋଲି ଶିଭମ୍ କହିଥିଲେ।
