ଶିରିଡି ଭକ୍ତଙ୍କ ଭାବାବେଗକୁ ରାହୁଲଙ୍କ ଆଘାତ
ନୂଆଦିଲ୍ଲୀ : କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଶିରିଡି ସାଇବାବା ଭକ୍ତଙ୍କ ଭାବାବେଗକୁ ଆଘାତ ଦେଇଥିବା ଅଭିଯୋଗ ହୋଇଛି। ଭକ୍ତଙ୍କ ଭାବାବେଗକୁ ଆଘାତ ଦେବାକୁ ନେଇ ଶ୍ରୀ ସାଇବାବା ସଂସ୍ଥାନ ଟ୍ରଷ୍ଟ ବୁଧବାର ରାହୁଲଙ୍କ ଠାରୁ କ୍ଷମାପ୍ରାର୍ଥନା ଦାବି କରିଛି। ରେଳମନ୍ତ୍ରୀ ପିୟୂଷ ଗୋଏଲ ଓ ତାଙ୍କ ପରିବାର ବିରୋଧରେ ଦୁର୍ନୀତି ଅଭିଯୋଗ ଆଣିବା ପୂର୍ବକ ରାହୁଲ କରିଥିବା ଟୁଇଟ୍ରେ ଶିରିଡି ସାଇବାବାଙ୍କ ନାମକୁ ସାମିଲ କରିଥିଲେ। ଶିରିଡି ସାଇ ଟ୍ରଷ୍ଟର ଅଧ୍ୟକ୍ଷ ସୁରେଶ ହାୱାରେ କହିଛନ୍ତି ଯେ ରାହୁଲ ନିଜର ରାଜନୈତିକ ସ୍ୱାର୍ଥ ପାଇଁ ଶିରିଡି ସାଇବାବାଙ୍କ ନାମକୁ ଉପଯୋଗ କରୁଛନ୍ତି। ଏହା ଅତ୍ୟନ୍ତ ଦୁର୍ଭାଗ୍ୟର ବିଷୟ। ତେଣୁ ସାଇବାବାଙ୍କ ଭକ୍ତଙ୍କ ତରଫରୁ ମୁଁ (ସୁରେଶ) ଏହାକୁ ନିନ୍ଦା କରିବା ସହ ଏଥିପାଇଁ ରାହୁଲଙ୍କ ଠାରୁ କ୍ଷମା ପ୍ରାର୍ଥନା ଦାବି କରୁଛି।