ନୂଆଦିଲ୍ଲୀ: ଜାମ୍ମୁ କାଶ୍ମୀର ଜାତୀୟ ରାଜପଥରେ ଯାତାୟାତ କଟକଣା ନେଇ ସର୍ବୋଚ୍ଚ ନ୍ୟାୟାଳୟ କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ଠାରୁ ଜବାବ ତଲବ କରିଛନ୍ତି। ଉଦ୍ଧାମପୁର ଠାରୁ ବାରମୂଳା ପର୍ଯ୍ୟନ୍ତ ଜାତୀୟ ରାଜପଥରେ ସୁରକ୍ଷା ବଳଙ୍କ ଯାତାୟାତ ଦୃଷ୍ଟିରୁ ସପ୍ତାହର ଦୁଇ ଦିନ ସାଧାରଣ ନାଗରିକଙ୍କ ଯାତାୟାତ ଉପରେ ଜାରି କରାଯାଇଥିବା କଟକଣାକୁ ଖାରଜ କରିବା ପାଇଁ ଦାୟର ମାମଲାରେ ସୋମବାର ନ୍ୟାୟାଳୟ ଏହି ଜବାବ ତଲବ କରିଛନ୍ତି।
ଏପ୍ରିଲ ୩ରେ ରାଜ୍ୟ ସରକାର ଏକ ଆଦେଶରେ କହିଥିଲେ ଯେ ପୁଲୱାମା ଆତଙ୍କୀ ଆକ୍ରମଣ, ବନିହାଲରେ ସୁରକ୍ଷାକର୍ମୀଙ୍କ ଉପରେ ଆକ୍ରମଣ ଏବଂ ଲୋକସଭା ନିର୍ବାଚନ ସମୟରେ ସୁରକ୍ଷା କର୍ମୀଙ୍କ ସୁରକ୍ଷିତ ଯାତାୟାତ ନିଶ୍ଚିତ କରିବା ଉଦ୍ଦେଶ୍ୟରେ ୪୪ ନମ୍ବର ଜାତୀୟ ରାଜପଥରେ ସପ୍ତାହକୁ ଦୁଇ ଦିନ ସକାଳ ୪ଟାରୁ ସନ୍ଧ୍ୟା ୫ଟା ପର୍ଯ୍ୟନ୍ତ ସାଧାରଣ ନାଗରିକଙ୍କ ଯାତାୟାତ ଉପରେ କଟକଣା ଜାରି କରାଯାଇଛି। ପ୍ରଧାନ ବିଚାରପତି ଜଷ୍ଟିସ ରଞ୍ଜନ ଗୋଗୋଇଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ ସୋମବାର ଏହି ମାମଲାର ଶୁଣାଣି କରିଥିଲେ। ଆୱାମୀ ନେସନାଲ କନ୍ଫରେନ୍ସ ବରିଷ୍ଠ ଉପାଧକ୍ଷ ମୁଜାଫର ଶାହ ଓ ସାମାଜିକ କର୍ମୀ ୟାସମୀନ ସୋନାଉଲ୍ଲା ସୁପ୍ରିମ କୋର୍ଟରେ ଏହି ମାମଲା ଦାଏର କରିଛନ୍ତି।
Comments are closed.