ସମ୍ବଲପୁର: ସମ୍ବଲପୁରର ଜଣାଶୁଣା ଆର୍ନ୍ତଜାତୀୟ ମାର୍ଷ୍ଟସ କ୍ରୀଡାବିତ ସୁନ୍ଦରମଣି ବାରିକଙ୍କୁ ଜାତୀୟ କ୍ରୀଡା ଦିବସ ଅବସରରେ ମାରୱାଡି ଯୁବା ମଞ୍ଚ ତରଫରୁ ସମ୍ବର୍ଦ୍ଧିତ କରାଯାଇଛି। ମେଜର ଧ୍ୟାନଚାନ୍ଦଙ୍କ ଜନ୍ମ ଦିବସ ଉପଲକ୍ଷେ ଦେଶରେ ପାଳିତ ହେଉଥିବା ଜାତୀୟ କ୍ରୀଡା ଦିବସ ଅବସରରେ ମାର୍ଷ୍ଟସ କ୍ରୀଡାବିତ ଶ୍ରୀ ବାରିକଙ୍କୁ ତାଙ୍କର କୁଲୁଥକାନୀ ସ୍ଥିତ ବାସଭବନ ଠାରେ ମଞ୍ଚ ପକ୍ଷରୁ ସମ୍ବର୍ଦ୍ଧନା ଦିଆଯାଇଛି। ଶ୍ରୀ ବାରିକ ଛୋଟ ସମୟରୁ ହିଁ କ୍ରୀଡା ପ୍ରତି ବେଶ ଆକୃଷ୍ଟ ରହିବା ସହିତ ବିଦ୍ୟାଳୟ, ଉଚ୍ଚ ବିଦ୍ୟାଳୟ, ମହାବିଦ୍ୟାଳୟ, ଏସବିଆଇ ଜୋନାଲ କ୍ରୀଡା ପ୍ରତିଯୋଗୀତା, ଓଡ଼ିଶା ରାଜ୍ୟ ମାର୍ଷ୍ଟସ ପ୍ରତିଯୋଗୀତା ସମେତ ରାଜ୍ୟକୁ ଦେଶ ଓ ଆର୍ନ୍ତଜାତୀୟ ସ୍ତରରେ ପ୍ରତିନିଧିତ୍ୱ କରି ଅନେକ ସୁନାମ ଓ ମେଡାଲ ଅର୍ଜନ କରିଛନ୍ତି।
ଶ୍ରୀ ବାରିକ ୧୭ତମ ବିଶ୍ୱ ମାର୍ଷ୍ଟସ କ୍ରୀଡା ଚାମ୍ପିୟନସିପ -୨୦୦୭ ମସିହାରେ ଇଟାଲୀ ଠାରେ ଅଂଶଗ୍ରହଣ କରି ୫୦ ବର୍ଷରୁ ଉର୍ଦ୍ଧ ବର୍ଗର ୪ ଶହ ମିଟର ରିଲେ ରେସରେ ଅଷ୍ଟମ ସ୍ଥାନ ଅଧିକାର କରିଥିଲେ। ୨୦୧୮ ମସିହାରେ ପ୍ରଥମ ଜାତୀୟ ମାର୍ଷ୍ଟସ କ୍ରୀଡା ପ୍ରତିଯୋଗୀତାରେ ସନ୍ତରଣରେ ୬୦ ବର୍ଷରୁ ଉର୍ଦ୍ଧ ବର୍ଗରେ ବ୍ରୋଞ୍ଜ ପଦକ ହାସଲ କରିଥିଲେ। ଏଥି ସହ ସେ ଓଡ଼ିଶାର ରାଜ୍ୟପାଳଙ୍କ ଦ୍ୱାରା ଲାଇଫ ଟାଇମ ଆଚିଭମେନ୍ଟ ପୁରସ୍କାର ପ୍ରାପ୍ତ କରିଛନ୍ତି। ନିରନ୍ତର କ୍ରୀଡା ପ୍ରତି ସର୍ମପିତ ଶ୍ରୀ ବାରିକଙ୍କୁ ତାଙ୍କର ନିଷ୍ଠା ଓ ଉଦ୍ୟମ ପାଇଁ ମାରୱାଡି ଯୁବା ମଞ୍ଚ ସମ୍ବଲପୁର ଶାଖା ତରଫରୁ ସମ୍ମାନୀତ କରାଯାଇଛି। ଏହି କାର୍ଯ୍ୟକ୍ରମରେ ମଞ୍ଚର ସଭାପତି ଆକାଶ ଗୋଏଲ, ସମ୍ପାଦକ ରିତେଶ ମିତ୍ତଲ, ଆଶିଷ ମହାୱାର, ନନ୍ଦକିଶୋର ଅଗ୍ରୱାଲ, ପିୟୁସ ଅଗ୍ରୱାଲ, ନାରାୟଣ ଶର୍ମା, ସିଦ୍ଧାର୍ଥ ଅଗ୍ରୱାଲ ଓ ଜିଲା କ୍ରୀଡା ସଂଘର ଖେଳ ସଚିବ ରାଜେଶ ସେଟ ପ୍ରମୁଖ ଉପସ୍ଥିତ ରହିଥିଲେ।
