ପର୍ସିଆରୁ ହିଁ ସର୍ବପ୍ରଥମେ ‘ସିଙ୍ଗଡ଼ା’ ଛଣା ଖାଦ୍ୟର ଉତ୍ପତ୍ତି ହୋଇଥିବାର ବିଶେଷଜ୍ଞଙ୍କ ଅନୁମାନ। ହେଲେ ଭାରତରେ ହିଁ ଏହାର ଲୋକପ୍ରିୟତା ଶୀର୍ଷରେ ପହଞ୍ଚି ବିଦେଶରେ ନିଜର ଆସ୍ଥାନ ଜମାଇଥିଲା। ଆଜିର ସମୟରେ ଭାରତର ବିଭିନ୍ନ ପ୍ରାନ୍ତରେ ଭିନ୍ନଭିନ୍ନ ସୁଆଦର ସିଙ୍ଗଡ଼ାର ବେପାର ଜମିଛି। ତଥାପି ‘ଆଳୁ ସିଙ୍ଗଡ଼ା’ର ଲୋକପ୍ରିୟତା ସେହିପରି ଶୀର୍ଷରେ ଅଛି।
ଗତ କିଛି ବର୍ଷ ମଧ୍ୟରେ ଲଣ୍ଡନରେ ସିଙ୍ଗଡ଼ାର ବିକ୍ରି ବଢ଼ିଥିବାର ପ୍ରକାଶ। କେବଳ ଭାରତୀୟଙ୍କ ଗହଣରେ ନୁହେଁ, ବରଂ ସେଠାରେ ଲୋକେ ଏହାକୁ ସକାଳ ଜଳଖିଆ ଭାବେ ଖାଇବାକୁ ପସନ୍ଦ କରୁଛନ୍ତି। ଏଇ ଆସନ୍ତା ଏପ୍ରିଲ୍ ୯-୧୨ ପର୍ୟ୍ୟନ୍ତ ବ୍ରିଟେନରେ ‘ସିଙ୍ଗଡ଼ା ସପ୍ତାହ’ ପାଳନ ହେବ ବୋଲି ଜଣାପଡ଼ିଛି।
ସେଠାକାର ପଞ୍ଚତାରକା ହୋଟେଲଠାରୁ ଆରମ୍ଭ କରି ରାସ୍ତାକଡ଼ ଦୋକାନରେ ବିଭିନ୍ନ ପ୍ରକାରର ସିଙ୍ଗଡ଼ା ପ୍ରସ୍ତୁତି ହେବ। ପ୍ରଥମକରି ସେଠାରେ ସିଙ୍ଗଡ଼ା ସପ୍ତାହ ପାଳନ କରାଯିବ। ଏହାକୁ ନେଇ ଲୋକଙ୍କ ମନରେ ପ୍ରବଳ ଉତ୍ସାହ ଦେଖାଦେଇଛି। ସେଠାରେ ଏକ ଫେଶନ୍ ଦୋକାନରେ କାମ କରୁଥିବା ଲି ଆର୍ଥର ନାମକ ୪୫ ବର୍ଷୀୟ ବ୍ୟକ୍ତି କହିଛନ୍ତି, ସିଙ୍ଗଡ଼ା ଏକ ମନଲୋଭା ଖାଦ୍ୟ। ସ୍ଥାନୀୟ ଲୋକଙ୍କ ଉଦ୍ୟମରେ ହିଁ ବ୍ରିଟେନରେ ଏହି ଭାରତୀୟ ଖାଦ୍ୟଟି ଖୁବ୍ ଆଦର ପାଇଛି।