ସମାବାଲି ଗ୍ରାମବାସୀଙ୍କ ପାଇଁ ନଳକୂପ ସାତ ସପନ, ପାଣି ପାଇଁ ଡହଳବିକଳ ହେଉଛନ୍ତି ଲୋକେ

ଫୁଲବାଣୀ: ରାଜ୍ୟ ସରକାର ସହରାଞ୍ଚଳଠାରୁ ଆରମ୍ଭ କରି ଗ୍ରାମାଞ୍ଚଳରେ ରହୁଥିବା ପ୍ରତ୍ୟେକ ପରିବାରକୁ ବିଶୁଦ୍ଧ ପାନୀୟ ଜଳ ଯୋଗାଇବା ନିମନ୍ତେ ଅନେକ ଯୋଜନା କରୁଛନ୍ତି। ବିଭିନ୍ନ ପ୍ରକଳ୍ପ ମାଧ୍ୟମରେ ପାନୀୟଜଳ ଯୋଗାଣ କରୁଛନ୍ତି। ହେଲେ କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଳକ୍ ଲୁଇସିଂ ପଞ୍ଚାୟତ ଅନ୍ତର୍ଗତ ଲାଠିକୁପା ଗ୍ରାମ ସମାବାଲି ସାହିରେ ଏପର୍ଯ୍ୟନ୍ତ ନଳକୂପଟିଏ ନାହିଁ। ଫଳରେ ଗ୍ରାମରେ ବର୍ତ୍ତମାନ ଜଳସଙ୍କଟ ଦେଖିବାକୁ ମିଳିଛି। ଲୋକେ ପାଣି ପାଇଁ ଡହଳବିକଳ ହେଉଛନ୍ତି। ସାହିବାସିନ୍ଦାମାନେ ପଞ୍ଚାୟତ କାର୍ଯ୍ୟାଳୟଠାରୁ ଆରମ୍ଭ କରି ବ୍ଲକ କାର୍ଯ୍ୟାଳୟ ପର୍ଯ୍ୟନ୍ତ ଲିଖିତ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ନାହିଁ। ଯାହାଫଳରେ ସମାବାଲି ସାହିର ଜନସାଧାରଣଙ୍କ ମନରେ ତୀବ୍ର ଅସନ୍ତୋଷ ଦେଖାଦେଇଛି। ସମବାଲି ସାହିର ବିଶ୍ଵନାଥ କହଁର, ପ୍ରମିଳା ମଲ୍ଲିକ, ଗୀତାଞ୍ଜଳି କହଁର , ସୁମିତ୍ରା ମଳିକ, ମାନବ କହଁର, ନିଦ କହଁର, ଭାସ୍କର ମଳିକ, କଟେରୀ କହଁର ଶାଶ୍ର ମଳିକ, ନିଦିକ୍ କହଁର, ଶ୍ରଦ୍ଧାଞ୍ଜଳି ମଳିକ, ସୁବଳ କହଁର ଓ ସୁଧାମ କହଁର ଏବଂ ଲାଟିକୁପା ଗ୍ରାମର ସମବାଲି ସାହିର ଲୋକମାନେ ପିଇବା ପାଣି ପାଇଁ ୧ କିଲୋମିଟର ଦୂର ଯାଉଛନ୍ତି। ଆଗକୁ ଖରାଦିନ ଆସୁଥିବାରୁ ପିଇବା ପାଣି ପାଇଁ ଆହୁରି ଅସୁବିଧା ଦେଖାଦେବା ସହିତ ଲାଟିକୁପା ଗ୍ରାମ ସମବାଲି ସାହିର ବାସିନ୍ଦା ଏଥିପ୍ରତି ସରକାର ଦୃଷ୍ଟି ଦେବାକୁ ଅନୁରୋଧ କରିଛନ୍ତି। ପ୍ରଶାସନ ଏ ଦିଗରେ କୌଣସି ପ୍ରକାର ପଦକ୍ଷେପ ନ ନେଲେ ବାଧ୍ୟ ହୋଇ ଅଞ୍ଚଳବାସୀ ଆଗାମୀ ଦିନରେ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି।