ଜିଲାରେ ୧୭ ବ୍ଲାକସ୍ପଟ ଚିହ୍ନଟ, ମାସକ ମଧ୍ୟରେ ସଂଶୋଧନ କରିବାକୁ ତାଗିଦ୍‌‌

କେନ୍ଦୁଝରଗଡ : କେନ୍ଦୁଝର ଜିଲା ଦେଇ ଯାଇଥିବା ୨୦ନଂ ଓ ୫୨୦ନଂ ଏବଂ ୪୯ନଂ ଜାତୀୟ ରାଜପଥର ତୃଟିପୂର୍ଣ୍ଣ ନିର୍ମାଣ ସାଙ୍ଗକୁ ଖଣି ଓ ଶିଳ୍ପବହୁଳ ଏହି ଜିଲାରେ ମାତ୍ରାଧିକ ଭାରିଯାନ ଚଳାଚଳ ଯୋଗୁଁ ଦୁର୍ଘଟଣା  ହାର ସମଗ୍ର ରାଜ୍ୟରେ କେନ୍ଦୁଝର ସର୍ବାଧିକ । ଚଳିତବର୍ଷ ମେ’ ସୁଦ୍ଧା ବା ୫ମାସରେ ଜିଲାରେ ୩୫୦ଟି ସଡକ ଦୁର୍ଘଟଣାରେ ୧୬୯ଜଣଙ୍କ ପ୍ରାଣହାନୀ ଘଟିଥିବା ବେଳେ ୨୮୩ଜଣ ଆହତ ହେବା ଜିଲାରେ ‘ସଡକ ସୁରକ୍ଷା-ଜୀବନ ରକ୍ଷା’ କେବଳ ସ୍ଲୋଗାନରେ ସୀମିତ ଥିବା ସ୍ପଷ୍ଟ ପ୍ରମାଣିତ କରୁଛି। ସଡକ ଦୁର୍ଘଟଣାକୁ କିଭଳି ରୋକାଯାଇ ପାରିବ ସେ ନେଇ ପରିବହନ ବିଭାଗ ଓ ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷଙ୍କ ପକ୍ଷରୁ ବହୁବାର ଉଦ୍ୟମ କରାଯାଇଥିଲେ ହେଁ ସେଭଳି କୌଣସି ବିଶେଷ ଫଳପ୍ରଦ ହୋଇ ପାରିନାହିଁ । ସମଗ୍ର ଜିଲାରେ ୧୭ଟି ବ୍ଲାକସ୍ପଟ ବା ଦୁର୍ଘଟଣାପ୍ରବଣ ସ୍ଥାନ ଚିହ୍ନଟ କରାଯାଇଥିବା ବେଳେ ସେଥିମଧ୍ୟରୁ ମାତ୍ର ୨ଟି ସ୍ଥାନ ସଂଶୋଧନ କରାଯାଇଥିବା ବେଳେ ୧୫ଟି ସ୍ଥାନ ଏବେ ମଧ୍ୟ ଦୁର୍ଘଟଣାପ୍ରବଣ ଭାବେ ରହିବା ସହ ଦୈନିକ ଛୋଟବଡ ଦୁର୍ଘଟଣା ଘଟି ବ୍ୟାପକ ଧନଜୀବନ ହାନୀ ନେଇ ବୁଦ୍ଧିଜୀବୀ ମହଲରେ ତୀବ୍ର ଉଦ୍‌‌ବେଗ ପ୍ରକାଶ ପାଇ ଆସୁଛି । ଗତ ରବିବାର ଆଞ୍ଚଳିକ ପରିବହନ ଅଧିକାରୀ ଗୋପାଳକୃଷ୍ଣ ଦାସ ଜାତୀୟ ରାଜପଥ ପ୍ରାଧିକରଣ କେନ୍ଦୁଝରର କର୍ତ୍ତୃପକ୍ଷଙ୍କ ସହ କେନ୍ଦୁଝର ଠାରୁ ରିମୁଳି ପର୍ଯ୍ୟନ୍ତ ଥିବା ଦୁର୍ଘଟଣାପ୍ରବଣ ସ୍ଥାନ ପରିଦର୍ଶନ କରି ତୁରନ୍ତ ଏହାର ସଂଶୋଧନ କରାଯାଇ କିଭଳି ଦୁର୍ଘଟଣାକୁ ରୋକାଯାଇ ପାରିବ ସେଥିପ୍ରତି ତାଗିଦ୍‌‌ କରିଥିବା ଆରଟିଓ ଶ୍ରୀ ଦାସ କହିଛନ୍ତି । ଏଥିସହ ମାସକ ମଧ୍ୟରେ ଜିଲାରେ ଚିହ୍ନଟ ହୋଇଥିବା ସମସ୍ତ ଦୁର୍ଘଟଣାପ୍ରବଣ ସ୍ଥାନ ସଂଶୋଧନ କରିବାକୁ ମଧ୍ୟ ଜାତୀୟ ପ୍ରାଧିକରଣ କର୍ତ୍ତୃପକ୍ଷଙ୍କୁ ତାଗିଦ୍‌‌ କରାଯାଇଥିବା ଶ୍ରୀ ଦାସ କହିଛନ୍ତି ।