ଗର୍ବ, ଅହଂକାର ଯୋଗୁ ବିଜେପି ୨୪୦ରେ ଅଟକିଲା: ଆରଏସଏସ ନେତା ଇନ୍ଦ୍ରେଶ କୁମାର

ସମାଜ ଡିଜିଟାଲ ଡେସ୍କ: ଚଳିତ ଲୋକସଭା ନିର୍ବାଚନରେ ଭାରତୀୟ ଜନତା ପାର୍ଟି(ବିଜେପି) ବହୁମତ ହାସଲ କରିପାରିଲା ନାହିଁ। ଦଳ ମାତ୍ର ୨୪୦ ଆସନରେ ଅଟକିଗଲା। ଏହାର କାରଣ ଗର୍ବ ଏବଂ ଅହଂକାର ବୋଲି କହିଛନ୍ତି ରାଷ୍ଟ୍ରୀୟ ସ୍ୱଂୟସେବକ ସଂଘ(ଆରଏସଏସ) ନେତା ଇନ୍ଦ୍ରେଶ କୁମାର। ବିଜେପିର ଗର୍ବ ଓ ଅହଂକାର ଯୋଗୁ ଦଳକୁ ସଂଖ୍ୟା ଗରିଷ୍ଠତା ମିଳିଲା ନାହିଁ ବୋଲି ସେ କହିଛନ୍ତି। ଅନୁରୂପ ଭାବେ ସେ କଂଗ୍ରେସ ଏବଂ ଇଣ୍ଡି ମେଣ୍ଟକୁ ବି ତୀବ୍ର ସମାଲୋଚନା କରିଛନ୍ତି।

ଇନ୍ଦ୍ରେଶ କୁମାର ଜୟପୁର ନିକଟ କନୋଟାରେ ଆୟୋଜିତ ରାମରଥ ଅଯୋଧ୍ୟା ଯାତ୍ରା ଦର୍ଶନ ପୂଜନ ସମାରୋହରେ ଯୋଗଦେବା ଅବସରରେ କହିଥିଲେ ଯେ, ବିଜେପି, ଯିଏକି ପ୍ରଭୁ ଶ୍ରୀରାମଙ୍କୁ ଭକ୍ତି କରୁଥିଲା, ଧୀରେ ଧୀରେ ଗର୍ବରେ ବୁଡ଼ି ରହିଲା। ସେଥିପାଇଁ ଦଳ ୨୪୦ ଆସନରେ ବିଜୟୀ ହେଲା, କିନ୍ତୁ ସଂଖ୍ୟା ଗରିଷ୍ଠତା ପାଇଲା ନାହିଁ। ସେହିପରି ଇଣ୍ଡି ମେଣ୍ଟଙ୍କୁ ଲକ୍ଷ୍ୟ କରି କହିଥିଲେ ଯେ, ଯେଉଁମାନଙ୍କର ଶ୍ରୀରାମଙ୍କ ଉପରେ ଭରସା ନ ଥିଲା ସେମାନେ ଏକାଠି ହୋଇ ବି ୨୩୪ ଆସନ ପାଇଲେ। ଏହା ହେଉଛି ଗଣତନ୍ତ୍ରରେ ରାମ ରାଜ୍ୟର ବିଧାନ। ବିଜେପି ସବୁଠୁ ବଡ଼ ଦଳ ଭାବେ ସର୍ବାଧିକ ଆସନ ପାଇଲା, କିନ୍ତୁ ଅହଂକାରୀ ମନୋଭାବ ଯୋଗୁ ଭଗବାନ ସମ୍ପୂର୍ଣ୍ଣ କ୍ଷମତା ଦେଲେ ନାହିଁ। ଯେଉଁମାନେ ରାମଙ୍କୁ ବିରୋଧ କରୁଥିଲେ ସେମାନଙ୍କୁ ଆଦୌ କ୍ଷମତା ମିଳିଲା ନାହିଁ।

ଇନ୍ଦ୍ରେଶ ଆହୁରି କହିଥିଲେ ଯେ, ଯେଉଁମାନେ ଶ୍ରୀରାମଙ୍କୁ ପୂଜା କରନ୍ତି ସେମାନେ ଅତ୍ୟନ୍ତ ବିନମ୍ର ହେବା ଉଚିତ। ଯେଉଁମାନେ ଶ୍ରରାମଙ୍କୁ ବିରୋଧ କରନ୍ତି, ସେମାନଙ୍କ ସହିତ ନିଜେ ଭଗବାନ ଲଢ଼ିଥାନ୍ତି। ଭଗବାନ ଶ୍ରୀରାମଙ୍କ ନିରପେକ୍ଷତାର ଉଦାହରଣ ଦେଇ ଇନ୍ଦ୍ରେଶ କହିଥିଲେ, ସେ କେବେ ଭେଦଭାବ କରନ୍ତି ନାହିଁ କି ଦଣ୍ଡ ବି ଦିଅନ୍ତି ନାହିଁ। ସେ କେବଳ ସମସ୍ତଙ୍କୁ ନ୍ୟାୟ ଦେଇଥାନ୍ତି।