ରାଞ୍ଚି: ଡାକ୍ତର ଏବଂ ସ୍ବାସ୍ଥ୍ୟକର୍ମୀମାନେ କରୋନା ଆକ୍ରାନ୍ତଙ୍କ ସଂସ୍ପର୍ଶରେ ଆସୁଥିବାରୁ ସେମାନେ ଏହି ଭୂତାଣୁ ଦ୍ବାରା ମଧ୍ୟ ସଂକ୍ରମିତ ହେଉଛନ୍ତି। ଏପରି କି ଏହାଦ୍ବାରା ଅନେକ ଡାକ୍ତର ଏବଂ ସ୍ବାସ୍ଥ୍ୟକର୍ମୀଙ୍କ ମୃତ୍ୟୁ ମଧ୍ୟ ଘଟୁଛି। ତେଣୁ ଏହାକୁ ଦୃଷ୍ଟିରେ ରଖି କରୋନା ରୋଗୀ ଏବଂ ସ୍ବାସ୍ଥ୍ୟକର୍ମୀଙ୍କ ମଧ୍ୟରେ ଯଥାସମ୍ଭବ ଦୂରତା ରକ୍ଷା କରିବା ଲାଗି ବଡ଼ ବିକଳ୍ପ ସାଜିଛି ରୋବୋଟ। ସ୍ବାସ୍ଥ୍ୟକର୍ମୀମାନେ ରୋଗୀଙ୍କ ପ୍ରତ୍ୟକ୍ଷ ସଂସ୍ପର୍ଶରେ ନ ଆସିବା ଲାଗି ସେମାନଙ୍କୁ ଔଷଧ ଏବଂ ଖାଦ୍ୟ ଯୋଗାଇବା କାର୍ଯ୍ୟ କରୁଛି ରୋବୋଟ। ଏଭଳି ଦୃଶ୍ୟ ଦେଖିବାକୁ ମିଳିଛି ଝାଡ଼ଖଣ୍ଡର ଚାଇବାସା ଜିଲାରେ। ଚାଇବାସା ଜିଲା ଦେଶର ପ୍ରଥମ ଜିଲାଭାବେ ରୋବୋଟକୁ କରୋନା ରୋଗୀଙ୍କ ସେବାରେ ନିୟୋଜିତ କରିଛି। ଫଳରେ ଏବେ ଆକ୍ରାନ୍ତମାନଙ୍କୁ ଖାଦ୍ୟ ଏବଂ ଔଷଧ ବାଣ୍ଟିବାକୁ ସ୍ବାସ୍ଥ୍ୟକର୍ମୀମାନଙ୍କର ଆବଶ୍ୟକତା ପଡୁନାହିଁ।
ଏହି ରୋବୋଟ ରିମୋର୍ଟ ଦ୍ବାରା ପରିଚାଳିତ ହେଉଛି। ଏହାର ନାମ ରଖାଯାଇଛି ‘କୋବୋଟ’। ଚାଇବାସା ଜିଲାର ଡିଡିସି ଆଦିତ୍ୟ ରଞ୍ଜନ ୩ ଦିନ ଭିତରେ ୨୫ ହଜାର ଟଙ୍କାରୁ କମ୍ ଖର୍ଚ୍ଚରେ ଏହି ରୋବୋଟ ତିଆରି କରିଛନ୍ତି। ଏହାର ସାମ୍ନା ପଟେ କ୍ୟାମେରା ଲଗାଯାଇଛି, ଯାହାଦ୍ବାରା ସମ୍ମୁଖର ଦୃଶ୍ୟ ଉତ୍ତୋଳିତ ହେଉଛି। ଏହି ଦୃଶ୍ୟ ଜରିଆରେ ଅପରେଟର ତାହାକୁ ଅପରେଟ କରିବେ। ଏଥିରେ ସ୍ପିକର ମଧ୍ୟ ଖଞ୍ଜାଯାଇଛି, ଯାହାଦ୍ବାରା ରୋଗୀମାନଙ୍କୁ ଆବଶ୍ୟକ ସୂଚନା ପ୍ରଦାନ କରାଯାଉଛି। ଏହି ‘କୋବୋଟ’ରେ ୩୦ କିଲୋଗ୍ରାମ ଓଜନର ସାମଗ୍ରୀ ସ୍ଥାନାନ୍ତର କରାଯାଇପାରୁଛି। ୨୦୦ ମିଟର ଦୂରରୁ ଏହାକୁ ଅପରେଟ କରାଯାଇପାରିବ। ରୋଗୀଙ୍କୁ ଔଷଧ ଏବଂ ଖାଦ୍ୟ ବାଣ୍ଟି ଫେରିବା ପରେ ଏହାକୁ ସମ୍ପୂର୍ଣ୍ଣ ଭାବେ ସାନିଟାଇଜ କରାଯାଇ ପାରିବ। କାରଣ ଏହାକୁ ୱାଟରଫ୍ରୁଫ କରାଯାଇଛି।
ଏ ସମ୍ପର୍କରେ ଆଦିତ୍ୟ କହିଛନ୍ତି, ସ୍ବାସ୍ଥ୍ୟକର୍ମୀମାନେ ସଂକ୍ରମିତଙ୍କ ସହିତ ଯେପରି ଯଥାସମ୍ଭବ କମ୍ ସଂସ୍ପର୍ଶରେ ଆସିବେ ତାହାକୁ ଦୃଷ୍ଟିରେ ରଖି ଏହାକୁ ତିଆରି କରାଯାଇଛି। ଏପରି କି ସ୍ବାସ୍ଥ୍ୟକର୍ମୀମାନେ ଆଦୌ ସଂକ୍ରମିତଙ୍କ ସଂସ୍ପର୍ଶରେ ନ ଆସିବା ଆହୁରି ଭଲ। ଇନ୍ଦୋରରେ ଅନେକ ଡାକ୍ତର ସଂକ୍ରମିତ ହୋଇଛନ୍ତି। ସ୍ବାସ୍ଥ୍ୟ କର୍ମୀମାନେ ବି ସଂକ୍ରମିତ ହୋଇଛନ୍ତି। ତେଣୁ ସେମାନଙ୍କ ଜୀବନ ରକ୍ଷା ପାଇଁ ଏହାର ନିର୍ମାଣ କରାଯାଇଛି।
Comments are closed.