ନୂଆଦିଲ୍ଲୀ : ସାହାରା ଗୋଷ୍ଠୀ (ଗ୍ରୁପ୍) ଦ୍ୱାରା କ୍ଷତିଗ୍ରସ୍ତ ଜମାକାରୀଙ୍କୁ ନଅ ମାସ ମଧ୍ୟରେ ଅର୍ଥ ଫେରସ୍ତ ଲାଗି ସର୍ବୋଚ୍ଚ ନ୍ୟାୟାଳୟ ବିଚାରପତି ଏମ୍. ଆର୍. ଶାହ ଏବଂ ବିଚାରପତି ସି ଟି ରବିକୁମାରଙ୍କ ଖଣ୍ଡପୀଠ ଅନ୍ତରୀଣ ଆଦେଶନାମା ଜାରି କରିଛନ୍ତି। ଚିଟ୍ଫଣ୍ଡ ଜମାକାରୀଙ୍କ ଅର୍ଥ ଫେରସ୍ତ ଲାଗି ପିନାକ ପାଣି ମହାନ୍ତି ବନାମ କେନ୍ଦ୍ର ସରକାର ମାମଲାରେ ନ୍ୟାୟାଳୟ କେନ୍ଦ୍ର ସମବାୟ ମନ୍ତ୍ରଣାଳୟ ଆବେଦନକୁ ଗ୍ରହଣ କରି ସାହାରା-ସେବି ଫେରସ୍ତ ଖାତାରେ ପଡ଼ିରହିଥିବା ୨୪,୯୭୯.୬୭ କୋଟିରୁ ୫ ହଜାର କୋଟି ଟଙ୍କା ଜମାକାରୀଙ୍କୁ ଫେରସ୍ତ ଲାଗି ସମ୍ମତି ପ୍ରକାଶ କରିଛନ୍ତି। ଏଥିଲାଗି କେନ୍ଦ୍ରୀୟ ସମବାୟ ନିବନ୍ଧକଙ୍କ ଖାତାକୁ ୫ ହଜାର କୋଟି ଟଙ୍କା ସ୍ଥାନନ୍ତର କରାଯିବ। ସ୍ୱଚ୍ଛ ଏବଂ ପାରଦର୍ଶୀ ପ୍ରକ୍ରିୟାରେ ପ୍ରକୃତ ଜମାକାରୀଙ୍କୁ ଚିହ୍ନଟ ପରେ ଅର୍ଥ ଫେରସ୍ତ ଆରମ୍ଭ ହେବ। ସର୍ବୋଚ୍ଚ ନ୍ୟାୟାଳୟର ଅବସରପ୍ରାପ୍ତ ବିଚାରପତି ଆର୍.ସୁଭାଷ ରେଡ୍ଡୀଙ୍କୁ ଫେରସ୍ତ ପ୍ରକ୍ରିୟାର ତଦାରଖ ଦାୟିତ୍ୱ ନ୍ୟସ୍ତ ହୋଇଛି ଏବଂ ମାମଲାରେ ଅଦାଲତମିତ୍ର ଗୌରବ ଅଗ୍ରୱାଲ ସହାୟତା କରିବେ। କେନ୍ଦ୍ରୀୟ ସମବାୟ ନିବନ୍ଧକ ଉଭୟ ଅବସରପ୍ରାପ୍ତ ବିଚାରପତି ଆର ସୁଭାଷ ରେଡ୍ଡୀ ଏବଂ ଅଦାଲତମିତ୍ର ଗୌରବ ଅଗ୍ରୱାଲଙ୍କ ପରାମର୍ଶକ୍ରମେ ଫେରସ୍ତ ପ୍ରକ୍ରିୟା ଚୂଡ଼ାନ୍ତ କରିବାକୁ ନ୍ୟାୟାଳୟ ରାୟ ପ୍ରଦାନ କରିଛନ୍ତି। ଫେରସ୍ତ ପ୍ରକ୍ରିୟାରେ ସହାୟତା ଲାଗି ଅବସରପ୍ରାପ୍ତ ବିଚାରପତି ସୁଭାଷ ରେଡ୍ଡୀଙ୍କୁ ମାସିକ ୧୫ ଲକ୍ଷ ଏବଂ ଅଦାଲତମିତ୍ର ଗୌରବ ଅଗ୍ରୱାଲଙ୍କୁ ମାସିକ ୫ ଲକ୍ଷ ଟଙ୍କା ଭତ୍ତା ମିଳିବ। ଜମାକାରୀଙ୍କୁ ଅର୍ଥ ଫେରସ୍ତ ପରେ ବଳକା ରାଶି ପୁର୍ନବାର ସାହାରା-ସେବି ଫେରସ୍ତ ଖାତାକୁ ଯିବ ବୋଲି ନ୍ୟାୟାଳୟ ସ୍ପଷ୍ଟ କରିଛନ୍ତି।
Popular Categories
Previous article
Next article