ରେଙ୍ଗାଲି: ସମ୍ବଲପୁର ଜିଲା ରେଙ୍ଗାଲି ବ୍ଲକର ଲଇଡାରୁ ଜମନକିରା ବ୍ଲକର ଫାଶିମାଲ ଅଞ୍ଚଳକୁ ସଂଯୋଗ କରୁଥିବା ରାସ୍ତା ଅସରାଏ ବର୍ଷାରେ ସରୋବରର ଭ୍ରମ ସୃଷ୍ଟି କରୁଛି। ପୂର୍ତ୍ତ ବିଭାଗ ଅଧିନରେ ଥିବା ଏହି ରାସ୍ତାର ପୁନଃନିର୍ମାଣ ତଥା ନବୀକରଣ କାମ ପ୍ରାୟ ଦୁଇମାସ ହେଲା ଅଧାପନ୍ତରିଆରେ ଠପ୍ ହୋଇ ପଡିଛି। ଲଇଡାରୁ ନୂଆପାଲି ପର୍ଯ୍ୟନ୍ତ ଅସଂଖ୍ୟ ଖାଲଖମାରେ ପରିପୂର୍ଣ୍ଣ ହୋଇ ପଡିଥିବା ରାସ୍ତାରେ ଗମନାଗମନ ଦୁର୍ବିସହ ହେଉଛି। ଖାଲଖମା ରାସ୍ତା ଉପରେ ପୁରୁଣା ଚିପ୍ସ ମେଣ୍ଟାଲ୍ ଯାତ୍ରୀମାନଙ୍କ ପାଇଁ ସମସ୍ୟା ସୃଷ୍ଟି କରୁଥିବାବେଳେ ରାସ୍ତା ଉପରେ ଛୋଟ ବଡ ଗାଡ଼ିଆ ଆକୃତିର ଖାଲଖମାରେ ଲୋକେ ଦୁର୍ଘଟଣାର ସମ୍ମୁଖୀନ ହେଉଛନ୍ତି। ଏହି ରାସ୍ତାର ଭାଗିପାଲି ଗ୍ରାମର ଗୁଢାଲିବନ୍ଧ ବୁଲାଣିରେ କ୍ଷୁଦ୍ର ସରୋବର ଆକୃତିର ଖାଲରେ ବର୍ଷା ପାଣି ଜମା ହୋଇ ରହୁଥିବାରୁ ଏହା ସରୋବର ଭଳି ଦେଖାଯାଉଛି। ଏହି ରାସ୍ତା ଉପରେ ଶହଶହ ସ୍କୁଲ କଲେଜ ଛାତ୍ରଛାତ୍ରୀ ଏବଂ ନନେକ ଗ୍ରାମର ଜନସାଧାରଣ ଡାକ୍ତରଖାନା, ଥାନା, ତହସିଲ, ଜିଲା ସଦର ମହକୁମା ଆଦି ଗୁରୁତ୍ୱପୂର୍ଣ୍ଣ ସ୍ଥାନକୁ ଯାତାୟତ ପାଇଁ ନିର୍ଭର କରିଥାନ୍ତି। ରାସ୍ତା କାମ ଅଧା ପନ୍ତରିଆରେ ଛାଡି ଦେଇଥିବାରୁ ଲୋକେ ଘୋର ଅସୁବିଧାର ସମ୍ମୁଖୀନ ହେଉଛନ୍ତି। ଜନସାଧାରଣରେ ଏଥିଯୋଗୁ ତୀବ୍ର ଅସନ୍ତୋଷ ପ୍ରକାଶ ପାଉଛି। ପୂର୍ତ୍ତ ବିଭାଗ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଗୁରୁତ୍ବ ଦେଇ ଅସମ୍ପୂର୍ଣ୍ଣ କାମ ଶୀଘ୍ର ସମ୍ପୂର୍ଣ୍ଣ କରାଇ ରାସ୍ତାକୁ ଗମନାଗମନ ଉପଯୋଗୀ କରିବା ପାଇଁ ଦାବି ହେଉଛି।
Popular Categories
Previous article
Next article