ନୂଆଦିଲ୍ଲୀ : ଭାରତୀୟ ସାମାଜିକ ଗଣମାଧ୍ୟମ ପ୍ଲାଟଫର୍ମ Koo(କୁ) ବନ୍ଦ ହୋଇଯାଇଛି । କୁର ପ୍ରତିଷ୍ଠାତା ଅପ୍ରମେୟ ରାଧାକୃଷ୍ଣ ଏବଂ ମୟଙ୍କ ବିଦାଭତକା ଏନେଇ ଘୋଷଣା କରିଛନ୍ତି । ଏହି ଆପକୁ ମାଇକ୍ରୋ-ବ୍ଲଗିଂ ସାଇଟ୍ ଟ୍ବିଟରକୁ ଟକ୍କର ଦେବା ପାଇଁ ଲଞ୍ଚ୍ କରାଯାଇଥିଲା । ଅତ୍ୟାଧୁନିକ ପ୍ରଯୁକ୍ତିବିଦ୍ୟା ଖର୍ଚ୍ଚ ଭାର ଏବଂ ପାର୍ଟନରସିପ୍ ବିଫଳ ହେବା ଯୋଗୁଁ ‘କୁ’ ବନ୍ଦ ହେବାକୁ ଯାଉଛି ବୋଲି ପ୍ରତିଷ୍ଠାତା ସୂଚନା ଦେଇଛନ୍ତି । ପୂର୍ବରୁ ଏପ୍ରିଲ ୨୦୨୩ରେ ଅନେକ କର୍ମଚାରୀଙ୍କ ଛଟେଇ କରିଥିଲା କମ୍ପାନୀ ।
ନିର୍ମାତା କହିଛନ୍ତି କି ‘ବହୁତ କମ୍ ସମୟରେ ଆମେ ଟ୍ବିଟର ତୁଳନାରେ ଅଧିକ ଫିଚର୍ସ ଆଣିଥିଲୁ ଏବଂ ସାମାଜିକ ଗଣମାଧ୍ୟମ କ୍ଷେତ୍ରରେ ପ୍ରବେଶ କରିବା ପାଇଁ ଦୃରଦୃଷ୍ଟି ରଖିଥିଲୁ । ଆମ ଟିମ୍ ସବୁ ସମୟରେ ଏକାଠି କାମ କରିଛି । ଆମେ ବହୁତ ଭାଗ୍ୟଶାଳୀ କି ଏଭଳି ଦକ୍ଷ ଲୋକଙ୍କ ସହ ଆମେ କାମ କରିବାର ସୁଯୋଗ ପାଇଲୁ । ଏପର୍ଯ୍ୟନ୍ତ ଆପଣଙ୍କ ସମୟ, ଶୁଭକାମନା ଏବଂ ଭଲପାଇବା ପାଇଁ ଧନ୍ୟବାଦ ।‘
କହିରଖୁଛୁ ଦିନେ ‘କୁ’ରେ ପ୍ରାୟ ୨୧ ଲକ୍ଷ ଲୋକ ପ୍ରତିଦିନ ସକ୍ରିୟ ରହୁଥିଲେ । ମାସକୁ ୧ କୋଟି ୟୁଜର୍ସ ଏହାକୁ ବ୍ୟବହାର କରୁଥିଲେ ଯେଉଁଥିରୁ ୯ ହଜାରରୁ ଅଧିକ ଭିଆଇପି ସାମିଲ ଥିଲେ । ଏହି ସଫଳତା ପରେ ମଧ୍ୟ କମ୍ପାନୀ ଆର୍ଥିକ ସମସ୍ୟାର ସମ୍ମୁଖୀନ ହୋଇଚାଲିଥିଲା । କମ୍ପାନୀ ବାଧ୍ୟ ହୋଇ କର୍ମଚାରୀଙ୍କ ସଂଖ୍ୟା ହ୍ରାସ କରିବା ସହ କାମ ମଧ୍ୟ କମାଇଥିଲା । ଶେଷରେ ଏହାକୁ ବନ୍ଦ କରିବାକୁ ବାଧ୍ୟ ହୋଇଛନ୍ତି ପ୍ରତିଷ୍ଠାତା ।
ଡଃ ଜଷ୍ଟିସ ବିଦ୍ୟୁତ ରଞ୍ଜନ ଷଡ଼ଙ୍ଗୀ ହେଲେ ଝାଡଖଣ୍ଡ ହାଇକୋର୍ଟର ମୁଖ୍ୟ ବିଚାରପତି
