ରେଙ୍ଗାଲି : ପ୍ରଥମେ ହୀରାକୁଦ ନଦୀ ବନ୍ଧ ଯୋଜନାରେ ବିସ୍ଥାପିତ । ଏହାପରେ ହିଣ୍ଡାଲକୋ କୋଇଲା ଖଣି ଯୋଗୁଁ ବିସ୍ଥାପିତ । ପୁଣି ଏନ୍ଏଲ୍ସି କୋଇଲା ଖଣି ଯୋଗୁଁ ବିସ୍ଥାପିତ ହୋଇ ୨୦୧୬ ମସିହାରେ ପୁର୍ନ ବସତି ସ୍ଥାପନ କରିଥିବା ରେଙ୍ଗାଲି ବ୍ଳକ୍ ଖିଣ୍ଡା ଗ୍ରାମର ନୁଆଁ କଲୋନି ପଡାର ଅଧିବାସୀ ବିଜୁଳି ଆଲୁଅ ରୁ ବଞ୍ଚିତ ଅଛନ୍ତି। ଖଣିଖଦାନ ,କଳକାରଖାନାରେ ସମୃଦ୍ଧ ରେଙ୍ଗାଲି ଶିଳ୍ପାଞ୍ଚଳରେ ବିକାଶର ଏହା ଅସଲ ସ୍ୱରୂପ କି ବୋଲି ସଚେତନ ନାଗରିକ ମହଲରେ ପ୍ରଶ୍ନ ହେଉଛି। । ୨୦୧୬ ମସିହାରୁ କଲୋନୀ ପଡାରେ ବିଦ୍ୟୁତ୍ ସଂଯୋଗ ପାଇଁ ଅଧିବାସୀମାନେ ଅନେକ ଥର ଦାବି କରି ଆସୁଥିଲେ ମଧ୍ୟ କୌଣସି ଫଳ ମିଳୁ ନାହିଁ। ବିଦ୍ୟୁତ୍ ଲାଇନ୍ ନଥିବାରୁ ପଡାବାସୀ ଘୋର ଅସୁବିଧାର ସମ୍ମୁଖିନ ହେଉଛନ୍ତି। ନୁଆଁ କଲୋନୀ ପଡା ବାସିନ୍ଦାଙ୍କ ପାଇଁ ଲଣ୍ଠନ,ଡିବିରି ଆଲୁଅ ହିଁ ଭରସା। ଯଥାଶୀଘ୍ର ବିଦ୍ୟୁତ୍ ସଂଯୋଗର ବ୍ୟବସ୍ଥା କରିବା ପାଇଁ ୯ ତାରିଖ ମଙ୍ଗଳବାର ଦିନ କଲୋନୀପଡାର ଏକ ମହିଲା ପ୍ରତିନିଧି ଦଳ ରେଙ୍ଗାଲି ବିଡିଓ ଙ୍କୁ ସାକ୍ଷାତ କରି ଲୀଖିତ ଦାବିପତ୍ର ପ୍ରଦାନ କରିଥିବାର ଜଣାପଡିଛି। ଉଲ୍ଲାସ ରୋହିଦାସ, ଭୁମିସୂତା ରୋହିଦାସ, ସୁଜାତା ରୋହିଦାସ, ଶାନ୍ତି ରୋହିଦାସ ପ୍ରମୁଖ ବହୁ ସଂଖ୍ୟକ ଆଦିବାସୀ ଉକ୍ତ ଦାବିପତ୍ରରେ ସ୍ୱାକ୍ଷର କରିଛନ୍ତି।। ବିଜୁଳି ଯୋଗାଉ ଥିବା ହିରାକୁଦ ନଦୀବନ୍ଧ ଯୋଜନାର ବିଶାଳ ଜଳଭଣ୍ଡାର ଖିଣ୍ଡା ଗ୍ରାମ ପାଖରେ ଅଛି। ଚତୁଃପାଶ୍ୱର୍ ବହୁରାଷ୍ଟ୍ରିୟ କମ୍ପାନୀର କଳକାରଖାନା, ଖଣି ଖାଦାନର ବିଜୁଳି ଆଲୁଅରେ ଝଲସି ଉଠୁଛି । କିନ୍ତୁ ବିଡମ୍ବନାର ବିଷୟ ଯେ ଦୀପ ତଳ ଅନ୍ଧାର ଭଳି ଖିଣ୍ଡା ନୁଆଁ କଲୋନୀ ପଡାରେ ବିଦ୍ୟୁତ୍ ସଂଯୋଗ ନାହିଁ । ପ୍ରଶାସନିକ ଅଧିକାରୀମାନେ ଏଥି ପ୍ରତି ଗୁରୁତ୍ୱ ଦେଇ ଶିଘ୍ର ବିଦ୍ୟୁତ୍ ସଂଯୋଗ ବ୍ୟବସ୍ଥା କରିବାକୁ ଦାବି ହେଉଛି।
Comments are closed.