ରେଙ୍ଗାଲି: ରେଙ୍ଗାଲି ତହସିଲ କାର୍ଯ୍ୟାଳୟର ସଭାଗୃହରେ ତହସିଲଦାରଙ୍କ ସଭାପତିତ୍ବରେ ଏନ୍ଏଲସି କୋଇଲା ଖଣି ପରିବହନ ନେଇ ଏକ ବୈଠକ ଅନୁଷ୍ଠିତ ହୋଇଯାଇଛି। ଏବେ କୋଇଲା ପରିବହନ ନେଇ ଅନିଶ୍ଚିତତା ଦେଖାଦେଇଥିବାବେଳେ ଏହାର ସମାଧାନ ପାଇଁ ଅନୁଷ୍ଠିତ ତ୍ରିପାକ୍ଷିକ ବୈଠକ ଉପାଦେୟ ସାବ୍ୟସ୍ତ ହେବ ବୋଲି ଆଶା କରାଯାଉଛି।
ବୈଠକରେ ବିଧାୟକ ନାଉରୀ ନାଏକ, ଖିଣ୍ଡା ସରପଞ୍ଚ ନୀଳାବତୀ ଓରାମ, ଜିଲା ପରିଷଦ ସଭ୍ୟ ତିରୋଜ ହେଡେଞ୍ଜା, ସାଂସଦ ପ୍ରତିନିିଧ ଯୁଗଳ କିଶୋର ଅଗ୍ରୱାଲ, କର୍ମଜୀବି ସଙ୍ଗଠନର ଆବାହକ ହେମନ୍ତ କୁମାର ପାଣ୍ତେ, ଆଇଆଇସି ପ୍ରକାଶ କୁମାର କର୍ଣ୍ଣ, ଏଲ୍ସି ସିଡିଏମ୍ ସୁରେଶ ସୁମନ ଏବଂ ଅଦାନି କମ୍ପାନୀର ଉପ ସଭାପତି ପ୍ରଶନ୍ନ କୁମାର ପଣ୍ତା ଉପସ୍ଥିତ ଥିଲେ। ସମସ୍ତଙ୍କ ସହମତିରେ ତଲାବିରା ୨ ଓ ୩ କୋଇଲାଖଣିରେ କାର୍ଯ୍ୟରତ ସମସ୍ତ ୧୩୭ ଜଣ ଜମିହରାମାନଙ୍କୁ ଆଗାମୀ ୨୧ ଦିନ ମଧରେ ଅଦାନୀ କମ୍ପାନୀ ମାଧ୍ୟମରେ ସ୍ଥାୟୀ ନିଯୁକ୍ତି ଦେବା ପ୍ରକ୍ରିୟା ଆରମ୍ଭ କରାଯିବ ବୋଲି ନିଷ୍ପତ୍ତି ନିଆଯାଇଛି । ଆଦାନୀ କମ୍ପାନୀ ଆଗରୁ ୨୮ ଜଣ ଜମିହରାମାନଙ୍କୁ ନିଯୁକ୍ତି ପତ୍ର ପ୍ରଦାନ କରି ସାରିଛି। କୋଇଲା ପରିବହନ ପାଇଁ ଆବଶ୍ୟକ କରୁଥିବା ୱେବ ବ୍ରିଜ ଅପରେଟର କିମ୍ବା ଅନୁସାଙ୍ଗିକ ପଦବୀ ଗୁଡିକ ଜମିହରା ମାନଙ୍କୁ ଯୋଗ୍ୟତା ଭିତ୍ତିରେ ତୁରନ୍ତ ନିଯୁକ୍ତି ଦେବା ପାଇଁ କମ୍ପାନୀ ଅଧିକାରୀ ରାଜି ହୋଇଥିଲେ। ତଲାବିରା ୨ ଓ ୩ କୋଇଲଖଣିରେ ଆଗାମୀ ଦିନରେ ଆବଶ୍ୟକ ଥିବା ପଦବୀ/ଚାକିରି ଗୁଡିକ ଯୋଗ୍ୟତା ଭିତ୍ତିରେ ଜମିହରାମାନଙ୍କୁ ଯୋଗାଇ ଦେବା ପାଇଁ ନିଷ୍ପତ୍ତି ନିଆଯାଇଛି। ଆଗାମୀ ଦିନରେ କମ୍ପାନୀରେ ଖାଲି ହେବାକୁ ଥିବା ପଦବୀ ଗୂଡିକ ଅତି କମ୍ରେ ଏକ ମାସ ପୂର୍ବରୁ ଗ୍ରାମ ପଞ୍ଚାୟତ ଅଫିସ ଖିଣ୍ତା ଓ ତହସିଲ କାର୍ୟ୍ୟାଳୟ ରେଙ୍ଗାଲି ଙ୍କୁ ଲିଖିତ ଭାବରେ ଅବଗତ କରାଇବା ପାଇଁ ସର୍ବ ସମ୍ମତି କ୍ରମେ ପ୍ରସ୍ତାବ ଗ୍ରହଣ କରାଯାଇଥିଲା। ନିଯୁକ୍ତିରେ ପ୍ରକ୍ରିୟାରେ ପାରଦର୍ଶିତା ପାଇଁ ପୁଣି ପିଡିଏଫ୍ ଓ ଜମିହରାମାନଙ୍କୁ ନୂତନ ଭାବରେ ତାଳିକା ପ୍ରସ୍ତୁତ କରିବା ପାଇଁ ପ୍ରସ୍ତାବ ଗ୍ରହଣ କରାଯାଇଥିଲା। ଯେଉଁ ସଂସ୍ଥା କିମ୍ବା କମ୍ପାନୀ ତଲବିରା ୨ ଓ ୩ କୋଇଲାଖଣିରୁ କୋଇଲା ପରିବହନ କରିବ ଆଇନ ଶୃଙ୍ଖଳା ବଜାୟ ରଖିବା ପାଇଁ ବାଧ୍ୟ । କର୍ମଜୀବୀ ଏକତା ସଂଗଠନ ତରଫରୁ ଦୀର୍ଘ ଦିନରୁ ଚାଲିଥିବା ଧାରଣାକୁ ସାମୟିକ ଭାବରେ ସ୍ଥଗିତ କରାଯିବା ପାଇଁ ତହସିଲଦାର ଅନୁରୋଧ କରିଥିଲେ। ତାଙ୍କ ଅନୁରୋଧକୁ ସମ୍ମାନ ଜଣାଇ ରେଙ୍ଗାଲି ବିଧାୟକ ଏବଂ ଖିଣ୍ତା ସରପଞ୍ଚଙ୍କ ଉପସ୍ଥିତିରେ ଜଟିଆପିପଲ ଠାରେ ଚାଲୁଥିବା ରିଲେ ଅନଶନକୁ ଆସନ୍ତା ୯ ତାରିଖ ପର୍ଯ୍ୟନ୍ତ ସ୍ଥଗିତ ରଖାଯାଇଛି ବୋଲି ସଂଗଠନ ତରଫରୁ ସୂଚନା ଦିଆଯାଇଛି।
Comments are closed.