ଏଣିକି ଓଲା ସ୍କୁଟରରେ ମିଳିବ ଅଲଗା ହୋଇପାରୁଥିବା ବ୍ୟାଟେରୀ, କେଉଁଠି ବି କରିପାରିବେ ଚାର୍ଜ
ନୂଆଦିଲ୍ଲୀ : ଦେଶର ଇଲେକ୍ଟ୍ରିକ୍ ଦୁଇଚକିଆ ଯାନ ନିର୍ମାତା କମ୍ପାନୀମାନଙ୍କ ତାଲିକାରେ ବହୁ ଆଗରେ ଅଛି ଓଲା ଇଲକ୍ଟ୍ରିକ୍ । କମ୍ପାନୀ ପାଖରେ ପ୍ରାୟ ୪୦ ପ୍ରତିଶତ ବଜାର ଭାଗିଦାରୀ ରହିଛି । ପ୍ରତି ମାସରେ ୩୦ରୁ ୩୫ ହଜାର ୟୁନିଟ୍ ଗାଡି ବିକ୍ରି ହେଉଛି । କମ୍ପାନୀ ଅନେକ ଫିଚର୍ସ ବିଶିଷ୍ଟ ଗାଡି ବଜାରକୁ ଆଣୁଛି ଏବଂ ବ୍ୟାଟେରୀ ଉପରେ ୮ ବର୍ଷର ଓ୍ବାରେଣ୍ଟି ମଧ୍ୟ ଦେଉଛି । ଏବେ କମ୍ପାନୀ ରିମୁଭେବଲ ବ୍ୟାଟେରୀକୁ ପେଟେଣ୍ଟ କରାଇଛି । ଅର୍ଥାତ୍ ଆଗାମୀ ଦିନରେ କମ୍ପାନୀ ନିଜ ଗାଡିରେ ରିମୁଭେବଲ ବ୍ୟାଟେରୀ ବିଶିଷ୍ଟ ମଡେଲର ବଜାର ପ୍ରବେଶ କରିପାରେ ।
କମ୍ପାନୀ ରିମୁଭେବଲ ବା ଗାଡିରୁ ଅଲଗା ହୋଇପାରୁଥିବା ବ୍ୟାଟେରୀ ସାହାଯ୍ୟରେ ଗାଡି ଚାର୍ଜକୁ ଅଧିକ ସରଳ କରାଇବାକୁ ଚାହୁଁଛି । ଏଣିକି ଲୋକଙ୍କୁ ନିଜ ଇଲେକ୍ଟ୍ରିକ୍ ସ୍କୁଟର ଚାର୍ଜ କରାଇବା ପାଇଁ ଚାର୍ଜିଂ ଷ୍ଟେସନ ବା ପ୍ଲଗ୍ ପଏଣ୍ଟ ଖୋଜିବାକୁ ପଡିବନି । କିମ୍ବା ଗାଡି ସହିତ ଲମ୍ବା ଚାର୍ଜର ଧରି ବୁଲିବାକୁ ପଡିବନି । ଅର୍ଥାତ୍ ଆଗାମୀ ଦିନରେ ଚାର୍ଜିଂ ସମ୍ପର୍କିତ ଅନେକ ସମସ୍ୟାଦୂର ହେବ ।
ଓଲା ବିଶ୍ବର ସବୁଠାରୁ ବଡ ସେଲ୍ ଉତ୍ପାଦନ ଫ୍ୟାକ୍ଟ୍ରି ମଧ୍ୟ ଲଗାଉଛି । ଆଶା କରାଯାଉଛି କି କମ୍ପାନୀ ନୂଆ ବ୍ୟାଟେରୀର ଉତ୍ପାଦନ ନିଜ ପ୍ଲାଣ୍ଟରେ ହିଁ କରିପାରେ । ଏହି ବ୍ୟାଟେରୀର ଉତ୍ପାଦନ ଆଗାମୀ ମଡେଲ ପାଇଁ କରାଯାଇପାରେ । ଏବେ ବଜାରରେ ଓଲା ସ୍କୁଟରକୁ ଟକ୍କର ଦେଉଥିବା ମଡେଲରେ ଭିଡା ଭିଓ୍ବାନ୍ ଏକ ମାତ୍ର ମଡେଲ ଯାହା ରିମୁଭେବଲ ବ୍ୟାଟେରୀ ସହିତ ଆସୁଛି । ଅନ୍ୟ କମ୍ପାନୀ ଯଥା ଏଥର, ଟିଭିଏସ୍, ବଜାଜ ଆଦିରେ ଫିକ୍ସ ବ୍ୟାଟେରୀ ମିଳୁଛି ।
Comments are closed.