ନୂଆଦିଲ୍ଲୀ: ସଲମନ ରୁଶ୍ଦିଙ୍କ ବିବାଦୀୟ ପୁସ୍ତକ ‘ଦି ସାଟାନିକ୍ ଭର୍ସେସ୍’ ଏବେ ଭାରତରେ କ୍ରୟ ନିମନ୍ତେ ଉପଲବ୍ଧ ହୋଇଛି। ଦିଲ୍ଲୀର ‘ବାରିସନ୍ସ ବୁକ୍ସେଲର୍ସ’ ପୁସ୍ତକ ଭଣ୍ଡାରରେ ଏହାକୁ ବିକ୍ରି କରାଯାଉଛି। ବହିର ମୂଲ୍ୟ ୧୯୯୯ ଟଙ୍କା। ପୁସ୍ତକ ବହୁଳ ମାତ୍ରାରେ ବିକ୍ରି ହେଉଥିବା ଦୋକାନ ମାଲିକ ରଜନୀ ମାଲହୋତ୍ରା କହିଛନ୍ତି। ୧୯୮୮ରେ ରାଜୀବ ଗାନ୍ଧୀଙ୍କ ନେତୃତ୍ବାଧୀନ କେନ୍ଦ୍ର ସରକାର ଏହି ପୁସ୍ତକର ଆମଦାନୀ ଓ ବିକ୍ରିକୁ ନିଷିଦ୍ଧ କରିଥିଲେ। ମୁସଲମାନ ମୌଳବାଦୀଙ୍କ ପ୍ରତିବାଦ କାରଣରୁ ସରକାର ପୁସ୍ତକର ବିକ୍ରି ଉପରେ କଟକଣା ଲାଗୁ କରିଥିଲେ। ରୁଶ୍ଦିଙ୍କ ଏହି ପୁସ୍ତକକୁ ବିଶ୍ବର ମୁସଲମାନ ସଂଗଠନଗୁଡିକ ବିରୋଧ କରିଥିଲେ। ପୁସ୍ତକର ଆମଦାନୀ ଉପରେ ଲାଗୁ କଟକଣାକୁ ଚାଲେଞ୍ଜ କରି ଦିଲ୍ଲୀ ହାଇକୋର୍ଟରେ ପିଟିସନ ଦାୟର କରାଯାଇଥିଲା। ପିଟିସନର ଶୁଣାଣି ସମୟରେ କର୍ତ୍ତୃପକ୍ଷ ୧୯୮୮ରେ ଲାଗୁ ନିଷେଧାଦେଶ ସମ୍ପର୍କିତ ସରକାରୀ ବିଜ୍ଞପ୍ତି କିମ୍ବା ଏହାର ନକଲ ଉପସ୍ଥାପନ କରିବାରେ ବିଫଳ ହୋଇଥିଲେ। ଫଳରେ ଅଦାଲତ ପୁସ୍ତକର ଆମଦାନୀ ଓ ବିକ୍ରିକୁ ଅନୁମତି ପ୍ରଦାନ କରିଥିଲେ। ନଭେମ୍ବର ୫ରେ ହାଇକୋର୍ଟ ବିଚାରପତି ରେଖା ପାଲ୍ଲି ଓ ସୌରଭ ବାନାର୍ଜୀ ଏହି ଅନୁମତି ପ୍ରଦାନ କରିଥିଲେ। ଭାରତ ଜନ୍ମିତ ବ୍ରିଟେନ ଔପନ୍ୟାସିକ ନିଜର ରାଜନୈତିକ ଓ ଧାର୍ମିକ ବିଶ୍ବାସକୁ ନେଇ ବିବାଦୀୟ ହୋଇପଡିଥିଲେ। ୧୯୪୭ ଜୁନ୍ ୧୯ରେ ସେ ମୁମ୍ବଇରେ ଜନ୍ମ ଗ୍ରହଣ କରିଥିଲେ। ତାଙ୍କ ପିତାମାତା କାଶ୍ମୀର ମୁସଲମାନ ଥିଲେ। ତାଙ୍କର ଭାରତୀୟ ନାଗରିକତ୍ବ ୧୯୬୪ରେ ରଦ୍ଦ କରାଯାଇଥିଲା। ଏବେ ତାଙ୍କ ପାଖରେ ଆମେରିକା ଓ ବ୍ରିଟେନର ନାଗରିକତ୍ବ ରହିଛି। ରୁଶ୍ଦି ୪ଥର ବିବାହ କରିଥିଲେ। ୨୦୨୨ ଅଗଷ୍ଟରେ ନ୍ୟୁୟର୍କର ଏକ କାର୍ୟ୍ୟକ୍ରମରେ ତାଙ୍କ ଉପରେ ଆକ୍ରମଣ ହୋଇଥିଲା। ଏଥିରେ ସେ ତାଙ୍କର ବାମ ଆଖି ହରାଇଥିଲେ।
Comments are closed.