ନୂଆଦିଲ୍ଲୀ : ୨୦୧୩ରେ କେଦାରନାଥରେ ଘଟିଥିବା ପ୍ରଳୟଙ୍କରୀ ବନ୍ୟା ପରେ ଚଳିତବର୍ଷ ଉତ୍ତର ଭାରତରେ ଏପର୍ଯ୍ୟନ୍ତ ସର୍ବାଧିକ ବର୍ଷା ରେକର୍ଡ କରାଯାଇଛି, ଯାହା ସ୍ୱାଭାବିକ ଠାରୁ ୨୧% ଅଧିକ। ତେବେ ଚିନ୍ତାର ବିଷୟ ହେଉଛି ୨୦୨୧ ମସିହାରେ ଭାରତୀୟ ପାଣିପାଗ ବିଭାଗ (ଆଇଏମଡ଼ି) ଏହି ତଥ୍ୟ ସଂଗ୍ରହ ଆରମ୍ଭ କରିବା ପରଠାରୁ ଅଗଷ୍ଟରେ ଉତ୍ତର ଭାରତରେ ସର୍ବାଧିକ ବର୍ଷା ହୋଇଥିବା ରେକର୍ଡ କରାଯାଇଛି।
ଅଗଷ୍ଟ ୨୫ ତାରିଖ ପର୍ଯ୍ୟନ୍ତ ଉତ୍ତର ଭାରତରେ ୨୧ଟି ବଡ ବର୍ଷା ହୋଇଛି। ଗତ ବର୍ଷ ରେକର୍ଡ କରାଯାଇଥିବା ସର୍ବାଧିକ ୧୪ଟି ବର୍ଷା ଅପେକ୍ଷା ଏହା ୫୦% ଅଧିକ। ଚଳିତ ମାସ ଶେଷ ସୁଦ୍ଧା ବର୍ଷା ପରିମାଣ ଆହୁରି ବୃଦ୍ଧି ପାଇବାର ସମ୍ଭାବନା ରହିଛି, ଯାହା ହୁଏତ ସବୁଠାରୁ ଅଧିକ ଧ୍ବଂସଲୀଳା ସୃଷ୍ଟି କରିପାରେ। ଭାରତୀୟ ପାଣିପାଗ ବିଭାଗ ଦ୍ବାରା ‘ଅତି ପ୍ରବଳ’ ସତର୍କତା ଜାରି କରିବା ହେଉଛି ରେକର୍ଡ କରାଯାଇଥିବା ଦୈନିକ ବର୍ଷାର ସର୍ବୋଚ୍ଚ ସ୍ତର ଯାହା ୨୪ ଘଣ୍ଟା ମଧ୍ୟରେ ୨୦୪.୪ ମିମିରୁ ଅଧିକ। ୨୦୧୩ ପରେ, ଚଳିତ ମୌସୁମୀ ଋତୁରେ ଭାରତର ୪ଟି ଅଞ୍ଚଳ ମଧ୍ୟରୁ ଉତ୍ତର ଭାରତରେ ଜୁନ୍, ଜୁଲାଇ ଏବଂ ଅଗଷ୍ଟ ମାସରେ ଏପର୍ଯ୍ୟନ୍ତ ଅଧିକ ବର୍ଷା ହୋଇଥିବା ରେକର୍ଡ କରାଯାଇଛି। ଭାରତୀୟ ପାଣିପାଗ ବିଭାଗ ମୁଖ୍ୟ ମୃତ୍ୟୁଞ୍ଜୟ ମହାପାତ୍ର କହିଛନ୍ତି, ଗତ ଦୁଇ ମାସ ମଧ୍ୟରେ, ଉତ୍ତର-ପଶ୍ଚିମ ଭାରତରେ ଅଧିକ ବର୍ଷା ହୋଇଛି କାରଣ ମୁଖ୍ୟତଃ ବଙ୍ଗୋପସାଗର ଏବଂ ଅନେକ ସମୟରେ ଆରବ ସାଗରରୁ ପଶ୍ଚିମା ବାୟୁ ଏବଂ ମୌସୁମି ଧାରା ମଧ୍ୟରେ ବାରମ୍ବାର ପାରସ୍ପରିକ କ୍ରିୟା ହୋଇଥାଏ। ଯେତେବେଳେ ଏହି ଦୁଇଟି ସ୍ରୋତ ସେହି ଅଞ୍ଚଳ ଉପରେ ମିଶିଥାଏ, ସେତେବେଳେ ପ୍ରବଳରୁ ଅତି ପ୍ରବଳ ବର୍ଷା ହୋଇଥାଏ।
ଉତ୍ତର ଭାରତ ହେଉଛି ଏକ ପାଣିପାଗ କ୍ଷେତ୍ର ଯେଉଁଥିରେ ଜାମ୍ମୁ କାଶ୍ମୀର, ଲଦାଖ, ହିମାଚଳ ପ୍ରଦେଶ, ଉତ୍ତରାଖଣ୍ଡ, ପଞ୍ଜାବ, ହରିୟାଣା, ଦିଲ୍ଲୀ, ଉତ୍ତରପ୍ରଦେଶ ଏବଂ ରାଜସ୍ଥାନ ଅନ୍ତର୍ଭୁକ୍ତ। ଡଃ ମହାପାତ୍ର କହିଛନ୍ତି ଯେ ଉତ୍ତର ଭାରତରେ ଅଧିକାଂଶ ବର୍ଷା ଜନିତ ଘଟଣା ଦୁଇଟି ପାହାଡ଼ି ରାଜ୍ୟ ଏବଂ ଜାମ୍ମୁ କାଶ୍ମୀର କେନ୍ଦ୍ରଶାସିତ ଅଞ୍ଚଳରେ ଘଟିଛି। ଏହି ଅଞ୍ଚଳର ହୋଇଥିବା ଅତ୍ୟଧିକ ବର୍ଷା ତଥ୍ୟରୁ ଜଣାପଡିଛି ଯେ ଗତ ବର୍ଷ ଅଗଷ୍ଟ ମାସରେ ୬୪.୪ଋ ୧୧୫.୫ ମିମି ପ୍ରବଳ ବର୍ଷା ଓ ୧୧୫.୫ଋ ୨୦୪.୪ ମିମି ଅତି ପ୍ରବଳ ବର୍ଷା ହୋଇଥିଲା। କିନ୍ତୁ ଚଳିତ ବର୍ଷ ଅଗଷ୍ଟ ତୁଳନାରେ ଏହା କମ୍ ଥିଲା। ୧୯୯୬ ମସିହାରୁ ୨୮ ବର୍ଷ ମଧ୍ୟରେ ଗତବର୍ଷ ଉତ୍ତର ଭାରତରେ ଅଗଷ୍ଟ ମାସ ସବୁଠାରୁ ଅଧିକ ଆର୍ଦ୍ର ରହିଥିବା ରିପୋର୍ଟ କରାଯାଇଥିଲା। ସମଗ୍ର ଅଞ୍ଚଳରେ ୨୫୬.୪ ମିମି ବର୍ଷା ହୋଇଥିଲା। ଚଳିତ ମାସରେ ଏପର୍ଯ୍ୟନ୍ତ ଅର୍ଥାତ ଅଗଷ୍ଟ ୨୬ ପର୍ଯ୍ୟନ୍ତ ୨୦୯.୪ ମିମି ବର୍ଷା ରେକର୍ଡ କରାଯାଇଛି। ଡଃ ମହାପାତ୍ର କହିଛନ୍ତି, ପୂର୍ବ ପାକିସ୍ତାନରେ ଏକ ଟ୍ରଫ୍ ଲାଇନ ସୃଷ୍ଟି ହେବା ଯୋଗୁଁ, ଗତ ଚାରି ଦିନ ମଧ୍ୟରେ ଏହି ଅଞ୍ଚଳରେ ପ୍ରବଳ ବର୍ଷା ହୋଇଛି। ଏହି ବର୍ଷା ଆଉ ଗୋଟିଏ କିମ୍ବା ଦୁଇ ଦିନ ଜାରି ରହିବାର ସମ୍ଭାବନା ଥିବା ସେ କହିଛନ୍ତି। ଚଳିତ ମୌସୁମି ଋତୁରେ ଉତ୍ତର ଭାରତରେ ଗତ ତିନି ଦିନ ସବୁଠାରୁ ଅଧିକ ବର୍ଷା ହୋଇଛି। କେବଳ ଅଗଷ୍ଟ ୨୫ ତାରିଖରେ ୨୧.୮ ମିମି ବର୍ଷା ହୋଇଛି, ଯାହା ସାଧାରଣତଃ ୫.୬ ମିମି ବର୍ଷା ଅପେକ୍ଷା ଚାରି ଗୁଣ ଅଧିକ।
