ପାଟଣା : ଏକ କିମ୍ବା ଦୁଇ କିଲୋମିଟର ନୁହେଁ ଯିବା ଆସିବା ପୁରା ୨୪ କିଲୋମିଟର ହେଉଛି । ତଥାପି ଏହାକୁ ଭୃକ୍ଷେପ ନାହିଁ । ସକାଳ ୬ ଟାରେ ସେ ମୁହଁରେ ମାସ୍କ ଲଗାଇ ବାଇକ ଧରି ଢେଙ୍କିକୋଟ ବଜାରକୁ ଆସୁଛନ୍ତି ତାଙ୍କରି ପ୍ରିୟ ‘ସମାଜ‘ ଖବର କାଗଜ ଖଣ୍ଡିଏ ପାଇଁ । ଲକଡାଉନ କାରଣରୁ ଯାନବାହାନ ବନ୍ଦ ଯୋଗୁଁ ପିପିଳିଆର ବିତରକ ଖବର କାଗଜ ବିତରଣ ବନ୍ଦ କରି ଦେଇଛନ୍ତି । ଘଟଗାଁ ବ୍ଲକ ପିପିଳିଆର ଅବସରପ୍ରାପ୍ତ ଶିକ୍ଷାବିଭାଗ କର୍ମଚାରୀ ତଥା ଜଣାଶୁଣା ସାମାଜିକ କର୍ମୀ ଜଗବନ୍ଧୁ ମହାନ୍ତ (୬୨) ଙ୍କୁ କିଛି ଦିନ ହେଲା ପିପିଳିଆରେ ସମାଜ ମିଳିପାରୁ ନ ଥିବାରୁ ସେ ବାଧ୍ୟ ହୋଇ ନିଜ ଘର ନିକଟରୁ ୧୨କିଲୋମିଟର ଦୂର ଢେଙ୍କିକୋଟ ବଜାରକୁ ଆସି ସମାଜ ଖଣ୍ଡିଏ ନେଇ ଘରକୁ ଫେରିବା ପରେ ଘରେ ନିତ୍ୟକର୍ମ କରୁଥିବା ଜଣାପଡିଛି । କୌଣସି କାରଣରୁ ସମାଜର ପ୍ରକାଶନ ବନ୍ଦ ଅଥବା ଛୁଟି ଯୋଗୁଁ ସମାଜ ଆସି ନଥିବା ଦିନ ତାଙ୍କୁ ପାଗଳପ୍ରାୟ ଲାଗେ ବୋଲି ଜଗବନ୍ଧୁ ଆମ ପ୍ରତିନିଧିଙ୍କୁ କହିଛନ୍ତି । ମାତ୍ର ୧୫ ବର୍ଷ ବୟସରୁ ସେ ସମାଜର ଜଣେ ନିୟମିତ ପାଠକ ହୋଇଥିବା ପ୍ରକାଶ କରିବା ସହ ଦେଶର ଏହି ଘଡିସନ୍ଧି ମୂହୂର୍ତରେ ସମାଜର ପ୍ରକାଶନ ଅବ୍ୟାହତି ରହିଥିବାରୁ ସେ ସମାଜ କର୍ତୃପକ୍ଷଙ୍କୁ ଅଭିନନ୍ଦନ ଜଣାଇଛନ୍ତି ।
Comments are closed.