ଅଯୋଧ୍ୟା : ରାମଭକ୍ତମାନେ ମନଖୋଲା ରାମଲାଲାଙ୍କ ଦରବାରରେ ଦାନ କରୁଥିବା ଖବର ସାମ୍ନାକୁ ଆସିଛି। ଉଭୟ ଅନ୍ଲାଇନ ଓ ଅଫ୍ଲାଇନରେ ଭକ୍ତମାନେ ଏହି ଦାନ କରୁଛନ୍ତି। ଜାନୁଆରୀ ୨୩ ଠାରୁ ରାମଲାଲାଙ୍କୁ ସର୍ବସାଧାରଣ ଦର୍ଶନ କରୁଛନ୍ତି ଓ ଲକ୍ଷାଧିକ ଭକ୍ତଙ୍କ ସମାଗମ ହେଉଥିବା ଦେଖିବାକୁ ମିଳୁଛି। ସେବେ ଠାରୁ ଆଜି ପର୍ଯ୍ୟନ୍ତ ପ୍ରାୟ ୧୧ ଦିନ ମଧ୍ୟରେ ରାମଲାଲାଙ୍କ ନିକଟରେ ପ୍ରାୟ ୧୨ କୋଟି ଟଙ୍କା ଦାନ ହୋଇଛି। ରାମଲାଲାଙ୍କ ପ୍ରାଣ ପ୍ରତିଷ୍ଠା ଅର୍ଥାତ ୨୨ ଜାନୁଆରୀରେ ସମାରୋହରେ ପହଞ୍ଚିଥିବା ପ୍ରାୟ ୮ ହଜାର ଅତିଥି ଦାନ ଦେଇଛନ୍ତି।
ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସହ ଅନେକ ବିଜେପି ବିଧାୟକ ୧୧ ଫେବ୍ରୁଆରୀରେ ରାମଲାଲାଙ୍କୁ ଦର୍ଶନ କରିବେ।
ନବନିର୍ମିତ ରାମମନ୍ଦିରର ବାର୍ଷିକ ଉତ୍ସବ ତାଲିକା ପ୍ରସ୍ତୁତ ହୋଇ ସାରିଛି। ନୂଆ ମନ୍ଦିରରେ ପ୍ରଥମ ଉତ୍ସବ ରୂପେ ୧୪ ଫେବ୍ରୁଆରୀରେ ବସନ୍ତ ପଞ୍ଚମୀ ପାଳନ କରାଯିବ। ମା’ସରସ୍ୱତୀଙ୍କୁ ଏହିଦିନ ପୂଜାର୍ଚ୍ଚନା କରାଯିବ। ସାଂସ୍କୃତିକ କାର୍ଯ୍ୟକ୍ରମ ହେବ। ବର୍ଷସାରା ରାମଙ୍କ ମନ୍ଦିରରେ ପ୍ରାୟ ୧୨ ପ୍ରମୁଖ ଉତ୍ସବ ତଥା ପର୍ବ ପାଳନ କରାଯିବ।
