ରାମନାଗୁଡା: କରୋନା କାଳର ମାନବିକତା ହଜିଯାଉଥିବାବେଳେ ଆକ୍ରାନ୍ତଙ୍କ ନିଜ ସଂପର୍କୀୟ ମଧ୍ୟ ସହଯୋଗର ହାତ ବଢାଉନାହାନ୍ତି। ଏଭଳି ସମୟରେ ରାୟଗଡ଼ା ଜିଲା ରାମନାଗୁଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଡାକ୍ତର ଓ ତାଙ୍କର ସହଯୋଗୀମାନେ ଜଣେ କରୋନା ଆକ୍ରାନ୍ତ ପ୍ରସୂତିଙ୍କ ପ୍ରସବ କରାଇଥିଲେ। ପ୍ରସୂତିଜଣକ ସୁରକ୍ଷିତ ଭାବେ ଏକ କନ୍ୟା ସନ୍ତାନ ଜନ୍ମ ଦେଇଥିଲେ। ଏହି ଘଟଣା ଡାକ୍ତରଙ୍କ ମହାନତାକୁ ପ୍ରମାଣିତ କରିଛି।
ସୂଚନା ଅନୁଯାୟୀ ରାୟଗଡ଼ା ଜିଲା ଗୁଡାରୀ ବ୍ଲକ ଅସଡା ସିତମଗୁଡା ଗ୍ରାମର ମଞ୍ଜୁଳା ପଣ୍ଡା(୨୮) ଗତକିଛିଦିନ ତଳେ କରୋନାରେ ଆକ୍ରାନ୍ତ ହୋଇଥିଲେ। ମଞ୍ଜୁଳା କରୋନା ପଜିଟିଭ୍ ହୋଇଥିବାବେଳେ ପ୍ରସବ ତାରିଖ ପାଖେଇ ଆସୁଥିବାରୁ ସନ୍ତାନ ଜନ୍ମ ନେଇ ଚିନ୍ତାରେ ରହିଥିଲେ। ଏନେଇ ମଞ୍ଜୁଳାଙ୍କ ବାପା ବିଶ୍ବନାଥ ପଣ୍ଡା ରାମନାଗୁଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ କାର୍ଯ୍ୟରତ ଡାକ୍ତରଙ୍କ ସହ ଯୋଗାଯୋଗ କରିଥିଲେ। ମଞ୍ଜୁଳାଙ୍କୁ ରାୟଗଡ଼ା ମୁଖ୍ୟଡାକ୍ତରଖାନା ନେବାପାଇଁ ନିଷ୍ପତ୍ତି ନିଆଯାଇଥିଲା। ତେବେ ଆଜି ମଧ୍ୟାହ୍ନ ୧୨ଟା ସମୟରେ ରାମନାଗୁଡା ନିକଟରେ ମଞ୍ଜୁଳାଙ୍କ ପ୍ରସବ ବେଦନା ହେବାକ୍ଷଣି ସଙ୍ଗେସଙ୍ଗେ ତାଙ୍କୁ ରାମନାଗୁଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପ୍ରସବ କକ୍ଷରେ ଭର୍ତ୍ତି କରାଯାଇଥିଲା ଏବଂ ସେଠାରେ ମଞ୍ଜୁଳାଙ୍କ ଅସ୍ତ୍ରୋପଚାର କରାଯାଇଥିଲା। ଭାରାପ୍ରାପ୍ତ ଗୋଷ୍ଠୀ ଚିକିତ୍ସା ଅଧିକାରୀ ଅନିଲ କୁମାର ବେହେରା, ଷ୍ଟାଫ ନର୍ସ ସରସ୍ବତୀ ଦେବୀ, ଏଏନଏମ ଉଷାରାଣୀ ବରାଳ ପ୍ରମୁଖ ଅସ୍ତ୍ରୋପଚାରରେ ସାମିଲ ହୋଇଥିଲେ। ଅସ୍ତ୍ରୋପଚାର ସଫଳତା ସହ ଶେଷ ହେବାପରେ ମଞ୍ଜୁଳା ଏକ କନ୍ୟା ସନ୍ତାନଙ୍କୁ ଜନ୍ମ ଦେଇଥିବା ଘୋଷଣା କରାଯାଇଥିଲା। ବର୍ତ୍ତମାନ ମଞ୍ଜୁଳା ଓ ନବଜାତ ଶିଶୁକନ୍ୟାର ସ୍ବାସ୍ଥ୍ୟବସ୍ଥା ଭଲ ରହିଥିବା ଡାକ୍ତର ଶ୍ରୀ ବେହେରା ପ୍ରକାଶ କରିଛନ୍ତି। ଏଥିରେ ବିପିଏମ କମଳାକର ରାଓ ଏଥିରେ ସହଯୋଗ କରିଥିଲେ। ରାମନାଗୁଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ସୁରକ୍ଷିତ ପ୍ରସବକୁ ନେଇ ଡାକ୍ତରଙ୍କୁ ବିଭିନ୍ନ ମହଲରେ ପ୍ରଂଶସା କରାଯାଇଛି।
