ଆସନ୍ତା ୫ ତାରିଖରେ ଅଯୋଧ୍ୟାରେ ରାମମନ୍ଦିର ଭୂମିପୂଜନ ହେବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହାକୁ ପୂଜାର୍ଚନା କରିବେ। ଦେଶର ବିଭିନ୍ନ ଅଞ୍ଚଳରୁ ବେଦଜ୍ଞ ବ୍ରାହ୍ମଣମାନେ ଏହି ଅବସରରେ ଯୋଗ ଦେବେ । ବିଭିନ୍ନ ସାଧୁସନ୍ଥ ମଧ୍ୟ ଏହି ଅବସରରେ ଉପସ୍ଥିତ ରହିବେ । ହେଲେ ରାମମନ୍ଦିର ନିର୍ମାଣକୁ ନେଇ କଟାକ୍ଷ କରିଛନ୍ତି ଏନସିପି ମୁଖ୍ୟ ଶରଦ ପାୱାର। ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି ଯେ କିଛି ଲୋକ ଭାବୁଛନ୍ତି ରାମମନ୍ଦିର ନିର୍ମାଣ ହେଲେ କରୋନା ଶେଷ ହୋଇଯିବ । କେଉଁ କାମ କେତେ ମହତ୍ବପୂର୍ଣ୍ଣ ସେ କଥା ନିର୍ଣ୍ଣୟ କରାଯିବାର ଆବଶ୍ୟକତା ରହିଛି । ସରକାରଙ୍କୁ ଏବେ ଲକଡ଼ାଉନ ଯୋଗୁଁ ହୋଇଥିବା କ୍ଷୟକ୍ଷତି ସମ୍ପର୍କରେ ଚିନ୍ତା କରିବା କଥା ବୋଲି ଶ୍ରୀ ପାୱାର କହିଛନ୍ତି ।
ଶରଦ ପାୱାର ମହାରାଷ୍ଟ୍ରର ସୋଲାପୁରକୁ କରୋନା ସଂକ୍ରମଣ ସ୍ଥିତି ଅନୁଧ୍ୟାନ କରିବା ଅବସରରେ ଏକ ସାମ୍ବାଦିକ ସମ୍ମିଳନୀ କରିଥିଲେ । ଏହି ଅବସରରେ ଗଣମାଧ୍ୟମ ପ୍ରତିନିଧିମାନେ ତାଙ୍କୁ ରାମମନ୍ଦିର ନିର୍ମାଣ ପ୍ରସଙ୍ଗରେ ପ୍ରଶ୍ନ କରିଥିଲେ । ଏହାର ଉତ୍ତରରେ ଶ୍ରୀ ପାୱାର କହିଥିଲେ ଯେ କରୋନା ସ୍ଥିତି ଦିନକୁ ଦିନ ଖରାପ ହେବାରେ ଲାଗିଛି । ମାତ୍ର କିଛି ଲୋକ ମନ୍ଦିର ନିର୍ମାଣ କାମରେ ଲାଗିଛନ୍ତି । ସେମାନେ ଭାବୁଛନ୍ତି ଯେ ମନ୍ଦିର ନିର୍ମାଣ ହୋଇଗଲେ ଦେଶରୁ କରୋନା ପଳାଇବ ।
