ଚୀନ ସହିତ ଆଲୋଚନାରୁ କୌଣସି ସୁଫଳ ମିଳିନାହିଁ: ରାଜନାଥ

ନୂଆଦିଲ୍ଲୀ: ଭାରତ ଏବଂ ଚୀନ ମଧ୍ୟରେ ବାସ୍ତବିକ ନିୟନ୍ତ୍ରଣ ରେଖା (ଏଲଏସି)କୁ ନେଇ ଗତ ମେ ମାସରେ ଆରମ୍ଭ ହୋଇଥିବା ବିବାଦ ଏବେ ବି ଜାରି ରହିଛି। ଦୁଇ ଦେଶ ମଧ୍ୟରେ ଅନେକ ଥର ଆଲୋଚନା ହୋଇସାରିଲାଣି, କିନ୍ତୁ ଏହା ଫଳପ୍ରଦ ହୋଇନାହିଁ। ଏହା ମଧ୍ୟରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ବୁଧବାର କହିଛନ୍ତି, ଏଲଏସିରେ ଚାଲିଥିବା ବିବାଦର ସମାଧାନ ଲାଗି ଚୀନ ସହିତ କୁଟନୈତିକ ଏବଂ ସୈନ୍ୟ ସ୍ତରରେ ଅନେକ ଥର କଥାବାର୍ତ୍ତା ହୋଇସାରିଛି। କିନ୍ତୁ ଏହାଦ୍ବାରା କୌଣସି ‘ସାର୍ଥକ ସମାଧାନ’ ବାହାରିନାହିଁ। ଏବେ ବି ଉତ୍ତେଜନାପୂର୍ଣ୍ଣ ସ୍ଥିତି ବଜାୟ ରହିଛି।

ଏକ ସାକ୍ଷାତକାରରେ ରାଜନାଥ କହିଛନ୍ତି, ଯଦି ଏଲଏସିର ପୂର୍ବ ଲଦାଖରେ ଯଥାସ୍ଥିତି ବଜାୟ ରୁହେ, ତେବେ ସୈନିକଙ୍କ ମୁତୟନ ହ୍ରାସ କରାଯାଇ ପାରିବ ନାହିଁ। ସେ ଭାରତ-ଚୀନ ସୀମା ପ୍ରସଙ୍ଗରେ ପରାମର୍ଶ ଏବଂ ସମନ୍ବୟ କାର୍ଯ୍ୟତନ୍ତ୍ର (ଡବ୍ଲ୍ୟୁଏମସିସି)ର କାର୍ଯ୍ୟ ପ୍ରଣାଳୀ ସମ୍ପର୍କରେ ଉଲ୍ଲେଖ କରିଥିଲେ, ଯାହାର ବୈଠକ ଡିସେମ୍ବର ମାସ ଆରମ୍ଭରେ ହୋଇଥିଲା। ଯେକୌଣସି ସମୟରେ ଆଗାମୀ ସୈନ୍ୟ ସ୍ତରୀୟ ଆଲୋଚନା ଅନୁଷ୍ଠିତ ହୋଇପାରେ ବୋଲି ରାଜନାଥ କହିଛନ୍ତି।