ନୂଆଦିଲ୍ଲୀ : ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)ର ପୂର୍ବତନ ଗଭର୍ଣ୍ଣର ରଘୁରାମ ରାଜନ ବ୍ୟାଙ୍କର ନନ ପରଫରମିଙ୍ଗ ଆସେଟ (ଏନ୍ପିଏ) ପାଇଁ ଅତି ଅଶାବାଦୀ ବ୍ୟାଙ୍କର ଏବଂ ନୀତି ସ୍ଥାଣୁତା ସହ ଉପା ସରକାରଙ୍କୁ ଦାୟୀ କରିଛନ୍ତି। ସଂସଦୀୟ କମିଟି ନିକଟକୁ ପଠାଇଥିବା ନିଜ ଉତ୍ତରରେ ରଘୁରାମ ରାଜନ ଏହା କହିଛନ୍ତି। ମୂରଲୀ ମନୋହର ଯୋଶୀଙ୍କ ଅଧ୍ୟକ୍ଷତାରେ ଗଠିତ ସଂସଦୀୟ କମିଟିକୁ ରାଜନ କହିଛନ୍ତି ଯେ ବ୍ୟାଙ୍କଗୁଡ଼ିକ ବଡ଼ ଋଣ ଦେବା ନେଇ ସାବଧାନ ହେଲେ ନାହିଁ କି ବିଶ୍ୱସନୀୟତା ନିୟମକୁ ଦେଖିଲେ ନାହିଁ। ୨୦୦୮ ଆର୍ଥିକ ସଂକଟ ପରେ ବ୍ୟାଙ୍କଗୁଡ଼ିକ ମାନ୍ଦା ଅବସ୍ଥା ଦେଇ ଗତି କରୁଥିଲେ। ବ୍ୟାଙ୍କଗୁଡ଼ିକର ଲାଭ ଆଶାଠାରୁ ବହୁ କମ ରହୁଥିଲା। କୋଇଲା ଦୁର୍ନୀତି ଓ ତାର ତଦନ୍ତ ଯୋଗୁଁ ଉପା ସରକାରଙ୍କ ନିଷ୍ପତ୍ତି ନେବା ପ୍ରକ୍ରିୟାରେ ଶୀଥିଳତା ଆସି ଯାଇଥିଲା। ଫଳରେ ପୂର୍ବର ଋଣଗୁଡ଼ିକୁ ଏନ୍ପିଏରେ ପରିବର୍ତ୍ତିତ ହେବାକୁ ନ ଦେବା ପାଇଁ ବ୍ୟାଙ୍କଗୁଡ଼ିକ ଆଉ ଅଧିକ ଋଣ ଦେଲେ। ପୂର୍ବତନ ଅର୍ଥ ସଚିବ ଅରବିନ୍ଦ ସୁବ୍ରମଣ୍ୟମ ଏନ୍ପିଏ ଚିହ୍ନଟ ଓ ଏନେଇ ସମସ୍ୟାର ସମାଧାନର ପ୍ରୟାସ ପାଇଁ ରାଜନଙ୍କ ପ୍ରଶଂସା କରିଥିଲେ। ଏହାପରେ ସଂସଦୀୟ କମିଟି ତାଙ୍କୁ ପରାମର୍ଶ ଦେବା ପାଇଁ ନିମନ୍ତ୍ରଣ କରିଥିଲା। ଉଲ୍ଲେଖ ଯେ ରାଜନ ୨୦୧୬ ପର୍ଯ୍ୟନ୍ତ ଆରବିଆଇ ଗଭର୍ଣ୍ଣର ଥିଲେ। ସେ ଏବେ ଚିକାଗୋ ବିଶ୍ୱବିଦ୍ୟାଳୟରେ ପ୍ରଧ୍ୟାପକ ଅଛନ୍ତି। ଏନ୍ପିଏ ବୃଦ୍ଧି ନେଇ ସଂସଦୀୟ କମିଟି ପୂର୍ବରୁ ଅର୍ଥ ମନ୍ତ୍ରାଳୟର ବରିଷ୍ଠ ଅଧିକାରୀ ହଂସମୁଖ ଅଧିୟା ଏବଂ ବ୍ୟାଙ୍କର ଅନ୍ୟ ଶୀର୍ଷ ଅଧିକାରୀଙ୍କୁ ପଚରାଉଚୁରା କରି ସାରିଛି। ପ୍ରକାଶଯୋଗ୍ୟ ଯେ ଏବେ ସବୁ ବ୍ୟାଙ୍କ ଏନ୍ପିଏ ସମସ୍ୟା ଦେଇ ଗତି କରୁଛନ୍ତି। ୨୦୧୭ ସେପ୍ଟେମ୍ବର ସୁଦ୍ଧା ଏନପିଏ ୮.୯୯ ଶତପରାର୍ଦ୍ଧ ଟଙ୍କାରେ ପହଞ୍ଚିଥିଲା। ଏହା ହେଉଛି ବ୍ୟାଙ୍କଗୁଡ଼ିକରେ ଜମା ମୋଟ ଅର୍ଥର ୧୦.୧୧%।
Popular Categories
Previous article
Next article