ବରପାଲି : ସମ୍ବଲପୁର ବିଶ୍ବବିଦ୍ୟାଳୟ ଅଧୀନରେ ପରିଚାଳିତ ଯୁକ୍ତ ତିନି ତୃତୀୟ ସେମିଷ୍ଟାର ରାଜନୀତି ବିଜ୍ଞାନ ପରୀକ୍ଷା ପ୍ରଶ୍ନପତ୍ର ପ୍ରଘଟ ହୋଇଛି। ଏହି ଘଟଣାରେ ବରପାଲି ପୁଲିସ ୧୨ ଜଣଙ୍କୁ ଗିରଫ କରିଛି। ବରପାଲି ମହାବିଦ୍ୟାଳୟରେ ଗତ ୨୮ ତାରିଖ ଏହି ପରୀକ୍ଷା ଚାଲିଥିବା ବେଳେ ସ୍କ୍ବାଡ ଦଳ ପ୍ରଶ୍ନପତ୍ର ପ୍ରଘଟ ଧରିଛନ୍ତି। ସ୍କ୍ବାଡ ଯାଞ୍ଚ କରୁଥିବା ବେଳେ କେତେକ ଛାତ୍ରଙ୍କ ଉତ୍ତର ଅବିକଳ ସମାନ ଥିବା ଦେଖି ସେମାନଙ୍କ ମନରେ ସନ୍ଦେହ ହୋଇଥିଲା। ଅନେକ ଛାତ୍ରଛାତ୍ରୀଙ୍କ ଉତ୍ତର ଅବିକଳ ସମାନ ଥିବା ନେଇ ସ୍କ୍ବାଡ ଦଳ ମହାବିଦ୍ୟାଳୟର ଅଧ୍ୟକ୍ଷା ଜୟନ୍ତୀ ଦାଶଙ୍କ ଦୃଷ୍ଟି ଆକର୍ଷଣ କରିଥିଲେ। ଅଧ୍ୟକ୍ଷା ପରୀକ୍ଷା ହଲକୁ ଆସି ସମ୍ପୃକ୍ତ ଛାତ୍ରମାନଙ୍କ ଉତ୍ତର ଖାତା ଯାଞ୍ଚ କଲାପରେ ସ୍କ୍ବାଡ ଦଳର ସନ୍ଦେହ ସତ ବୋଲି ଜାଣି ପାରିଥିଲେ। ପ୍ରଶ୍ନପତ୍ର ପ୍ରଘଟ ହୋଇଥିବା ସମ୍ପର୍କରେ ମହାବିଦ୍ୟାଳୟର ଅଧ୍ୟକ୍ଷା ବରପାଲି ଥାନାରେ ଏତଲା ଦେଇଥିଲେ। ପୁଲିସ ଏହି ଘଟଣାର ତଦନ୍ତ କରି ୧୨ ଜଣଙ୍କୁ ଗିରଫ କରିଛି। ପ୍ରଶ୍ନପତ୍ର ପ୍ରଘଟ ଘଟଣାରେ ସମ୍ବଲପୁର ଜିଲା ନାକଟିଦେଉଳ ମହାବିଦ୍ୟାଳୟର କିରାଣୀ ଆଲୋକ ସାହୁଙ୍କ ସହିତ ବିକାଶ ଡିଗ୍ରୀ ମହାବିଦ୍ୟାଳୟ, ଘେଁସ ମହାବିଦ୍ୟାଳୟ ଓ ବରପାଲି ମହାବିଦ୍ୟାଳୟର ୧୧ ଜଣ ଛାତ୍ର ଗିରଫ ହୋଇଛନ୍ତି। ବରପାଲି ଡାକଘର ସମ୍ମୁଖରେ ଥିବା ଏକ ଜେରକ୍ସ ଦୋକାନରେ ଏହି ପ୍ରଶ୍ନପତ୍ରର ଉତ୍ତର ଜେରକ୍ସ କରି ସମ୍ପୃକ୍ତ ଛାତ୍ରମାନଙ୍କୁ ବଣ୍ଟା ଯାଇଥିବା ପୁଲିସ ସନ୍ଦେହ କରୁଛି। ପ୍ରଘଟ ହୋଇଥିବା ପ୍ରଶ୍ନପତ୍ରର ଉତ୍ସ କେଉଁଠି ଓ ଏହି ଘଟଣାରେ ନାକଟିଦେଉଳ କଲେଜ କିରାଣୀଙ୍କ କି ପ୍ରକାର ସମ୍ପୃକ୍ତି ଅଛି ପୁଲିସ ଖୋଳତାଡ଼ କରୁଛି। ପ୍ରଶ୍ନପତ୍ର ପ୍ରଘଟ ଘଟଣାରେ ବରପାଲି ପୁଲିସ ଏକ ମାମଲା ରୁଜୁ କରିଛି।
Comments are closed.