ପୁରୀ : ଧାଡ଼ିଦର୍ଶନକୁ ବିରୋଧ କରି ପୋଡାଜଳା ଏବଂ ଭଙ୍ଗାରୁଜା ସମ୍ପର୍କରେ କୋର୍ଟମିତ୍ର ଗୋପାଳ ସୁବ୍ରମଣ୍ୟମଙ୍କୁ ଶନିବାର ରିପୋର୍ଟ ଦେଇଛି ଶ୍ରୀମନ୍ଦିର ପ୍ରଶାସନ। ବାଇଶିପାହାଚ ଓ ସିଂହଦ୍ୱାର ବ୍ୟାରିକେଡ ଭାଙ୍ଗିଥିବା ସେବକ ତଥା ଅଣସେବକଙ୍କ ଭିଡ଼ିଓ ଫୁଟେଜ୍ ପଠାଯାଇଛି। କେତେକ ଦୁର୍ବୃତ୍ତ ଯୋଜନାବଦ୍ଧ ଭାବେ ମନ୍ଦିର କାର୍ଯ୍ୟାଳୟରେ ପଶି ଲକ୍ଷାଧିକ ଟଙ୍କାର ଅଫିସ ଉପକରଣ ଭଙ୍ଗାରୁଜା କରିବା ସହ ଶ୍ରୀଜୀଉଙ୍କ ଉଦ୍ଦେଶ୍ୟରେ ମିଳିଥିବା ଚାଉଳ ଲୁଟି ନେଇଥିବା ରିପୋର୍ଟରେ କୁହାଯାଇଛି। ଏସବୁ ସତ୍ତ୍ବେ ଧାଡିଦର୍ଶନ ଅବ୍ୟାହତ ରହିଥିବା ଏବଂ ବରିଷ୍ଠ ନାଗରିକ, ଦିବ୍ୟାଙ୍ଗ ଓ ସ୍ଥାନୀୟ ଅଧିବାସୀଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିବା ମୁଖ୍ୟ ପ୍ରଶାସକ ପ୍ରଦୀପ୍ତ କୁମାର ମହାପାତ୍ର କୋର୍ଟମିତ୍ରଙ୍କୁ ଜଣାଇଛନ୍ତି। ଶ୍ରୀମନ୍ଦିର ସଂସ୍କାର ବ୍ୟବସ୍ଥାରେ ବାଧା ସୃଷ୍ଟିପାଇଁ କେତେକ ଗୋଷ୍ଠୀ ଯୋଜନାବଦ୍ଧ ଭାବେ ଉଦ୍ୟମ ଚଳାଇଥିବା ସେଥିରେ କୁହାଯାଇଛି। ସିଂହଦ୍ୱାର ସୂଚନା କେନ୍ଦ୍ର ଓ ପ୍ରଶାସନିକ କାର୍ଯ୍ୟାଳୟ ଭଙ୍ଗାରୁଜା ଫଟୋ ଆମିକସ୍ କ୍ୟୁରିଙ୍କୁ ଦିଆଯାଇଛି। ହିଂସାକାଣ୍ଡରେ ସେବକ ଓ ଅଣସେବକ ସଂପୃକ୍ତ ଥିବା କୁହାଯାଇଛି।
