ବୌଦ୍ଧ : ବୌଦ୍ଧ କେନ୍ଦ୍ରୀୟ ବିଦ୍ୟାଳୟରେ ଏକ ଅଭାବନୀୟ ପରିସ୍ଥିତି ଦେଖାଦେଇଛି । ବିଦ୍ୟାଳୟ ପକ୍ଷରୁ ଡକାଯାଇଥିବା ଅଭିଭାବକ ବୈଠକକୁ କେତେକ ଅଭିଭାବକ ନଆସିବାରୁ ସେମାନଙ୍କ ପିଲାଙ୍କୁ ବାହାରେ ବର୍ଷାରେ ଠିଆ କରାଯାଇଥିବା ଅଭିଯୋଗ ହୋଇଛି । ଦଣ୍ଡମୁକ୍ତ ଅଂଚଳରେ ଅଭିଭାବକମାନଙ୍କ ପାଇଁ ପିଲାଙ୍କୁ ମିଳିଲା ଦଣ୍ଡ। ଏହାକୁ ନେଇ ଅଭିଭାବକମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ହେଲେ ଅଭିଯୋଗକୁ ବିଦ୍ୟାଳୟର ଅଧ୍ୟକ୍ଷା ରାଜଲକ୍ଷ୍ମୀ ବିଶ୍ୱାଳ ଖଣ୍ଡନ କରିଛନ୍ତି। ବିଦ୍ୟାଳୟ ପକ୍ଷରୁ ଅଭିଭାବକ ବୈଠକକୁ କେତେକ ଅଭିଭାବକ ଆସି ନଥିଲେ। ଫଳରେ ଆଜି ବିଦ୍ୟାଳୟର ଅଧ୍ୟକ୍ଷା ତୁମ ଅଭିଭାବକମାନେ କାହିଁକି ଆସିଲେ ନାହିଁ ସେମାନଙ୍କୁ ଡାକିବାକୁ ପିଲାଙ୍କୁ କହିଥିଲେ। ବିଦ୍ୟାଳୟରେ ଏକ କାର୍ଯ୍ୟକ୍ରମ ହେଉଥିବାରୁ ଅଧ୍ୟକ୍ଷା ସେମାନଙ୍କୁ ଗେଟ ପାଖକୁ ଯାଇ ଅଭିଭାବକମାନଙ୍କୁ ଫୋନ କରି ଡାକିବାକୁ କହିଥିଲେ। ପିଲାମାନେ ଗେଟ ନିକଟରେ ଠିଆ ହୋଇ ସେମାନଙ୍କ ଅଭିଭାବକମାନଙ୍କୁ ଡାକିଥିଲେ। ଏହି ସମୟରେ ବର୍ଷା ହୋଇଥିଲା। ପିଲାମାନେ ବର୍ଷାରେ ଓଦା ହୋଇ ବିଦ୍ୟାଳୟ ପରିସର ମଧ୍ୟରେ ଗେଟ ନିକଟରେ ଠିଆ ହୋଇଥିଲେ। ଏହି ସମୟରେ ଅଭିଭାବକମାନେ ସେଠାରେ ପହଂଚିଥିଲେ। ନିଜ ପିଲାମାନେ ବର୍ଷାରେ ଓଦା ହୋଇ ଠିଆ ହୋଇଥିବା ଦେଖି ଅଭିଭାବକମାନେ ଅସନ୍ତୋଷ ପ୍ରକାଶ କରିଥିଲେ।
Popular Categories
Previous article
Next article