ନୂଆଦିଲ୍ଲୀ: ପୁଲୁୱାମା ଆକ୍ରମଣ ପାଇଁ ଆତଙ୍କବାଦୀମାନେ ଷଢ଼ଯନ୍ତ୍ର କରିଥିଲେ ଓ ଭାରତରେ ଅସ୍ଥିରତା ସୃଷ୍ଟି କରିବାକୁ ଚାହୁଁଥିବା ଦେଶ ଆର୍ଥିକ ସହାୟତା ଯୋଗାଇ ଦେଇଥିଲେ ବୋଲି ନୌସେନା ମୁଖ୍ୟ ସୁନୀଲ ଲାମ୍ବା କହିଛନ୍ତି। ନୂଆଦିଲ୍ଲୀରେ ଭାରତ-ପ୍ରଶାନ୍ତମହାସାଗରୀୟ ଆଞ୍ଚଳିକ ସମ୍ମିଳନୀରେ ଯୋଗଦେଇଥିବା ପ୍ରତିରକ୍ଷା କ୍ଷେତ୍ରର ବିଶ୍ୱସ୍ତରୀୟ ବିଶେଷଜ୍ଞ ଓ କୂଟନୀତିଜ୍ଞମାନଙ୍କୁ ଉଦ୍ବୋଧନ ଦେଇ ଆଡମିରାଲ ଲାମ୍ବା କହିଛନ୍ତି ଯେ ଏହି ଅଞ୍ଚଳରେ ବିଭିନ୍ନ ପ୍ରକାର ଆତଙ୍କବାଦ ମୁଣ୍ଡ ଟେକିଛି ଏବଂ ଅଧିକାଂଶ ଦେଶ ଆତଙ୍କବାଦର ଶିକାର ହୋଇଛନ୍ତି। ବର୍ତ୍ତମାନ ଆତଙ୍କବାଦ ବିଶ୍ୱସ୍ତରକୁ ବ୍ୟାପିଛି ଫଳରେ ଆତଙ୍କବାଦର ବିପଦ ଆହୁରି ଘନେଇଛି। ଆତଙ୍କବାଦର ସମ୍ପୂର୍ଣ ଦମନ ପାଇଁ ବିଶ୍ୱ ଏକ ହୋଇ ପଦକ୍ଷେପ ନେବା ଆବଶ୍ୟକ ବୋଲି ନୌସେନା ମୁଖ୍ୟ କହିଛନ୍ତି।