ନୂଆଦିଲ୍ଲୀ: ମୋଟ ଘରୋଇ ଉତ୍ପାଦ(ଜିଡିପି) ଅଭିବୃଦ୍ଧି ହାରରେ ହ୍ରାସକୁ ନେଇ କଂଗ୍ରେସ ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା କେନ୍ଦ୍ର ସରକାର ଉପରେ ପ୍ରବଳ ବର୍ଷିଛନ୍ତି। ଦେଶର ଅର୍ଥବ୍ୟବସ୍ଥା ନଷ୍ଟ କରିବା ପଛରେ କାହାର ହାତ ରହିଛି ବୋଲି ସେ ଟ୍ବିଟ୍ କରି ମୋଦୀ ସରକାରକୁ ପ୍ରଶ୍ନ କରିଛନ୍ତି। ଅଚ୍ଛେ ଦିନ୍ର ଡିଣ୍ଡିମ ପିଟୁଥିବା ବିଜେପି ସରକାରର ରୂପ ଜିଡିପି ହ୍ରାସରୁ ସ୍ପଷ୍ଟ ହୋଇଯାଇଛି। ନା ଜିଡିପିର ଅଭିବୃଦ୍ଧି ହେଉଛି, ନା ଡଲାର ତୁଳନାରେ ଟଙ୍କାର ମୂଲ୍ୟ ବୃଦ୍ଧି ପାଉଛି। ବେକାରୀ ସଂଖ୍ୟା ମଧ୍ୟ ବୃଦ୍ଧି ପାଉଛି। କେନ୍ଦ୍ର ସରକାରଙ୍କ ନାକତଳେ ବ୍ୟାଙ୍କ ଠକେଇ ହେଉଥିବା ଆରବିଆଇ କହିଛି। ଅର୍ଥବ୍ୟବସ୍ଥା ନଷ୍ଟ ହେବା ପଛରେ କାହାର ହାତ ରହିଛି ତାହା ବିଜେପି ସ୍ପଷ୍ଟ କରୁ ବୋଲି ପ୍ରିୟଙ୍କା ଟ୍ବିଟ୍ କରି କହିଛନ୍ତି।
ସୂଚନା ମୁତାବକ, ମାନ୍ଦାବସ୍ଥା ଯୋଗୁ ଦେଶର ବିକାଶ ହାର କମିଯାଇଛି। ଚଳିତ ଆର୍ଥିକ ବର୍ଷର ପ୍ରଥମ ତ୍ରୈମାସିକ ରିପୋର୍ଟରେ ଜିଡିପି ୫.୮%ରୁ ଖସି ୫%ରେ ପହଞ୍ଚିଛି। ଗତବର୍ଷ ଏହି ସମୟରେ ଜିଡିପି ୮% ଉପରେ ରହିଥିଲା। ଗତବର୍ଷର ଶେଷ ୩ମାସରେ ମଧ୍ୟ ଜିଡିପି ହାର ୫.୮% ଥିଲା।
