ଡେସ୍କ: ରାଷ୍ଟ୍ରପତି ଦ୍ରୌପଦୀ ମୁର୍ମୁ ଓଡ଼ିଶା ଗସ୍ତର ଆଜି ଦ୍ଵିତୀୟ ଦିନରେ ଖଣ୍ଡଗିରି ସ୍ଥିତ ତପୋବନ ହାଇସ୍କୁଲ ପରିଦର୍ଶନ କରିଥିଲେ। ସେଠାରେ ସେ ୧୨ ମିନିଟ ରହିଥିଲେ ଓ ଶିକ୍ଷକ ଶିକ୍ଷୟିତ୍ରୀ ଏବଂ ଛାତ୍ରଛାତ୍ରୀଙ୍କ ସହ କଥା ହୋଇଥିଲେ। ରାଷ୍ଟ୍ରପତି କହିଥିଲେ, ‘ମୁଁ ଯେତେବେଳେ କଲେଜରେ ପଢ଼ୁଥିଲି ଓ ଚାକିରୀ କରୁଥିଲି ଏହି ସ୍କୁଲକୁ ଆସିଥିଲି। କାରଣ ମୁଁ ମୋ ସମ୍ପର୍କୀୟମାନଙ୍କୁ ଏଠାରେ ନାମ ଲେଖାଇବା ପାଇଁ ଆସୁଥିଲି। ସେତେବେଳେ ଆଜି ଭଳି ପରିସ୍ଥିତି ନ ଥିଲା।
ସେ କହିଥିଲେ, ମୁଁ ଯେଉଁ ଗାଁରୁ ଆସିଛି, ଏବେ ସେହି ଗାଁ ସ୍କୁଲ ଏବେ ପକ୍କା ହୋଇଥିବ, ଛାତ ଘର ହୋଇଥିବ, ସେତେବେଳେ ମାଟି ଘର ଥିଲା ଓ ତଳେ କିଛି କିଛି ସିମେଣ୍ଟ ଦିଆଯାଇଥିଲା ଓ କିଛି ଉଠି ଯାଇଥିଲା। ଆମେ ସପ୍ତାହକୁ ଥରେ ଗୋବର ଦେଉଥିଲୁ ଓ ସବୁଦିନ ଝାଡୁ କରୁଥିଲୁ।
ଆଜି ପରିସ୍ଥିତି ବଦଳି ଯାଇଛି ବୋଲି ରାଷ୍ଟ୍ରପତି ଶ୍ରୀମତୀ ମୁର୍ମୁ କହିଥିଲେ। ପିଲାମାନଙ୍କୁ ବହୁତ ଭାଗ୍ୟବାନ ବୋଲି କହିବା ସହ ଆମର ଲକ୍ଷ୍ୟ ଏହି ପରିସ୍ଥିତି ନୁହେଁ ବରଂ ଆମେ କଣ ହେବାକୁ ଚାହୁଁଛୁ ବୋଲି ରାଷ୍ଟ୍ରପତି କହିଥିଲେ। ତପୋବନ ବିଦ୍ୟାଳୟର ପୁରାତନ ଛାତ୍ରଛାତ୍ରୀ ଓ ବର୍ତ୍ତମାନର ଛାତ୍ରଛାତ୍ରୀମାନଙ୍କୁ ଦେଖିବା ପରେ ସେ ଅତ୍ୟନ୍ତ ଆତ୍ମସନ୍ତୋଷ ଲାଭ କରୁଛନ୍ତି ବୋଲି ରାଷ୍ଟ୍ରପତି କହିଥିଲେ। ସେ କହିଥିଲେ, ମୋର କେହି ରୋଲ ମଡେଲ ନ ଥିଲେ। ଜେଜେ ମା’ ରୋଲ ମଡେଲ ଥିଲେ ଓ ସେ ବହୁତ ସାହସୀ ଥିଲେ ବୋଲି ରାଷ୍ଟ୍ରପତି କହିଛନ୍ତି। ତାଙ୍କ ଜେଜେ ମା’ ଅନ୍ୟମାନଙ୍କୁ ବହୁତ ସାହାଯ୍ୟ କରୁଥିଲେ।
Comments are closed.