ଭୁବନେଶ୍ବର: ରାଜସ୍ବ ମନ୍ତ୍ରୀ ପ୍ରମିଳା ମଲ୍ଲିକ ହୋଇଛନ୍ତି ବିଜେଡି ବାଚସ୍ପତି ପ୍ରାର୍ଥୀ। ପ୍ରମିଳା ମଲ୍ଲିକଙ୍କୁ ବାଚସ୍ପତି ପ୍ରାର୍ଥୀ ଭାବେ ଘୋଷଣା କରିଛି ବିଜେଡି। ଆସନ୍ତାକାଲି ପ୍ରମିଳା ମଲ୍ଲିକ ବାଚସ୍ପତି ପଦ ପାଇଁ ନାମାଙ୍କନପତ୍ର ଦାଖଲ କରିବେ ବୋଲି ଜଣାପଡ଼ିଛି। ବିଜେଡି ପାଖରେ ସଂଖ୍ୟା ଗରିଷ୍ଠତା ରହିଥିବାରୁ ପ୍ରମିଳା ମଲ୍ଲିକ ବାଚସ୍ପତି ହେବା ଏକ ପ୍ରକାର ନିଶ୍ଚିତ ହୋଇଛି। ଓଡ଼ିଶା ବିଧାନସଭାରେ ପ୍ରଥମ ଥର ପାଇଁ ଜଣେ ମହିଳା ବାଚସ୍ପତି ହେବେ। ସେହିପରି ଅନୁସୂଚିତ ଜାତି ବର୍ଗରୁ ପ୍ରଥମଥର ପାଇଁ ପ୍ରମିଳା ମଲ୍ଲିକ ବାଚସ୍ପତି ହେବେ। ପ୍ରମିଳା ମଲ୍ଲିକ ୬ ଥର ବିଧାୟିକା ହୋଇଛନ୍ତି ଏବଂ ତାଙ୍କୁ ହିଁ ବାଚସ୍ପତି ଭାବେ ନିର୍ବାଚିତ କରିବାକୁ ବିଜେଡି ପକ୍ଷରୁ ନିଷ୍ପତ୍ତି ନିଆଯାଇଛି।
ବାଚସ୍ପତି ପ୍ରାର୍ଥୀ ହେବା ପରେ ପ୍ରମିଳା ମଲ୍ଲିକ ପ୍ରତିକ୍ରିୟା ରଖି କହିଛନ୍ତି ଯେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୋ ଉପରେ ଭରସା କରିଥିବାରୁ ମୁଁ ବେଶ ଖୁସି। ମୋର ଅଭିଜ୍ଞତା ଓ ମୁଖ୍ୟମନ୍ତ୍ରୀଙ୍କ ବିଶ୍ବାସକୁ ନେଇ ବାଚସ୍ପତି ଭାବେ ବିଧାନସଭା ଚଳାଇବି। ପ୍ରଥମଥର ପାଇଁ ବାଚସ୍ପତି ଭାବେ ସୁଯୋଗ ଦେଇ ମହିଳାଙ୍କ ଦକ୍ଷତା ଓ ରାଜନୀତିରେ ସଶକ୍ତ ପାଇଁ ମୁଖ୍ୟମନ୍ତ୍ରୀଙ୍କ ନେଇଥିବା ଉଦ୍ୟମ ପ୍ରଶଂସନୀୟ। ବିଧାନସଭାକୁ ସୁରୁଖୁରୁରେ ଚଳାଇବା ପାଇଁ ସବୁଦଳ ସହ ଆଲୋଚନା କରିବି, ଫଳରେ ବିଧାନସଭା ସୁରୁଖୁରୁରେ ଚାଲିବ। ବାଚସ୍ପତି ହେବା ପରେ ବିଧାନସଭାକୁ ନିରପେକ୍ଷ ଭାବେ ଚଳାଇବି ବୋଲି ପ୍ରମିଳା ମଲ୍ଲିକ ପ୍ରକାଶ କରିଛନ୍ତି।
