ଚୌଦ୍ୱାର : ଚୌଦ୍ୱାର ପୌର ପରିଷଦର ବୈଠକ ପୌର ସଭାଗୃହରେ ଅନୁଷ୍ଠିତ ହୋଇ ଯାଇଛି । ପୌରାଧ୍ୟକ୍ଷା ମାନସୀ ସ୍ୱର୍ଣ୍ଣପ୍ରଭା ସାମଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଡେଙ୍ଗୁ ଓ ମ୍ୟାଲେରିଆ ରୋଗର ନିରାକରଣ ଓ ଏଥିପାଇଁ ପୌର ପରିଷଦ ତରଫରୁ ଆନୁଷଙ୍ଗିକ ବ୍ୟବସ୍ଥା ଓ ପ୍ରସ୍ତୁତି ସମ୍ପର୍କରେ ବିସ୍ତୃତ ଆଲୋଚନା କରିଯାଇଥିଲା। ରାଜ୍ୟର ବିଭିନ୍ନ ସହର ତଥା ଗ୍ରାମାଞ୍ଚଳରେ ଡେଙ୍ଗୁ ବ୍ୟାପୁଥିବାରୁ ଚୌଦ୍ୱାର ସହରକୁ ସେଥିରୁ ରକ୍ଷା କରିବା ପାଇଁ ପୌର ପାଳିକା ତରଫରୁ ବିଭିନ୍ନ ପଦକ୍ଷେପ ମଧ୍ୟରୁ ନିୟମିତ ସଫେଇ, ନଳା ସଫେଇ, ଅଳିଆ ଅବର୍ଜନା ଦୈନିକ ଉଠାଣ, ବ୍ଲିଚିଂ ସିଞ୍ଚନ, କୂଅ ଗୁଡ଼ିକରେ ବ୍ଲିଚିଂ ପକାଇବା, ପ୍ରତି ସଂଧ୍ୟାରେ ମଶାଧୁଆଁ ଦେବା ଆଦି କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ସଭାରେ ଉପସ୍ଥିତ ବିଧାୟକ ସୌଭିକ ବିଶ୍ୱାଳ ବିଭାଗୀୟ ଅଧିକାରୀ ଏବଂ କର୍ମଚାରୀ ମାନଙ୍କୁ ତାଗିଦ କରିଥିଲେ। ସହରାଞ୍ଚଳରେ ସଫେଇ କାର୍ଯ୍ୟ ସଠିକ ଭାବେ ହେଉନଥିବା ବହୁ କାଉନସିଲର ଅଭିଯୋଗ କରି ହୋ ହାଲ୍ଲା କରିବାରେ ବିଧାୟକ ଶ୍ରୀ ବିଶ୍ୱାଳ ସଫେଇ ଦାୟିତ୍ୱରେ ଥିବା ଅଧିକାରୀଙ୍କୁ ତାଗିଦ କରିଥିଲେ। ପୌର ପାଳିକାରେ ଥିବା ମଶାଧୁଆଁ ମେସିନଟି କାର୍ଯ୍ୟକ୍ଷମ ନଥିବାରୁ ତୁରନ୍ତ ସିଏମସିରୁ ଏକ ମେସିନ୍ ଅଣାଯାଇ ମଶାଧୁଆଁ ବ୍ୟବସ୍ଥା କରାଯିବା ଓ ଏକ ନୂତନ ମେସିନ୍ କିଣିବାର ବ୍ୟବସ୍ଥା କରାଯିବା ପାଇଁ ବୈଠକରେ ସ୍ଥିର କରାଯାଇଥିଲା। ସାଂସଦ ପ୍ରତିନିଧି ପ୍ରେମଚାନ୍ଦ ନାୟକ, ସ୍ୱଚ୍ଛ ଭାରତ ମିଶନ୍ ଅଧିକାରୀ ବିଚିତ୍ରାନନ୍ଦ ସ୍ୱାଇଁଙ୍କ ସମେତ ପାରିଷଦ ମାନେ ବୈଠକରେ ଉପସ୍ଥିତ ଥିଲେ ।
Popular Categories
Previous article
Next article