ଗୋପାଳପୁର : ଦିନ ତମାମ ଲଗାଣ ବର୍ଷା ଯୋଗୁଁ ଭାବିନୀପୁର ପଞ୍ଚାୟତ ଅନ୍ତର୍ଗତ ଭାବିନୀପୁର ଗ୍ରାମ ଉଚ୍ଚ ପ୍ରାଥମିକ ବିଦ୍ୟାଳୟ କଡ଼ରେ ସରକାରୀ ଜାଗାରେ କଚାଘର କରି ଭଞ୍ଜନଗର ଅଞ୍ଚଳର ମୂଳ ବାସିନ୍ଦା ତଥା ନିରାଶ୍ରୟା ଧୋବଣୀ ବେହେରାଙ୍କ ଘରର ଏକ କାନ୍ଥ ପଡ଼ିଯାଇଥିଲା। ଯାହ ଫଳରେ ସେ ଅସହାୟ ଏବଂ ଅସୁରକ୍ଷିତ ଭାବେ ରହୁଥିଲେ। ଖବର ପାଇ ଭାବିନୀପୁର ସରପଞ୍ଚ ଇଂ ରଞ୍ଜିତ କୁମାର ସାହୁ ଘଟଣାସ୍ଥଳରେ ପହଞ୍ଚି ତୁରନ୍ତ ତାଙ୍କୁ ସ୍ଥାନୀୟ ଏକ ଅଙ୍ଗନବାଡି କେନ୍ଦ୍ରକୁ ସ୍ଥାନାନ୍ତରିତ କରିବା ସହ ଖାଇବା ପିଇବାର ବ୍ୟବସ୍ଥା କରିଥିଲେ । ସୂଚନାଯୋଗ୍ୟ ଯେ ରାଜ୍ୟସରକାରଙ୍କ ପକ୍ଷରୁ ଭୂମିହୀନ ପରିବାରକୁ ମାଗଣାରେ ଭୂମି ପ୍ରଦାନ ସହ ଆବାସ ଯୋଜନାରେ ସାମିଲ କରିବାକୁ ନିର୍ଦ୍ଦେଶ ରହିଥିବା ବେଳେ ଧୋବଣୀ କିପରି ଏଥିରୁ ବଞ୍ଚିତ ରହିଲେ, ତାହା ପ୍ରଶ୍ନବାଚୀ ସୃଷ୍ଟି କରିଛି । ଅନ୍ୟ ପଟେ ଧୋବଣୀ ଭୂମି ଖଣ୍ଡିଏ ପାଇବା ପାଇଁ ସରକାରୀ ସ୍ତରରେ ଆବେଦନ କରିଥିଲେ ମଧ୍ୟ ନିଜ ଘର ଭଞ୍ଜନଗର ଅଞ୍ଚଳର ହୋଇଥିବାରୁ ଆବେଦନ ଖାରଜ ହୋଇ ଯାଇଥିଲା। ଯାହାଫଳରେ ଦୀର୍ଘ ବର୍ଷ ଧରି ରାସ୍ତା କଡ଼ରେ ଏକ କଚ୍ଚା ଘରେ ରହି ଆସୁଛନ୍ତି । ଏଣୁ ରାଜ୍ୟ ସରକାରଙ୍କ ପକ୍ଷରୁ ଭୂମି ଖଣ୍ଡିଏ ଯୋଗାଇବା ସହ ଆବାସ ଯୋଜନାରେ ସାମିଲ କରିବାକୁ ଅଞ୍ଚଳବାସୀ ଦାବି ଜଣାଇଛନ୍ତି।
Comments are closed.