ପିପିଲି : ପିପିଲି ଥାନା ଅନ୍ତର୍ଗତ କମଳସାଗରପାଟଣା ଗ୍ରାମର ନିଖୋଜ ଦୁଇ ଜଣ ସ୍କୁଲ ଛାତ୍ରଙ୍କୁ ପିପିଲି ପୁଲିସ ଆଜି ଖୋର୍ଦ୍ଧା ଜିଲା ଜାଆଁଳା ନିକଟରୁ ଉଦ୍ଧାର କରିବାରେ ସଫଳ ହୋଇଛି । ନବମ ଓ ଦଶମ ଶ୍ରେଣୀରେ ପାଠ ପଢୁଥିବା ଦୁଇ ଛାତ୍ର ଗତ ୧୧ ତାରିଖ ସକାଳେ ସ୍କୁଲ ଯିବା ନାମରେ ଗୋଟିଏ ସାଇକେଲ୍ରେ ଘରୁ ବାହାରିଥିଲେ । ତେବେ ସଂନ୍ଧ୍ୟା ପର୍ଯ୍ୟନ୍ତ ସେମାନେ ଘରକୁ ଫେରିନଥିଲେ । ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରି ସେମାନଙ୍କ ସନ୍ଧାନ ନପାଇବାରୁ ଏସଂପର୍କରେ ପିପିଲି ପୁଲିସରେ ଲିଖିତ ଅଭିଯୋଗ କରିଥିଲେ । ପିପିଲି ଏସ୍ଡିପିଓ ଦେବଦତ୍ତ ବରାଳଙ୍କ ନିର୍ଦ୍ଦେଶ କ୍ରମେ ପିପିଲି ଆଇଆଇସି ଗୌରାଙ୍ଗ ଚରଣ ପୃଷ୍ଟିଙ୍କ ନେତୃତ୍ୱରେ ଏସ୍ଆଇ ସନ୍ଦୀପ କୁମାର ଦାସ, ଏଏସ୍ଆଇ ରବିନ୍ଦ୍ର କୁମାର ନାୟକ ପ୍ରମୁଖଙ୍କୁ ନେଇ ଗଠିତ ଦୁଇଟି ପୁଲିସ ଟିମ୍ ୧୧ ତାରିଖ ସଂନ୍ଧ୍ୟାରୁ ବିଭିନ୍ନ ସ୍ଥାନରେ ଖୋଜାଖୋଜି ଚଳାଇଥିଲେ । ଖୋର୍ଦ୍ଧା ଜିଲା ଜାଆଁଳା ନିକଟରେ ନିଖୋଜ ଦୁଇ ସ୍କୁଲ ଛାତ୍ର ଥିବା ସଂପର୍କରେ ଆଜି ସକାଳେ ବିଶ୍ୱସ୍ତ ସୂତ୍ରରୁ ସୂଚନା ପାଇବା ପରେ ପୁଲିସ ସେଠାରେ ପହଞ୍ଚି ଦୁଇଛାତ୍ରଙ୍କୁ ଉଦ୍ଧାର କରିଥିଲା । ପରେ ପୁଲିସ ସେମାନଙ୍କୁ ସେମାନଙ୍କ ପରିବାରକୁ ହସ୍ତାନ୍ତର କରିଥିଲା ।
Comments are closed.