ସୁନ୍ଦରଗଡ଼ : ରାଜ୍ୟରେ ସଂକ୍ରମଣ ସଂଖ୍ୟା ବୃଦ୍ଧି ପାଉଥିବା ବେଳେ ସୁନ୍ଦରଗଡ଼ ଜିଲାର ସଂକ୍ରମଣ ସଂଖ୍ୟା ସର୍ବାଧିକ ହୋଇ ରହିଥିବାରୁ ଜିଲା ପ୍ରଶାସନ ପାଇଁ ଏହା ମୁଣ୍ଡବ୍ୟଥାର କାରଣ ହୋଇଛି। ରାଜ୍ୟ ସରକାରଙ୍କ ସମସ୍ତ ମାର୍ଗଦର୍ଶିକାକୁ ଶତପ୍ରତିଶତ ପାଳନ କରିବା ପାଇଁ ପ୍ରଶାସନ ଲାଗି ପଡ଼ିଥିବା ବେଳେ ଅମାନିଆ କିନ୍ତୁ ଏବେ ଯାଏ ଏତେଟା ସଚେତନ ହୋଇନଥିବାରୁ ଜରିମାନା ଆଦାୟରୁ ଏହା ସ୍ପଷ୍ଟ ହେଉଛି। ସଂକ୍ରମଣକୁ ଦୃଷ୍ଟିରେ ରଖି ସାପ୍ତାହିକ ବଜାର ଗୁଡ଼ିକୁ ପ୍ରଶାସନ ପକ୍ଷରୁ ବନ୍ଦ କରାଯାଇଥିବା ବେଳେ ସୀମାନ୍ତ ଅଞ୍ଚଳରେ କଣ୍ଟେମେଣ୍ଟ ଜୋନ ଘୋଷଣା କରାଯାଇ ସଂକ୍ରମଣକୁ ରୋକିବା ପାଇଁ ପଦକ୍ଷେପ ନିଆଯାଉଛି। ଅପରପକ୍ଷରେ ସୀମାନ୍ତ ଅଞ୍ଚଳ ଗୁଡ଼ିକରୁ ଯାଆ ଆସ କରୁଥିବା ଲୋକଙ୍କ ଉପରେ ନଜର ରଖାଯିବା ସହ ପଡ଼ୋଶୀ ରାଜ୍ୟ ଝାଡ଼ଖଣ୍ଡ ଓ ଛତିଶଗଡ଼ରୁ ଆସୁଥିବା ଲୋକଙ୍କ ନେଗେଟିଭ ରିପୋର୍ଟ ନ ଥିଲେ ୭ଦିନ ସଙ୍ଗରୋଧ ରହିବା ପାଇଁ ତାଗିଦ କରାଯାଇଛି। ଏପରିକି ଝାଡ଼ଖଣ୍ଡ ଓ ଛତିଶଗଡ଼କୁ ଯାଆ ଆସ କରୁଥିବା ଘରୋଇ ବସ ସେବାକୁ ମଧ୍ୟ ବନ୍ଦ କରିଦିଆଯାଇଛି।
ସୀମାନ୍ତ ଉପରେ ସତର୍କ ଦୃଷ୍ଟି ରଖିବା ପାଇଁ ରାଜ୍ୟ ସରକାର ଦେଇଥିବା ନିର୍ଦ୍ଦେଶନାମାକୁ ପ୍ରଶାସନ ଯଥାସମ୍ଭବ ପାଳନ କରିବା ପରିପ୍ରେକ୍ଷୀରେ ଆଜି ସୁନ୍ଦରଗଡ଼ ଏସ.ପି ସାଗରିକା ନାଥ ସବଡେଗା, ବାଲିଶଙ୍କରା ସୀମାନ୍ତ ଅଞ୍ଚଳରେ ପହଞ୍ଚି ଅନୁଧ୍ୟାନ କରିବା ସହ ଏହି କାର୍ଯ୍ୟରେ ନିୟୋଜିତ ଅଧିକାରୀ ଓ କର୍ମଚାରୀଙ୍କ ସହ ଆଲୋଚନା କରିଥିଲେ। ଏ ଅବସରରେ ଏସ.ପି ସାଗରିକା କର୍ତ୍ତବ୍ୟରତ ଅଧିକାରୀ ଓ କର୍ମଚାରୀଙ୍କ ସହ ଅଯଥା ଯୁକ୍ତି ନ କରି ସେମାନଙ୍କୁ ସହଯୋଗ କରିବା ପାଇଁ ସମସ୍ତ ଜନସାଧାରଣଙ୍କୁ ଅନୁରୋଧ କରିଛନ୍ତି। ଅପରପକ୍ଷରେ ଗତ ଦୁଇ ତିନି ଦିନ ମଧ୍ୟରେ ଅମାନିଆଙ୍କୁ ସାବାଡ଼ କରିବା ପାଇଁ ପୁଲିସ ଜିଲାର ବିଭିନ୍ନ ଥାନା ଅଞ୍ଚଳରେ ଅଚାନକ ତନଖି କରାଯିବା ସହ ଛକ ମାନଙ୍କରେ ପୁଲିସ ମାସ୍କ ପିନ୍ଧିନଥିବା (ଅମାନିଆ)ଙ୍କ ଠାରୁ ୫ଲକ୍ଷ ଟଙ୍କା ଜୋରିମାନା ଆଦାୟ ହୋଇଥିବା ବିଭାଗ ପକ୍ଷରୁ କୁହାଯାଇଛି। ଆଜି ସମଗ୍ର ଜିଲାରେ ସଂକ୍ରମଣଙ୍କ ସଂଖ୍ୟା ୨୬୮ ରହିଥିବା ବେଳେ ଗତକାଲି ଏହା ଅଧିକ ରହିଥିବାର ଜଣାପଡ଼ିଛି। ଗୋଟିଏ ପଟେ ଅମାନିଆଙ୍କୁ ସାବାଡ଼ କରିବା ଓ ଲୋକଙ୍କୁ ସଚେତନ କରାଇବାର କାର୍ଯ୍ୟ ଚାଲିଥିବା ବେଳେ ଅନ୍ୟ ପଟେ ସଂକ୍ରମଣକାରୀଙ୍କୁ ଠିକ ଚିକିତ୍ସା ସୁବିଧା ଉପଲବ୍ଧ କରାଇବା ପାଇଁ ପ୍ରଶାସନ ଲାଗିପଡ଼ିଛି। ସଂକ୍ରମଣଙ୍କ ସଂଖ୍ୟା ହ୍ରାସ ନ ହେଲେ କଠୋର ପଦକ୍ଷେପ ଗ୍ରହଣ କରାଯିବ ବୋଲି ଜିଲାପାଳ ନିଖିଲ ପବନ କଲ୍ୟାଣ ସୂଚନା ଦେଇଛନ୍ତି।
