ରାଜକୋଟ: କରୋନା ଟିକାକରଣ ଅଭିଯାନକୁ ନେଇ ଦେଶରେ ଜୋରଦାର ପ୍ରସ୍ତୁତି ଚାଲିଛି। ଏଥିପାଇଁ ସମସ୍ତ ପ୍ରକାର ଆବଶ୍ୟକ ପ୍ରସ୍ତୁତି କରାଯାଉଛି। ଭାରତରେ ନିର୍ମିତ ସ୍ବଦେଶୀ ଟିକା ପ୍ରତି ଘର ପର୍ଯ୍ୟନ୍ତ ପହଞ୍ଚିବା ଲାଗି ଉଦ୍ୟମ ଶେଷ ପର୍ଯ୍ୟାୟରେ ରହିଛି ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ।
ପ୍ରଧାନମନ୍ତ୍ରୀ ଗୁରୁବାର ରାଜକୋଟଠାରେ ଏମ୍ସର ଶିଳାନ୍ୟାସ କରିବା ପରେ କହିଛନ୍ତି, କରୋନା ସଂକ୍ରମଣ ରୋକିବାକୁ ଦେଶ ଯେପରି ଏକଜୁଟ ହେଲା, ସେହିପରି ଟିକାକରଣ ଅଭିଯାନକୁ ସଫଳ କରିବା ପାଇଁ ପୂରା ଭାରତ ଏକଜୁଟ ହୋଇ ଆଗକୁ ବଢ଼ିବ। ଭିଡିଓ କନ୍ପରେନ୍ସ ଜରିଆରେ ଆୟୋଜିତ ଏହି ସମାରୋହରେ ଗୁଜରାଟ ରାଜ୍ୟପାଳ ଆଚାର୍ଯ୍ୟ ଦେବବ୍ରତ, ମୁଖ୍ୟମନ୍ତ୍ରୀ ବିଜୟ ରୂପାନୀ, କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡା. ହର୍ଷବର୍ଦ୍ଧନ ଉପସ୍ଥିତ ଥିଲେ।
ମୋଦୀ କହିଥିଲେ, ୨୦୨୦ରେ ସଂକ୍ରମଣକୁ ନେଇ ନିରାଶା ଥିଲା, ଚିନ୍ତା ଥିଲା, ଚାରିଆଡ଼େ ଲୋକଙ୍କ ମନରେ ପ୍ରଶ୍ନ ଥିଲା। କିନ୍ତୁ ୨୦୨୧ ଚିକିତ୍ସା ଆଶାକୁ ନେଇ ଆସିଛି। ବିଶ୍ଵର ସବୁଠୁ ବଡ଼ ଟିକାକରଣ ଅଭିଯାନ ଚଳାଇବା ପାଇଁ ଭାରତର ପ୍ରସ୍ତୁତି ଜୋରସୋରରେ ଚାଲିଛି। ଦେଶରେ କରୋନାର ନୂଆ ମାମଲା ହ୍ରାସ ପାଇବାରେ ଲାଗିଛି। କିନ୍ତୁ ଏହାର ଅର୍ଥ ନୁହେଁ ଯେ ଲୋକମାନେ ଅବହେଳା କରନ୍ତୁ। ଔଷଧ ମିଳିଯାଇଛି, ଏହାର ଅର୍ଥ ନୁହେଁ ଯେ ନିସ୍ତାର ମିଳିଗଲା। ତେଣୁ ଔଷଧ ସହିତ ସଚେତନତା ବି ଜରୁରୀ ବୋଲି ପ୍ରଧାନମନ୍ତ୍ରୀ କହିଛନ୍ତି।
ପ୍ରଧାନମନ୍ତ୍ରୀ ବର୍ଷର ଶେଷ ଦିନରେ କରୋନା ବିରୋଧୀ ଲଢ଼େଇରେ ଯୋଗଦେଇଥିବା ଦେଶର ଲକ୍ଷ ଲକ୍ଷ ଚିକିତ୍ସକ, ସ୍ବାସ୍ଥ୍ୟକର୍ମୀ, ସଫେଇ କର୍ମଚାରୀ, ଔଷଧ ଦୋକାନୀ ଏବଂ ଅନ୍ୟ ଆଗଧାଡ଼ିର ଯୋଦ୍ଧାମାନଙ୍କୁ ସ୍ମରଣ କରିବା ସହିତ ସେମାନଙ୍କୁ ପ୍ରଣାମ ଜଣାଇଥିଲେ।
Comments are closed.