ପ୍ଲାନେଟାରିୟମ କମ୍ପ୍ୟୁଟର ଖରାପ, ଦୁଇଦିନ ହେଲା ‘ଶୋ’ ବନ୍ଦ

ଭୁବନେଶ୍ବର : ପଠାଣି ସାମନ୍ତ ପ୍ଲାନେଟାରିୟମ ‘ଶୋ’ କମ୍ପ୍ୟୁଟରରେ ବୈଷୟିକ ତ୍ରୁଟି ଯୋଗୁଁ ଦୁଇଦିନ ହେଲା କାର୍ଯ୍ୟକ୍ରମ ବନ୍ଦ ରହିଛି। ଗ୍ରୀଷ୍ମ ଛୁଟିରେ ଛାତ୍ରଛାତ୍ରୀ, ଅଭିଭାବକ ଏବଂ ପର୍ଯ୍ୟଟକ ଶୋ ଦେଖିବାରୁ ବଞ୍ଚିତ ହେଉଛନ୍ତି। ଖରାରେ ଲୋକେ ‘ଶୋ’ ନ ଦେଖି ନିରାଶ ହୋଇ ଫେରୁଥିବା ଅଭିଯୋଗ ହୋଇଛି।
ଶନିବାର ପ୍ରଥମ ‘ଶୋ’ ଚାଲି ଥିବାବେଳେ ହଠାତ୍‌ କମ୍ପ୍ୟୁଟର‌‌େ‌ର ବୈଷୟିକ ତ୍ରୁଟି ଦେଖାଦେବାରୁ ଅଧାରୁ ଏହାକୁ ବନ୍ଦ କରି ଦିଆଯାଇଥିଲା। ପରବର୍ତ୍ତୀ ସମୟରେ ତ୍ରୁଟି ସୁଧାର କରାଯାଇ ପାରିଲା ନାହିଁ। ଫଳରେ ସମସ୍ତ ଶୋ’କୁ ବନ୍ଦ କରି ଦିଆଗଲା। ରବିବାର ପ୍ଲାନେଟାରିୟମକୁ ଅଧିକ ଛାତ୍ରଛାତ୍ରୀ ଏବଂ ପର୍ଯ୍ୟଟକ ଆସିଥାନ୍ତି; କିନ୍ତୁ ବୈଷୟିକ ତ୍ରୁଟି କାରଣରୁ ସମସ୍ତ ଶୋ’କୁ ବନ୍ଦ କରି ଦିଆଯାଇଛି। କମ୍ପ୍ୟୁଟର ସଜାଡିବା ପାଇଁ ଏଠାରେ ଇଞ୍ଜିନିୟର ନିଯୁକ୍ତ ହୋଇଥିଲେ ମଧ୍ୟ ସେମାନେ ତ୍ରୁଟି ଧରି ପାରୁନାହାନ୍ତି। ଦୁଇଦିନ ପରେ ରଜ ଆସୁଛି। ଏହି ସମୟରେ ପ୍ଲାନେଟାରିୟମକୁ ଅଧିକ ଛାତ୍ରଛାତ୍ରୀ ଓ ପର୍ଯ୍ୟଟକ ଆସିଥାନ୍ତି। କମ୍ପ୍ୟୁଟର ନ ସଜାଡ଼ିଲେ ପ୍ଲାନେଟାରିୟମ କର୍ତ୍ତୃପକ୍ଷ ଲକ୍ଷାଧିକ ଟଙ୍କା ଆୟ କରିବାକୁ ବଞ୍ଚିତ ହେବେ।
କାର୍ଯ୍ୟାଳୟ ପକ୍ଷରୁ ଛାତ୍ରଛାତ୍ରୀ ଏବଂ ପର୍ଯ୍ୟଟକଙ୍କ ନିମନ୍ତେ ବୈଷୟିକ ତ୍ରୁଟି ଯୋଗୁଁ ଶୋ’ ବନ୍ଦ ଥିବା ନେଇ ଆଗୁଆ ସୂଚନା ଦିଆଯାଉ ନାହିଁ। ଛାତ୍ରଛାତ୍ରୀ ଏବଂ ପର୍ଯ୍ୟଟକ ଆସି ଶୋ’ ନ ଦେଖି ଅଯଥାରେ ଖରାରେ ନିରାଶ ହୋଇ ଫେରୁଛନ୍ତି। ଏ ସଂକ୍ରାନ୍ତରେ ପ୍ଲାନେଟାରିୟମ ନିର୍ଦେଶିକା ସଞ୍ଜୁଲତା ବେହେରାଙ୍କୁ ଯୋଗାଯୋଗ କରାଯାଇଥିଲେ ବି ସେ କୌଣସି ପ୍ରତିକ୍ରିୟା ରଖି ନ ଥିଲେ।