ପଡ଼ିଆକୁ ଖସିପଡ଼ିଲା ବିମାନ, ୧୫୭ ମୃତ
ନୂଆଦିଲ୍ଲୀ: ଇଥିଓପିଆରେ ଏକ ବିମାନ ଦୁର୍ଘଟଣାଗ୍ରସ୍ତ ହୋଇଛି। ଏଥିରେ ୧୪୯ ଯାତ୍ରୀ ଏବଂ ୮ ବିମାନ କର୍ମଚାରୀଙ୍କୁ ମିଶାଇ ମୋଟ ୧୫୭ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୪ ଭାରତୀୟ ଥିବା ବୈଦେଶିକ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଥିଲା। ସେମାନଙ୍କ ମଧ୍ୟରେ ଜାତିସଂଘ ପରାମର୍ଶଦାତା ଶିଖା ଗର୍ଗ ରହିଛନ୍ତି। ଏହି ୪ ଜଣ ଭାରତୀୟ ପରିବେଶ ମନ୍ତ୍ରଣାଳୟ ସହ ଜଡ଼ିତ ଥିଲେ।
ଇଥିଓପିଆ ଏୟାରଲାଇନ୍ସ ସୂଚନା ମୁତାବକ, ବିମାନଟି ରବିବାର ସକାଳ ସାଢ଼େ ୮ଟାରେ ଆଡିସ ଆବାବାର ବୋଲେ ଅନ୍ତର୍ଜାତୀୟ ବିମାନ ବନ୍ଦରରୁ ଉଡ଼ାଣ ଆରମ୍ଭ କରିଥିଲା। ଏଥିରେ ୮ ବିମାନ କର୍ମଚାରୀଙ୍କ ସହିତ ୩୫ ଦେଶର ୧୪୯ ଯାତ୍ରୀ ଥିଲେ। ଏହାର ୬ ମିନିଟ ପରେ ବିମାନ ସହ ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ବିମାନଟି ବିସୋଫୁ ସହର ଉପକଣ୍ଠର ଏକ ଗ୍ରାମର ଖୋଲା ପଡ଼ିଆରେ ଖସିପଡ଼ିଥିବା ପରେ ଜଣାପଡ଼ିଥିଲା।
ବୈଦେଶିକ ମନ୍ତ୍ରୀ ସୁଷମା ସ୍ବରାଜ ଘଟଣାକୁ ନେଇ ଅତ୍ୟନ୍ତ ଦୁଃଖିତ ଥିବା କହିବା ସହ ଆମେ ୪ ଭାରତୀୟଙ୍କୁ ହରାଇଛୁ ବୋଲି କହିଛନ୍ତି। ବିମାନ ଦୁର୍ଘଟଣାରେ ପ୍ରାଣ ହରାଇଥିବା ୪ ଭାରତୀୟ ହେଲେ ବୈଦ୍ୟ ପନ୍ନାଗେଶ ଭାସ୍କର, ବୈଦ୍ୟ ହାନ୍ସିନ୍ ଅନ୍ନାଗେଶ, କୁକାଭାରାପୁ ମନିଶା ଏବଂ ଶିଖା ଗର୍ଗ। ନାଇରୋବିରେ ଏକ କାର୍ଯ୍ୟକ୍ରମରେ ଯୋଗଦେବାକୁ ସେମାନେ ଯାଉଥିଲେ। ସେମାନଙ୍କ ପରିବାରକୁ ସହାୟତା ଯୋଗାଇଦେବାକୁ ଇଥିଓପିଆରେ ଥିରେ ଭାରତୀୟ ଉଚ୍ଚାୟୁକ୍ତଙ୍କୁ କୁହାଯାଇଥିବା ସୁଷମା କହିଛନ୍ତି।