ଘର ତାଲା ଭାଙ୍ଗି ଲକ୍ଷାଧିକ ଟଙ୍କା ସମେତ ସୁନା ଅଳଙ୍କାର ଚୋରି

ପିପିଲି: ପିପିଲି ଥାନା ସାତଶଙ୍ଖ ଫାଣ୍ଡି ଅନ୍ତର୍ଗତ କାର୍ତ୍ତିକପଡା ଗ୍ରାମର ବାସୁଦେବ ମେଣ୍ଟାଙ୍କ ଘରୁ ଶନିବାର ବିଳମ୍ବିତ ରାତିରେ ଲକ୍ଷାଧିକ ଟଙ୍କା ସମେତ ୪ଲକ୍ଷରୁ ଊର୍ଦ୍ଧ୍ବ ଟଙ୍କା ମୂଲ୍ୟର ସୁନା ଅଳଙ୍କାର ଚୋରି ହୋଇଥିବା ଅଭିଯୋଗ ହୋଇଛି । ଏ ନେଇ ପିପିଲି ଥାନାରେ ଏକ ମାମଲା ରୁଜୁ ହୋଇଥିବା ବେଳେ ସାଇଣ୍ଟିଫିକ୍‍ ଟିମ୍‍ ଓ ସନ୍ଧାନୀ କୁକୁର ସହାୟତାରେ ପୁଲିସ ଘଟଣାର ତଦନ୍ତ ଚଳାଇବା ସହ ଅଭିଯୁକ୍ତକୁ ଧରିବା ପାଇଁ ଉଦ୍ୟମ ଜାରି ରଖିଛି। ଏହି ଘଟଣାଟି ସ୍ଥାନୀୟ ଅଞ୍ଚଳରେ ଆଲୋଡନ ସୃଷ୍ଟି କରିଥିବା ବେଳେ ସାତଶଙ୍ଖ ଫାଣ୍ଡି ପୁଲିସର ନିଷ୍କ୍ରିୟତା ଯୋଗୁ ଅଞ୍ଚଳରେ ଆପରାଧିକ କାର୍ଯ୍ୟକଳାପ ଦିନକୁ ଦିନ ବୃଦ୍ଧି ପାଉଥିବା ଅଭିଯୋଗ ହୋଇଛି।

ଅଭିଯୋଗ ଅନୁଯାୟୀ, ବୀରପୁରୁଷୋତ୍ତମପୁର ନିକଟ କାର୍ତ୍ତିକପଡା ଗ୍ରାମର ବାସୁଦେବ ମେଣ୍ଟାଙ୍କ ପରିବାର ଲୋକେ ଶନିବାର ରାତିରେ ଖାଇସାରି ଶୋଇଥିଲେ। ବିଳମ୍ବିତ ରାତିରେ ତାଙ୍କ ବୋଉ ଉଠିଥିବାବେଳେ ଘରର ଦ୍ୱାର ସବୁ ଖୋଲା ହୋଇଥିବା ଓ ପରିବାର ସଦସ୍ୟମାନେ ଶୋଇଥିବା ଘରର ଦ୍ୱାର ବାହାରପଟୁ ବନ୍ଦ ହୋଇଥିବା ଦେଖିବାକୁ ପାଇଥିଲେ । ତାଙ୍କର ମୂଲ୍ୟବାନ ଜିନିଷ ଥିବା ଘରର ତାଲା ଭଙ୍ଗା ଯାଇଥିବା ବେଳେ ଘରର ସମସ୍ତ ଲାଇଟ୍‍ ବନ୍ଦ ଥିବା ଦେଖି ସେ ପରିବାର ଲୋକଙ୍କୁ ଡାକିଥିଲେ। ତାଲା ଭଙ୍ଗା ଯାଇଥିବା ଘର ମଧ୍ୟରେ ଥିବା ଆଲମିରାରୁ ୧ଲକ୍ଷ ୧୧ହଜାର ଟଙ୍କା ସମେତ ବିଭିନ୍ନ ସୁନା ଅଳଙ୍କାର ଚୋରି ହୋଇଥିବା ଜଣାପଡିଥିଲା। ଘରକୁ ଲାଗି ଏକ ନିଶୁଣି ପଡିଥିବା ବେଳେ ଉକ୍ତ ନିଶୁଣି ଦେଇ କେହି ଦୁର୍ବୃତ୍ତ ଘର ମଧ୍ୟରେ ପ୍ରବେଶ କରି ଚୋରି କରିଥିବା ସନ୍ଦେହ କରାଯାଉଛି । ଖବର ପାଇ ପିପିଲି ଥାନା ଆଇଆଇସି ସୌମେନ୍ଦୁ ଶେଖର ତ୍ରିପାଠୀ, ତଦନ୍ତକାରୀ ଅଧିକାରୀ ଏସ୍‍ଆଇ ଦୀପକ କୁମାର ନାୟକ ଘଟଣାସ୍ଥଳରେ ପହଞ୍ଚି ସାଇଣ୍ଟିଫିକ୍‍ ଟିମ୍‍ ଓ ସନ୍ଧାନୀ କୁକୁର ସହାୟତାରେ ତଦନ୍ତ କରିଥିଲେ।