ପିପିଲି: ପିପିଲି ଓ ଏହାର ଆଖପାଖ ଅଞ୍ଚଳରେ ଶୁକ୍ରବାର ସକାଳ ସାଢେ ୯ଟାରେ କାଳବୈଶାଖୀ ପ୍ରଭାବରେ ବଜ୍ରପାତସହ ପ୍ରବଳ ମାତ୍ରାରେ ବର୍ଷା ଓ ପବନ ହୋଇଛି। ଏଥିଯୋଗୁଁଁ ବିଦ୍ୟୁତ ସରବରାହରେ ବ୍ୟାଘାତ ସୃଷ୍ଟି ହେବା କାରଣରୁ ୧ଘଣ୍ଟା ପର୍ଯ୍ୟନ୍ତ ପିପିଲି ପୌରାଞ୍ଚଳ ଅନ୍ଧକାର ମଧ୍ୟରେ ରହିଥିଲା। ଏହି ବର୍ଷା ଓ ପବନ ଯୋଗୁଁଁ କେତେକ ସ୍ଥାନରେ ମେଳଣ ଅବସରରେ ଚାଲିଥିବା ଯାତ୍ରାପାର୍ଟିର ଟେଣ୍ଟ ଭାଙ୍ଗି ଯାଇଥିବା ସୂଚନା ମିଳିଛି। ଦୀର୍ଘ ଏକ ଘଣ୍ଟା ଧରି ପ୍ରବଳ ମାତ୍ରାରେ ବର୍ଷା ହୋଇଥିବାବେଳେ ଗ୍ରୀଷ୍ମପ୍ରବାହରୁ ଲୋକେ ତ୍ରାହି ପାଇଛନ୍ତି। କେତେକ ସ୍ଥାନରେ ପବନରେ ଗଛ ଭାଙ୍ଗି ଯାଇଥିବା ସୂଚନା ମିଳିଛି। ପନିପରିବା ଫସଲରେ ମଧ୍ୟ ଏଥିରେ ବ୍ୟାପକ ଭାବେ କ୍ଷତି ଘଟିଛି। ବିଭିନ୍ନ ବ୍ୟବସାୟ ପ୍ରତିଷ୍ଠାନର ହୋର୍ଡିଂ ସବୁ ପବନରେ କ୍ଷତିଗ୍ରସ୍ତ ହୋଇଛି। ପିପିଲିର ସାପ୍ତାହିକ ହାଟରେ ବ୍ୟବସାୟୀ ଓ ଚାଷୀମାନେ ଏହି କାଳବୈଶାଖୀ ବର୍ଷା ଓ ପବନ ଯୋଗୁଁଁ ବିଶେଷ କ୍ଷତିଗ୍ରସ୍ତ ହୋଇଥିବା ସୂଚନା ମିଳିଛି। ହାଟ ମଧ୍ୟରେ କେତେକ ଦୋକାନ ସମ୍ମୁଖରେ ଲାଗିଥିବା ଜରିପାଲ ସବୁ ପବନରେ ଫାଟି ଉଡିଯାଇଥିବା ପରିଲକ୍ଷିତ ହୋଇଛି। ବହୁ ଦୋକାନର ପନିପରିବା ସବୁ ବର୍ଷା ଜଳରେ ଭାସୁଥିବା ଦେଖିବାକୁ ମିଳିଛି।
Comments are closed.