ପିପିଲି: ଆସନ୍ତା ୨୪ ତାରିଖରେ ହେବାକୁ ଥିବା ପିପିଲି ବିଜ୍ଞାପିତ ଅଞ୍ଚଳ ପରିଷଦ(ଏନ୍ଏସି) ନିର୍ବାଚନ ପାଇଁ ବୁଧବାରଠାରୁ ନାମାଙ୍କନ ଦାଖଲ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଦ୍ୱିତୀୟ ଦିନ ଗୁରୁବାର ସୁଦ୍ଧା କେହି ପ୍ରାର୍ଥୀପତ୍ର ଦାଖଲ କରିନଥିବା ସୂଚନା ମିଳିଛି। ତେବେ ଏଠାକାର ତିନି ପ୍ରମୁଖ ରାଜନୈତିକ ଦଳ ବିଜେଡି, ବିଜେପି ଓ କଂଗ୍ରେସ ଦଳ ପକ୍ଷରୁ ପୌର ଅଧ୍ୟକ୍ଷ ଆସନ ସମେତ ବିଭିନ୍ନ ୱାର୍ଡରେ କାଉନସିଲର ଆସନ ନିମନ୍ତେ ଦଳୀୟ ପ୍ରାର୍ଥୀ ଚୟନ ପ୍ରକ୍ରୀୟା ଚୁଡାନ୍ତ ପର୍ଯ୍ୟାୟରେ ପହଞ୍ଚିଥିବା ସୂଚନା ମିଳିଛି। ଏହି ନିର୍ବାଚନ ପାଇଁ ପିପିଲି ଏନ୍ଏସିରେ ରାଜନୈତିକ ଉଷ୍ମତା ବୃଦ୍ଧି ପାଇଥିବା ବେଳେ ପୌରାଧ୍ୟକ୍ଷ ଆସନ ସମେତ ଏନ୍ଏସିରେ ବିଜୟଲାଭ କରିବା ପାଇଁ ସମସ୍ତ ରାଜନୈତିକ ଦଳ ପକ୍ଷରୁ ଜୋରଦାର କସରତ ଚାଲିଛି। ଆସନ୍ତା ୨୪ ତାରିଖରେ ପିପିଲି ବିଜ୍ଞାପିତ ଅଞ୍ଚଳ ପରିଷଦ(ଏନଏସି)ର ୧୬ଗୋଟି ୱାର୍ଡର ୭ହଜାର ୯୪୫ ଜଣ ପୁରୁଷ ଭୋଟର ଓ ୭ହଜାର ୫୫୬ ଜଣ ମହିଳା ଭୋଟରଙ୍କୁ ମିଶାଇ ମୋଟ୍ ୧୫ ହଜାର ୫୦୧ ଜଣ ଭୋଟର ନିଜର ମତଦାନ ସାବ୍ୟସ୍ତ କରିବେ। ଚଳିତଥର ନଗରପାଳ ଆସନ ପାଇଁ ସିଧାସଳଖ ନିର୍ବାଚନ ହେବ। ନିର୍ବାଚନରେ ଇଭିଏମରେ ଭୋଟରମାନେ ନିଜର ମତାଧିକାର ସାବ୍ୟସ୍ତ କରିବେ। ଏଥିପାଇଁ ପ୍ରତ୍ୟେକ ବୁଥରେ ଦୁଇଟି ଇଭିଏମ ରହିବ। ଗୋଟିଏରେ ନଗରପାଳ ଆସନ ପାଇଁ ଓ ଦି୍ୱତୀୟଟିରେ କାଉନସିଲର ଆସନ ପାଇଁ ଭୋଟରମାନେ ମତଦାନ କରିବେ। ପିପିଲି ଏନ୍ଏସିର ୧୬ଟି ୱାର୍ଡର ୧୩ଟି ସ୍ଥାନରେ ୨୦ଟି ମତଦାନ କେନ୍ଦ୍ର କରାଯାଇଥିବା ନେଇ ନିର୍ବାଚନ ଅଧିକାରୀ ଦାୟିତ୍ୱରେ ଥିବା ପିପିଲି ତହସିଲଦାର ସପନ କୁମାର ନନ୍ଦ ସୂଚନା ଦେଇଛନ୍ତି।
Popular Categories
Previous article
Next article