ପାଟଣା : କେନ୍ଦୁଝର ଜିଲ୍ଲା ପାଟଣା ବ୍ଲକ ଅନ୍ତର୍ଗତ ଖିରେଇ ଟାଙ୍ଗିରି ଗ୍ରାମ ପଞ୍ଚାୟତର ନୂଆଗାଁ ଗ୍ରାମକୁ ଯାଇଥିବା ମେଗା ପାନୀୟ ଜଳ ପ୍ରକଳ୍ପର ପାଇପ ଗୁଡିକ ବିଲ ମଝିରେ ପଡି ରହିଥିବା ଯୋଗୁଁ ଚାଷ କାର୍ଯ୍ୟ କରିବାରେ ଅସୁବିଧା ଦେଖା ଦେଇଛି । ପାଣି ପାଇପକୁ ଭିତରେ ପୋତି ନେବାର ଯୋଜନା ରହିଥିଲେ ମଧ୍ୟ ବର୍ତ୍ତମାନ ସୁଦ୍ଧା ଠିକା ସଂସ୍ଥା ପାଇପକୁ ମାଟି ଭିତରେ ପୋତୁ ନାହିଁ । ଯାହା ଫଳରେ ବର୍ତ୍ତମାନ ଧାନ ଚାଷ କରିବାର ସମୟ ଆସିଯାଇଥିବା ଯୋଗୁଁ ଚାଷୀ ଚାଷ କରିବାରେ ଅସୁବିଧାର ସମ୍ମୁଖୀନ ହେବା ସହ କାମ ମଧ୍ୟ ବିଳମ୍ବିତ ହେଉଛି । ତାସହିତ ପାଇପ ଉପରେ ପଡି ରହିଲେ ଚୋରି ହେବାର ଭୟ ମଧ୍ୟ ରହିଛି । ଚାଷୀ ମଧ୍ୟ ଚାଷ କରିବା ପୂର୍ବରୁ ପାଇପକୁ ମାଟି ତଳେ ପୋତିଦେବା ପାଇଁ ଠିକା ସଂସ୍ଥାକୁ ଅନୁରୋଧ କରିଛନ୍ତି । ତେଣୁ ଏହି ଠିକା ସଂସ୍ଥା ଯଥାଶୀଘ୍ର ପାଣି ପାଇପକୁ ମାଟି ଭିତରେ ପୋତି ଦେଲେ ଚାଷୀ ଚାଷ କାର୍ଯ୍ୟରେ ଅସୁବିଧାର ସମ୍ମୁଖୀନ ହେବେ ନାହିଁ ବୋଲି କହୁଛନ୍ତି । ଯଥାଶୀଘ୍ର ଏହାର ସମାଧାନ ନ କଲେ ଚାଷୀ ଚାଷ କଲେ ପାଣି ପାଇପ ନଷ୍ଟ ହୋଇଯିବାର ଯଥେଷ୍ଟ ସମ୍ଭାବନା ରହିଛି । ନୂଆଗାଁ ରେ ପାନୀୟ ଜଳର ଉତ୍କଟ ସମସ୍ୟା ରହିଥିବା ଯୋଗୁଁ ପାଣି ପାଇପ ନଷ୍ଟ ହୋଇଗଲେ ଗ୍ରାମବାସୀ ପାଣି ସମସ୍ୟା ଭୋଗ କରିବେ ବୋଲି ଜଣାଯାଇଛି । ତେଣୁ ତୁରନ୍ତ ଏହାର ପ୍ରତିକାର କରିବା ପାଇଁ ସାଧାରଣରେ ଠିକା ସଂସ୍ଥାକୁ ଅନୁରୋଧ କରିଛନ୍ତି ।
Comments are closed.