ଭୁବନେଶ୍ବର: କରୋନା ଭୂତାଣୁ ସାରା ବିଶ୍ବର ମେରୁଦଣ୍ଡକୁ ଦୋହଲାଇ ଦେଇଛି। ପ୍ରତିଦିନ ହଜାର ହଜାର ଲୋକ ଏଥିରେ ଆକ୍ରାନ୍ତ ହୋଇ ପ୍ରାଣ ହରାଉଛନ୍ତି। ଭାରତରେ ସ୍ଥିତି ମଧ୍ୟ ଗମ୍ଭୀର ରହିଛି। ଓଡ଼ିଶାରେ କରୋନା ଉପରେ କାବୁ ପାଇବାକୁ ରାଜ୍ୟ ସରକାର ପ୍ରାଣପଣେ ଉଦ୍ୟମ ଜାରି ରଖିଛନ୍ତି। ଲକଡାଉନ ସାଙ୍ଗକୁ ସାମାଜିକ ଦୂରତ୍ଵ ରକ୍ଷା କରିବାକୁ ରାଜ୍ୟବାସୀଙ୍କୁ ଅନୁରୋଧ କରୁଛନ୍ତି। କିନ୍ତୁ ଲୋକେ ମାନିବାକୁ ନାରାଜ। କୌଣସି ଉପାନ୍ତ ଅଞ୍ଚଳ କଥା ନୁହେଁ, ଶିଖିତ ସହର କୁହାଯାଉଥିବା ଖୋଦ ରାଜଧାନୀ ଭୁବନେଶ୍ବରରେ ଲୋକେ କରୋନା ବିଷୟରେ ସଚେତନ ନ ଥିବା ଦେଖାଯାଉଛି। ଭୁବନେଶ୍ବର ରାଜ୍ୟର ସବୁ ବଡ଼ କରୋନା ହଟ୍ସ୍ପଟ ଭାବେ ଚିହ୍ନଟ ହୋଇଛି। ଓଡ଼ିଶାରେ ୬୦ ଆକ୍ରାନ୍ତ ଚିହ୍ନଟ ହୋଇଥିବାବେଳେ ଅର୍ଦ୍ଧାଧିକ ହେଉଛନ୍ତି ଭୁବନେଶ୍ବରର। କିନ୍ତୁ ଏଠାରେ ସାମାଜିକ ଦୂରତ୍ଵ ସମ୍ପୂର୍ଣ୍ଣ ଫେଲ ମାରିଛି। ଲୋକେ ସଚେତନ ହୋଇ କରୋନା ଯୁଦ୍ଧରେ ସାମିଲ ହେବା ବଦଳରେ ବିପଦକୁ ଟାଣି ଆଣିବାରେ ବେଶୀ ଉତ୍ସୁକତା ଦେଖାଉଛନ୍ତି। ବୁଧବାର ରାଜଧାନୀର ବିଭିନ୍ନ ସ୍ଥାନରେ ଦେଖିବାକୁ ମିଳିଥିବା କେତେକ ଦୃଶ୍ୟ ଏହା ବୟାନ କରୁଛି।
ବୁଧବାର ପୂର୍ବାହ୍ନରେ ଭୁବନେଶ୍ବର ଆଇଆରସି ଭିଲେଜ ଏନ-୩ରେ କିଛି ଆଶ୍ଚର୍ଯ୍ୟ କଲାଭଳି ଦୃଶ୍ୟ ଦେଖିବାକୁ ମିଳିଥିଲା। ରାସନ ସାମଗ୍ରୀ ପାଇଁ ଲୋକେ ଲମ୍ବା ଧାଡ଼ିରେ ଛିଡ଼ା ହୋଇଥିଲେ। କିନ୍ତୁ କେହି ଜଣେ ହେଲେ ସାମାଜିକ ଦୂରତା ରଖି ନ ଥିଲେ। ପରସ୍ପର ସହିତ ଅତି ନିକଟତର ହୋଇ ଛିଡ଼ା ହୋଇଥିଲେ। ଅଧିକାଂଶଙ୍କ ମୁହଁରେ ମାସ୍କ କିମ୍ବା ରୁମାଲ ନ ଥିଲା। ରାସନ ବଣ୍ଟନ ହେଉଥିବା ସ୍ଥାନ ଲୋକାରାଣ୍ୟ ହୋଇପଡ଼ିଥିଲା। ଶତାଧିକ ମହିଳା ପୁରୁଷ ଗୋଟିଏ ଜାଗାରେ ଏକାଠି ହୋଇଥିଲେ। କେବଳ ଏହି ଗୋଟିଏ ସ୍ଥାନ ନୁହେଁ, ଟଙ୍କା ଉଠାଇବା ପାଇଁ ମଧ୍ୟ ଲୋକ ଏଟିଏମ ଆଗରେ ଭିଡ଼ ଜମାଇଥିଲେ। ପରସ୍ପରକୁ ଲାଗି ଧାଡ଼ିରେ ଛିଡ଼ା ହୋଇଥିବା ଦେଖିବାକୁ ମିଳିଥିଲା।
