ଡେସ୍କ: ଆଜି (ଶନିବାର) ସଂସଦର ଉଭୟ ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ରଖାଯାଇଛି। ରାଜ୍ୟସଭା ଓ ଲୋକସଭାର ମିଳିତ ଅଧିବେଶନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଅଭିଭାଷଣ ସହ ଜାନୁଆରୀ ୩୧ରେ ସଂସଦର ବଜେଟ୍ ଅଧିବେଶନ ଆରମ୍ଭ ହୋଇଥିଲା। ଆଜି ସମାପନ ଭାଷଣରେ ଲୋକସଭା ବାଚସ୍ପତି ଓମ୍ ବିର୍ଲା କହିଥିଲେ ଯେ ଚଳିତ ଅଧିବେଶନରେ ୯୭ ପ୍ରତିଶତ କାର୍ଯ୍ୟ ହୋଇଥିବା ରେକର୍ଡ କରାଯାଇଛି, ଯାହା କି ଗତ ୫ଟି ଲୋକସଭାରେ ସର୍ବାଧିକ। ସେ କହିଛନ୍ତି ଯେ ସପ୍ତଦଶ ଲୋକସଭାରେ ୨୨୨ଟି ବିଲ୍ ଗୃହୀତ ହୋଇଥିଲା ଏବଂ ଗୃହ ନିର୍ଦ୍ଧାରିତ ସମୟ ଠାରୁ ୩୪୫ ଘଣ୍ଟା ଅଧିକ କାମ କରିଥିଲା। ତେବେ ଲୋକସଭାରେ ବାଧା ସୃଷ୍ଟି ହେବାରୁ ସମୁଦାୟ ୩୮୭ ଘଣ୍ଟା ନଷ୍ଟ ହୋଇଛି ବୋଲି ସେ କହିଛନ୍ତି।
ରାଜ୍ୟସଭାରେ ଅଧ୍ୟକ୍ଷ ଜଗଦୀପ ଧନଖଡ଼ ତାଙ୍କ ସମାପନୀ ଭାଷଣରେ କହିଛନ୍ତି ଯେ ଅଧିବେଶନରେ ମୋଟ କାର୍ଯ୍ୟ ସଫଳତା ୧୩.୭ ପ୍ରତିଶତ ଥିଲା। ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ଏବଂ ଅନ୍ତରୀଣ କେନ୍ଦ୍ର ବଜେଟ୍ ଉପରେ ଆଲୋଚନା ବ୍ୟତୀତ ଗୃହରେ ୭ଟି ବିଲ୍ ମଧ୍ୟ ଗୃହୀତ ହୋଇଛି। ସେଗୁଡ଼ିକ ମଧ୍ୟରେ ସର୍ବସାଧାରଣ ପରୀକ୍ଷାରେ ଅନ୍ୟାୟ ଉପାୟ ନିବାରଣ ବିଲ୍, ଜଳ ପ୍ରଦୂଷଣ ନିବାରଣ ଓ ନିୟନ୍ତ୍ରଣ ବିଲ୍, ଜମ୍ମୁ-କଶ୍ମୀର ସ୍ଥାନୀୟ ସଂସ୍ଥା ଆଇନ ସଂଶୋଧନ ବିଲ୍ ରହିଛି।
ପାକିସ୍ତାନକୁ ଝଟକା – ନିର୍ବାଚନ ପ୍ରକ୍ରିୟାର ତଦନ୍ତ ଦାବି କଲେ ଆମେରିକା ଓ ବ୍ରିଟେନ
