ଭୁବନେଶ୍ୱର: କାର୍ଯ୍ୟରତ ସାମ୍ବାଦିକଙ୍କ ପାଇଁ ଉଦ୍ଦିଷ୍ଟ ଗୋପବନ୍ଧୁ ସ୍ବାସ୍ଥ୍ୟବୀମା େଯାଜନାରେ ସାମ୍ବାଦିକଙ୍କ ପିତାମାତାଙ୍କୁ ସାମିଲ କରିବାକୁ ଉତ୍କଳ ସାମ୍ବାଦିକ ସଂଘ ଦାବି କରିଛି। ଏନେଇ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯିବା ସହ ସୂଚନା ଓ ଲୋକସମ୍ପର୍କ ବିଭାଗ ନିର୍ଦେଶକଙ୍କୁ ସଂଘ ପକ୍ଷରୁ ସ୍ମାରକପତ୍ର ପ୍ରଦାନ କରାଯାଇଛି। ଉତ୍କଳ ସାମ୍ବାଦିକ ସଂଘ ରାଜ୍ୟ ସଭାପତି ବିଭୂତି ଭୂଷଣ କର କହିଛନ୍ତି ଯେ ସାମ୍ବାଦିକଙ୍କୁ ଗୋପବନ୍ଧୁ ସ୍ବାସ୍ଥ୍ୟ ବୀମା ଯୋଜନାରେ ଯୋଡିବା ପାଇଁ ଏବେ ଅନ୍ ଲାଇନ୍ ଆବେଦନ ପ୍ରକିୟା ଆରମ୍ଭ ହୋଇଛି । ମାତ୍ର ଏଥିରେ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାର ହିତାଧିକାରୀ ଥିବା ସାମ୍ବାଦିକ ମାନେ ଆବେଦନ କରି ନ ପାରିବା ଭଳି ବ୍ୟବସ୍ଥା ରହିଛି। ଏକ ଆକଳନରୁ ଜଣାପଡିଛି କି,ଏହି ଧାରାରେ ସମଗ୍ର ରାଜ୍ୟର ପ୍ରାୟ ୩୦ଭାଗ ସାମ୍ବାଦିକ ଆବେଦନ ପାଇଁ ଅଯୋଗ୍ୟ ବିବେଚିତ ହେବେ। ଯାହାକି, ପୂର୍ବରୁ ବୀମା ତାଲିକାରେ ଥିବା ସାମ୍ବାଦିକଙ୍କୁ ବ୍ୟଥିତ କରିଛି। ପ୍ରସ୍ତୁତ ତାଲିକାଟି ସାମ୍ବାଦିକଙ୍କ ଚିହ୍ନଟ ସମ୍ପର୍କିତ ଏକ ଡାଟା ବେସ୍ ସଦୃଶ ହୋଇଥିବାରୁ ଯଦି ଏହି ତାଲିକାରୁ ବହୁ ସଖ୍ୟକ ସାମ୍ବାଦିକ ବାଦ ପଡିବେ। ଏହାଦ୍ୱାରା ରାଜ୍ୟରେ କାର୍ଯ୍ୟରତ ସାମ୍ବାଦିକ ମାନଙ୍କର ଏକ ପୂର୍ଣ୍ଣାଙ୍ଗ ତାଲିକା ପାଇବାରୁ ସରକାର ମଧ୍ୟ ବଞ୍ଚିତ ହେବେ।
ଏ ପ୍ରସଙ୍ଗକୁ ମଧ୍ୟ ଟ୍ବିଟ ଯୋଗେ ସଂଘ ପକ୍ଷରୁ ମୁଖ୍ୟମନ୍ତ୍ରୀଙ୍କୁ ଅବଗତ କରାଯାଇଛି। ଏହାଛଡା ସାମ୍ବାଦିକଙ୍କ ପିତାମାତାଙ୍କୁ ବୀମାଭୁକ୍ତ କରିବା ଏବଂ ଅବସରକାଳୀନ ଭତ୍ତା ପ୍ରଦାନ କରିବାକୁ ଦାବି କରାଯାଇଛି ବୋଲି ଶ୍ରୀ କର କହିଛନ୍ତି। ଏ ନେଇ ପ୍ରତିନିଧି ମଣ୍ଡଳୀ ସୂଚନା ଓ ଲୋକସମ୍ପର୍କ ବିଭାଗ ନିର୍ଦେଶକ ସରୋଜ କୁମାର ସାମଲଙ୍କୁ ସାକ୍ଷାତ କରି ବିହିତ ପଦକ୍ଷେପ ଗ୍ରହଣ ପାଇଁ ଦାବି କରିଛନ୍ତି। ବିଭାଗୀୟ ନିର୍ଦେଶକ ସମ୍ପୃକ୍ତ ପ୍ରସଙ୍ଗରେ ବିହିତ ପଦକ୍ଷେପ ନେବେ ବୋଲି କହିଥିଲେ। ପ୍ରତିନିଧି ମଣ୍ଡଳରେ ସଂଘର ସାଧାରଣ ସମ୍ପାଦକ ବେଣୁଧର ପଣ୍ଡା, କୋଷାଧ୍ୟକ୍ଷ ରାଜେନ୍ ଚୌଧୁରୀ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଲଲାଟେନ୍ଦୁ ସେନାପତି ପ୍ରମୁଖ ସାମିଲ ଥିଲେ।
