ୱାକ୍‌ଫ ବିଲ୍ ପାସ୍‌ ହେବାପରେ ମଧ୍ୟପ୍ରଦେଶରେ ପ୍ରଥମ ବଡ଼ କାର୍ଯ୍ୟାନୁଷ୍ଠାନ; ୨୦ ବର୍ଷର ମଦ୍ରାସା ଉପରେ ଚାଲିଲା ବୁଲଡୋଜର

ଭୋପାଳ: ଦେଶରେ ୱାକ୍‌ଫ ଆଇନ କାର୍ଯ୍ୟକାରୀ ହେବାପରେ ମଧ୍ୟପ୍ରଦେଶରେ ପ୍ରଥମ ଥର ପାଇଁ କୌଣସି ବେଆଇନ ମଦ୍ରାସା ଉପରେ ବୁଲଡୋଜର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ନିକଟରେ ବିଜେପି ରାଜ୍ୟ ସଭାପତି ବିଷ୍ଣୁ ଦତ୍ତ ଶର୍ମା ଅଭିଯୋଗ କରିଥିଲେ ଯେ, ସରକାରୀ ଜମିରେ ଏକ ବେଆଇନ ମଦ୍ରାସା ନିର୍ମାଣ କରି ବେଆଇନ କାର୍ଯ୍ୟକଳାପ କରାଯାଉଛି। ଏହି ଅଭିଯୋଗ ଆଧାରରେ ପ୍ରଶାସନ ମଦ୍ରାସାକୁ ଏକ ନୋଟିସ ପଠାଇଥିଲା ଏବଂ ରବିବାର ସକାଳେ ଏହାକୁ ଭାଙ୍ଗିବା ପ୍ରକ୍ରିୟା ଆରମ୍ଭ ହୋଇଥିଲା।

କୁହାଯାଉଛି ଯେ, ଏହି ମଦ୍ରାସା ଗତ ୨୦ ବର୍ଷ ଧରି ପରିଚାଳିତ ହେଉଥିଲା। ଏହାକୁ ନେଇ ପୂର୍ବରୁ ଅନେକ ଥର ଆପତ୍ତି ଏବଂ ଅଭିଯୋଗ ହୋଇଛି। ତେବେ ଏହି କୋଠାର ମାଲିକ ମହମ୍ମଦ ନସିମ ​​କହିଛନ୍ତି ଯେ, ସେ ନିଜେ ବେଆଇନ ଅଂଶ ହଟାଉଛନ୍ତି। ଏବେ ଏହି ବୁଲଡୋଜର କାର୍ଯ୍ୟାନୁଷ୍ଠାନକୁ ନେଇ ହଇଚଇ ସୃଷ୍ଟି ହୋଇଛି।

ସୂଚନା ଅନୁସାରେ, ପନ୍ନାର ୱାର୍ଡ ନମ୍ବର ୨୬ରେ ସରକାରୀ ଜମିରେ ୨୦ ବର୍ଷ ପୂର୍ବେ ଏକ ମଦ୍ରାସା ନିର୍ମିତ ହୋଇଥିଲା। ଏ ସମ୍ପର୍କରେ ବିଜେପି ରାଜ୍ୟ ସଭାପତିଙ୍କ ନିକଟରେ ଅଭିଯୋଗ କରାଯାଇଥିଲା। ଅଭିଯୋଗରେ ଦର୍ଶାଯାଇଥିଲା ଯେ, ସରକାରୀ ଜମିରେ ବେଆଇନ ଭାବେ ମଦ୍ରାସା ନିର୍ମାଣ କରି ବେଆଇନ କାର୍ଯ୍ୟକଳାପ କରାଯାଉଛି। ଅଭିଯୋଗ ପରେ ତହସିଲଦାର ମଦ୍ରାସା ପରିଚାଳକଙ୍କୁ ଏକ ନୋଟିସ ପଠାଇଥିଲେ। ନୋଟିସ୍ ପାଇବା ମାତ୍ରେ ପରିଚାଳକଙ୍କ ମଧ୍ୟରେ ହଇଚଇ ସୃଷ୍ଟି ହୋଇଥିଲା। ସେମାନେ ନିଜେ ବୁଲଡୋଜର ଡାକି ମଦ୍ରାସାକୁ ଭାଙ୍ଗି ଦେଇଛନ୍ତି।