କଲ୍ୟାଣସିଂହପୁର: ତ୍ରିସ୍ତରୀୟ ପଞ୍ଚାୟତ ନିର୍ବାଚନର ତୃତୀୟ ପର୍ଯ୍ୟାୟ ମତଦାନ ଚଳିତ ମାସ ୨୦ ତାରିଖରେ ଅନୁଷ୍ଠିତ ହେବାକୁ ଯାଉଛି । କଲ୍ୟାଣସିଂହପୁର ବ୍ଲକରେ ନିର୍ବାଚନ ସରଗରମ ଥିବା ବେଳେ ମାଓବାଦୀଙ୍କ ଗତିବିଧିକୁ ଲକ୍ଷ୍ୟ କରି ୫୩ଟି ବୁଥ୍ ସମ୍ବେଦନଶୀଳ, ୩୫ଟି ବୁଥ୍ ଅତିସମ୍ବେଦନଶୀଳ ଓ ୮୨ଟି ଅଣସମ୍ବେଦନଶୀଳ ବୁଥ୍ ରହିଥିବା ବିଶେଷ ସୂତ୍ରରୁ ପ୍ରକାଶ ପାଇଛି । ବ୍ଲକରେ ୧୪ଟି ପଞ୍ଚାୟତର ୨ଟି ଜୋନରେ ୧୭୦ ବୁଥରେ ମତଦାନ ବା ଭୋଟ ହେବ। ଏଥିରେ ଦୁର୍ଗମ ନିୟମଗିରି ପାହାଡରେ ମାଓବାଦୀ ପ୍ରବଣ ଅଞ୍ଚଳ ରହିଥିବାରୁ ପାର୍ଶାଲି ପଞ୍ଚାୟତର ୧୧ବୁଥରୁ ୯ବୁଥରେ ମତଦାନ ହେବ । ଡଙ୍ଗମାଟି ବୁଥକୁ ବୁଡୁଣୀ ଓ ଗୁମ୍ମା ବୁଥକୁ ଚାଟିକଣା ବୁଥ ସ୍ଥାନାନ୍ତର କରାଯାଇଛି । ଏହାକୁ ଜିଲା ନିର୍ବାଚନ ଅଧିକାରୀ ତଥା ଜିଲାପାଳ ସରୋଜ କୁମାର ମିଶ୍ର କରିଥିବା ସ୍ଥାନୀୟ ନିର୍ବାଚନ ଅଧିକାରୀ ମାନସ ରଞ୍ଜନ ପ୍ରଧାନ କହିଛନ୍ତି ।
ବ୍ଲକରେ ମୋଟ ୪୫୫୭୬ ଜଣ ଭୋଟର ରହିଛନ୍ତି । ସେଥିରୁ ‘କ’ ଜୋନରେ ୨୧୪୬୮ ଜଣ ଭୋଟର , ‘ଖ’ ଜୋନରେ ୨୪୦୯୪ ଓ ୧୪ ଜଣ ଉଭୟ ଲିଙ୍ଗି ଭୋଟର ରହିଛନ୍ତି । ଏଥିରେ ୧୪ ଟି ସମିତି ସଭ୍ୟ ମଧ୍ୟରୁ ଗୋଟିଏ ସୁନାଖଣ୍ଡି ପଞ୍ଚାୟତର ସମିତି ସଭ୍ୟ ନିର୍ଦ୍ୱନ୍ଦରେ ନିର୍ବାଚିତ ହୋଇଥିବା ବେଳେ ବଳକା ୧୩ଟି ସମିତି ସଭ୍ୟ, ୧୪ଟି ସରପଞ୍ଚ ପ୍ରାର୍ଥୀ, ୧୭୦ ୱାର୍ଡ ସଦସ୍ୟ ମଧ୍ୟରୁ ୬୩ ଟି ୱାର୍ଡ଼ ସଦସ୍ୟ ନିର୍ଦ୍ୱନ୍ଦରେ ନିର୍ବାଚିତ ହୋଇଥିବା ବେଳେ ୧୦୭ଟି ୱାର୍ଡ ସଦସ୍ୟ ପାଇଁ ଓ ଦୁଇଟି ଜିଲାପରିଷଦ ସଦସ୍ୟ ନିର୍ବାଚିତ ହେବାକୁ ରହିଛି । ଏଥିପାଇଁ ୪୫ ସରପଞ୍ଚ, ୩୪ ସମିତିସଭ୍ୟ, ୨୫୩ ୱାର୍ଡ ସଦସ୍ୟ, (କ)ଜୋନରେ ୬ ଓ (ଖ) ଜୋନରେ ୪ ଜଣ ପ୍ରାର୍ଥୀ ନିର୍ବାଚନ ରଣାଙ୍ଗନକୁ ଓହ୍ଲାଇଛନ୍ତି । ଅତି ସମ୍ବେଦନଶୀଳ ବୁଥରେ ଅଧିକ ପୁଲିସ ମୁତୟନ କରିବା ସହ ସିସିଟିଭି ଲଗାଇ ମତଦାନ କରାଯିବ ବୋଲି ପଞ୍ଚାୟତ ନିର୍ବାଚନ ଅଧିକାରୀ ମାନସ ରଞ୍ଜନ ପ୍ରଧାନ, ବିଡିଓ ସୁଧାକର ରଇତ ସୂଚନା ଦେଇଛନ୍ତି ।
