ନୂଆଦିଲ୍ଲୀ: ପାକିସ୍ତାନରୁ ଡାକ୍ତରୀ ଡିଗ୍ରୀ ହାସଲ କରୁଥିବା ଛାତ୍ରଛାତ୍ରୀଙ୍କୁ ଭାରତରେ ବୃତ୍ତି ପାଇଁ ଅନୁମତି ମିଳିବ ନାହିଁ। ଏ ସମ୍ପର୍କରେ ଭାରତୀୟ ଡାକ୍ତରୀ ପରିଷଦ (ଏମ୍ସିଆଇ) ପକ୍ଷରୁ ବିଧିବଦ୍ଧ ବିଜ୍ଞପ୍ତି ପ୍ରକାଶ ପାଇଛି। କେବଳ ଡାକ୍ତରୀ ନୁହେଁ; ପାକିସ୍ତାନୀ ମେଡିକାଲ କଲେଜର ଯେ କୌଣସି ଡିଗ୍ରୀ ଭାରତରେ ବେଆଇନ ହେବ। କାଶ୍ମୀରର ବହୁ ଛାତ୍ରଛାତ୍ରୀ ପାକିସ୍ତାନ ଅଧିକୃତ କାଶ୍ମୀର (ପିଓକେ)ସ୍ଥିତ ମେଡିକାଲ କଲେଜରେ ଡାକ୍ତରୀ ପଢ଼ୁଛନ୍ତି। ଏହି ଅଞ୍ଚଳକୁ ପାକିସ୍ତାନ ବେଆଇନ ଭାବେ ଦଖଲ କରିରଖିଥିବାରୁ ଏଠାକାର ମେଡିକାଲ କଲେଜରୁ ଡିଗ୍ରୀ ବେଆଇନ। ଏହି ଡିଗ୍ରୀ ହାସଲ କରୁଥିବା ଛାତ୍ରଛାତ୍ରୀଙ୍କୁ ଭାରତରେ ପଞ୍ଜୀକରଣ ପାଇଁ ମଧ୍ୟ ଅନୁମତି ମିଳିବ ନାହିଁ। ଏମ୍ସିଆଇର ଏଭଳି ନିଷ୍ପତ୍ତି ଦ୍ବାରା ଉକ୍ତ ଛାତ୍ରଛାତ୍ରୀ ପ୍ରଭାବିତ ହେବେ।
ଏମ୍ସିଆଇ ବିଜ୍ଞପ୍ତିରେ କୁହାଯାଇଛି ଯେ ପିଓକେ ସମେତ ଜମ୍ମୁ-କାଶ୍ମୀର ଓ ଲଦାଖ ପୂୂର୍ଣ୍ଣାଙ୍ଗ ଭାବେ ଭାରତର ଅବିଚ୍ଛେଦ୍ୟ ଅଙ୍ଗ। ପାକିସ୍ତାନ ଏହାକୁ ବେଆଇନ ଭାବେ ନିଜର ବୋଲି ଦାବି କରୁଛି; ତେଣୁ ସେହି ଅଞ୍ଚଳରେ ପାକିସ୍ତାନ ଦ୍ବାରା ପ୍ରତିଷ୍ଠିତ ଓ ପରିଚାଳିତ ମେଡିକାଲ କଲେଜଗୁଡ଼ିକ ଏମ୍ସିଆଇ ଦ୍ବାରା ଅନୁବନ୍ଧିତ ନ ଥିବାରୁ ବେଆଇନ। ଏଭଳି ମେଡିକାଲ କଲେଜକୁ ଭାରତ ସରକାରଙ୍କ ଅନୁମତି ହାସଲ କରିବାକୁ ପଡ଼ିବ। ଏମ୍ସିଆଇ ସହିତ ଏଗୁଡ଼ିକୁ ପଞ୍ଜିକୃତ ଓ ଅନୁବନ୍ଧିତ ହେବାକୁ ପଡ଼ିବ ବୋଲି ମହାସଚିବ ଆର.କେ ବତ୍ସ କହିଛନ୍ତି। ଏହି ବିଜ୍ଞପ୍ତି ଆଧାରରେ ଜମ୍ମୁ-କାଶ୍ମୀର ମେଡିକାଲ କାଉନସିଲ ପକ୍ଷରୁ ସାନି ମାର୍ଗଦର୍ଶିକା ଜାରି କରାଯାଇଛି। ସେହି ଅନୁସାରେ ଯେ କୌଣସି ଦେଶରୁ ଆସୁଥିବା ଛାତ୍ରଛାତ୍ରୀଙ୍କ ପ୍ରମାଣପତ୍ର ଭାରତର ସ୍ବରାଷ୍ଟ୍ର ମନ୍ତ୍ରଣାଳୟ ଦ୍ବାରା ଯାଞ୍ଚ ହେବ ବୋଲି କହିଛନ୍ତିି ଏହାର ସଭାପତି ଡଃ ସଲିମ ଉର୍ ରେହମନ। ସୂଚନାଯୋଗ୍ୟ ଯେ ପିଓକେରେ ଥିବା ମେଡିକାଲ କଲେଜରେ କାଶ୍ମୀର ଛାତ୍ରଛାତ୍ରୀଙ୍କ ପାଇଁ ପାକିସ୍ତାନ ସରକାରଙ୍କ ପକ୍ଷରୁ ରହିଥିବା ସଂରକ୍ଷଣ ବ୍ୟବସ୍ଥାର ସୁଯୋଗ ନେଇ ଏଠାକାର ବହୁ ଛାତ୍ରଛାତ୍ରୀ ସେଠାକୁ ପଢ଼ିବା ପାଇଁ ଯାଇଥାଆନ୍ତି।
