ଚୌଦ୍ୱାର : ଦୀର୍ଘ ୨୦ ବର୍ଷ ହେଲା ବନ୍ଦ ପଡ଼ିଥିବା ଚୌଦ୍ୱାରସ୍ଥିତ ଓଡ଼ିଶା ଟେକ୍ସଟାଇଲ ମିଲ(ଓଟିଏମ୍)ର ଆଉ ୧୪ ଜଣ ଶ୍ରମିକ ଓ କର୍ମଚାରୀଙ୍କର ଇତି ମଧ୍ୟରେ ମୃତ୍ୟୁ ଘଟିଥିବା ଜଣାପଡ଼ିଛି । ସେମାନେ ହେଲେ ଶାଳଗାଁ ଜୟପୁରର ପ୍ରଭାକର ସାହୁ(୬୭), ଚାଞ୍ଚୋ ଗ୍ରାମର ଗୋଲେଖ ଚନ୍ଦ୍ର ସେଠୀ(୬୨), ଆଗ୍ରାହାଟର ସନାତନ ବରାଳ(୭୬), ହରିଅନ୍ତାର ସଂଗ୍ରାମ ରାଉତ(୬୨), ଚୌଦ୍ୱାର ପୌରପାଳିକା ୮ନମ୍ବର ୱାର୍ଡ଼ର ବ୍ରଜ ଜେନା(୭୦), ୩ନମ୍ବର ୱାର୍ଡ଼ର ଲଛମନ ସାହୁ(୭୦),୧୧ ନମ୍ବରର ନିକୁଞ୍ଜ କୁମାର ସାହୁ(୬୮) ଓ ଶ୍ରୁତି ରଞ୍ଜନ ମିଶ୍ର(୬୫), ଚୌଦ୍ୱାର ଗ୍ରାମର ମାସୁର ଖାନ୍(୭୦), ୭ନମ୍ବର ୱାର୍ଡ଼ର ଭଗବାନ ବେହେରା(୫୫) ଓ ବହୁଗ୍ରାମ ମହାଜନପୁରର ଇନ୍ଦ୍ରମଣୀ ବେହେରା(୭୫) । ଏମାନଙ୍କୁ ମିଶାଇ ମୃତ୍ୟୁ ସଂଖ୍ୟା ୭୨୪ରେ ପହଞ୍ଚିଲା।
ପ୍ରକାଶଯୋଗ୍ୟ, ଓଟିଏମ୍ ବନ୍ଦ୍ ହେବାପରେ ଏହାର ୨୨୦୦ରୁ ଅଧିକ ଶ୍ରମିକ ଓ କର୍ମଚାରୀ ସେମାନଙ୍କ ବକେୟା ପ୍ରାପ୍ୟ ନପାଇ ନାନା ଦୁର୍ଦ୍ଦଶା ଭିତରେ କାଳାତିପାତ କରୁଛନ୍ତି। ୨୦ ବର୍ଷ ଧରି ବେକାର ହୋଇ ବସିଥିବା ଏହି ଶ୍ରମିକ ଓ କର୍ମଚାରୀ ମାନେ ଅର୍ଥାଭାବରୁ ପରିବାର ଭରଣ ପୋଷଣ କରିବା ଦୂରର କଥା ନିଜେ ରୋଗରେ ପଡ଼ିଲେ ଔଷଧ ଟିକେ ପାଇଁ ବାର ଓଳି ତେର ପିଣ୍ଢା ହେଉଛନ୍ତି । ସେମାନଙ୍କ ଝାଳବୁହା ବକେୟା ପ୍ରାପ୍ୟକୁ ଅପେକ୍ଷା କରି କରି ଜଣଙ୍କ ପରେ ଜଣେ ମୃତ୍ୟୁ ବରଣ କରିବାରେ ଲାଗିଛନ୍ତି। ହେଲେ ନା ସରକାର, ନା ପ୍ରଶାସନ, ନା ଅଦାଲତ କେହି ସେମାନଙ୍କ ଦୁଃଖ ବୁଝୁଛି ! ଏଦିଗରେ ତୁରନ୍ତ ପଦକ୍ଷେପ ନିଆ ନଗଲେ ପରିସ୍ଥିତି ଅସମ୍ଭାଳ ହୋଇଯିବ ବୋଲି ବିଭୁ ପ୍ରସାଦ ରଥ, ଦୁଳାଳସେନ ସ୍ୱାଇଁ, ସରୋଜ କୁମାର ନାୟକ, ନବ କିଶୋର ଭୁୟାଁ, ବିଜୟ କୁମାର ସାହୁ ମହେଶ୍ୱର ଦଳାଇ ପ୍ରମୁଖ କ୍ଷୋଭର ସହ ପ୍ରକାଶ କରିଛନ୍ତି ।
Comments are closed.