କଟକ:ଲୋକସେବକ ମଣ୍ଡଳର ପୂର୍ବତନ ସଭାପତି ତଥା ବିଶିଷ୍ଟ ଗାନ୍ଧୀବାଦୀ ଓଁକାର ଚାନ୍ଦ(୯୧)ଙ୍କର ବୁଧବାର ଚଣ୍ଡିଗଡସ୍ଥିତ ବାସଭବନରେ ପରଲୋକ ଘଟିଛି। ସେ ଦୀର୍ଘଦିନ ଧରି ବାର୍ଦ୍ଧକ୍ୟଜନିତ ରୋଗରେ ପୀଡିତ ହୋଇ ଚିକିତ୍ସିତ ହେଉଥିଲେ। ମୃତ୍ୟୁଶଯ୍ୟା ନିକଟରେ ୨ଝିଅ ଓ ପରିବାରର ସଦସ୍ୟ ଉପସ୍ଥିତ ଥିଲେ। ଖବରପାଇ ବହୁ ବିଶିଷ୍ଟ ବ୍ୟକ୍ତି ତାଙ୍କ ବାସଭବନରେ ପହଞ୍ଚି ଶେଷଦର୍ଶନ କରି ଶ୍ରଦ୍ଧାଞ୍ଜଳି ଜଣାଇଥିଲେ।
ଜଣେ ଗାନ୍ଧୀବାଦୀ ନେତାଭାବେ ପରିଚିତ ସ୍ୱର୍ଗତ ଚାନ୍ଦ ୧୯୫୯ରେ ଲାଲା ଅଚିନ୍ତ୍ୟରାମଙ୍କ ନେତୃତ୍ୱରେ ଭୂଦାନ ଆନ୍ଦୋଳନରେ ସାମିଲ ହୋଇଥିଲେ। ସ୍ୱର୍ଗତ ଚାନ୍ଦ ୧୯୭୨ ମସିହାରେ ହିମାଚଳ ପ୍ରଦେଶ ବିଧାନସଭାକୁ ନିର୍ବାଚିତ ହୋଇଥିଲେ। ୧୯୭୭ ପର୍ୟ୍ୟନ୍ତ ସେ ବିଧାୟକ ରହିଥିଲେ। ସେ ଜୀବନର ଶେଷ ପର୍ୟ୍ୟନ୍ତ ବିଭିନ୍ନ ସାମାଜିକ ଓ ସାଂସ୍କୃତିକ ସଂଗଠନ ସହିତ ସଂଶ୍ଳିଷ୍ଟ ରହିଥିଲେ। ଏକାଧିକ ଅନୁଷ୍ଠାନ ପକ୍ଷରୁ ସେ ବିଭିନ୍ନ ସମ୍ମାନରେ ସମ୍ମାନିତ ହୋଇଥିଲେ। ତାଙ୍କ ବିୟୋଗରେ ଲୋକସେବକ ମଣ୍ଡଳର ଟ୍ରଷ୍ଟି ଡ. ଅରିଜିତ ପଶାୟତ, ଲୋକସେବକ ମଣ୍ଡଳର ସଭାପତି ଦୀପକ ମାଲବ୍ୟ, ସମ୍ପାଦକ ନିରଞ୍ଜନ ରଥ, ଉପସଭାପତି ରାଜକୁମାର, କୋଷାଧ୍ୟକ୍ଷ ଭୀମସେନ ଯାଦବ, ଆଜୀବନ ସଦସ୍ୟ ଡ. ପ୍ରଭାସ ଆଚାର୍ୟ୍ୟ, ଆଜୀବନ କର୍ମୀ ରାଜେନ୍ଦ୍ର ଜେନା, ‘ସମାଜ’ର ପୂର୍ବତନ ମୁଖ୍ୟ କାର୍ୟ୍ୟନିର୍ବାହୀ ଅଧିକାରୀ ଉମାଚରଣ ନାୟକ ପ୍ରମୁଖ ଗଭୀର ଶୋକପ୍ରକାଶ କରିବା ସହିତ ଶୋକସନ୍ତପ୍ତ ପରିବାର ପ୍ରତି ସମବେଦନା ଜଣାଇଛନ୍ତି।
